ତେଲ୍ ଅଭିଭ୍,୧୪/୧୨: ଇସ୍ରାଏଲ ଡିଫେନ୍ସ ଫୋର୍ସ(ଆଇଡିଏଫ୍) ଇରାନର ଆଣବିକ ଆଡ୍ଡାରେ ଆକ୍ରମଣ କରିବାକୁ ଯୋଜନା ରଖିଛି । ଇସ୍ରାଏଲର ଜଣେ ଅଧିକାରୀଙ୍କ କହିବା ଅନୁସାରେ, ପଶ୍ଚିମ ଏସିଆରେ ଇରାନ ସମର୍ôଥତ ବିଦ୍ରୋହୀ ଗୋଷ୍ଠୀ ଦୁର୍ବଳ ହେବା ପରେ ଇରାନର ନ୍ୟୁକ୍ଲିୟର ଠିକଣାରେ ଆକ୍ରମଣ କରିବାର ଏହା ଉଚିତ ସମୟ । ସେନା ଅଧିକାରୀମାନେ ସୁଯୋଗ ଅପେକ୍ଷାରେ ଅଛନ୍ତି । ଆଇଡିଏଫ୍ ଅଧିକାରୀଙ୍କ ଅନୁସାରେ, ଲେବାନନରେ ହିଜ୍ବୁଲ୍ଲା ଦୁର୍ବଳ ପଡ଼ିବା ଏବଂ ସିରିଆରେ ବଶର ଅଲ୍-ଅସଦ ସରକାରର ପତନ ହେବା ଦ୍ୱାରା ଇରାନ ଏକୁଟିଆ ପଡ଼ିଯାଇଛି ।
ଏପରି ସ୍ଥିତିରେ ଇରାନ ନିଜ ଶକ୍ତି ବଢ଼ାଇବାକୁ ପରମାଣୁ କାର୍ଯ୍ୟକ୍ରମ ବଢ଼ାଇପାରେ । ଏଥିସହ ପରମାଣୁ ବୋମା ମଧ୍ୟ ତିଆରି କରିପାରେ । ତେଣୁ ଇରାନକୁ ଏଥିରୁ ରୋକିବାକୁ ହେବ । ଅନ୍ୟପକ୍ଷରେ ଇସ୍ରାଏଲ ସେନା ସିରିଆରେ ସୈନ୍ୟ ଠିକଣାରେ ଲଗାତର ଏୟାରଷ୍ଟ୍ରାଇକ୍ କରୁଛି । ଅଦ୍ୟାବଧି ଇସ୍ରାଏଲ ଆକ୍ରମଣରେ ସିରିଆର ୮୫%ରୁ ଅଧିକ ଏୟାର ଡିଫେନ୍ସ ସିଷ୍ଟମ ନଷ୍ଟ ହୋଇସାରିଛି । ଏଥିସହ ସିରିଆର ନୌସେନା ଠିକଣାକୁ ମଧ୍ୟ ଟାର୍ଗେଟ କରାଯାଉଛି । ସିରିଆର ୧୫ ନୌସେନା ଜାହାଜ ନଷ୍ଟ ହୋଇସାରିଛି । ସେହିପରି ଲେବାନନ୍ରେ ଇସ୍ରାଏଲ ଆତଙ୍କବାଦୀଙ୍କ ଆଡ୍ଡାକୁ ଟାର୍ଗେଟ କରି ଆକ୍ରମଣ କରିଛି । ଏହି ଆତଙ୍କବାଦୀମାନେ ଇସ୍ରାଏଲ ନାଗରିକଙ୍କ ପାଇଁ ବିପଦ ସୃଷ୍ଟି କରୁଥିବା ଇସ୍ରାଏଲ କହିଛି । ହିଜ୍ବୁଲ୍ଲା ଏବଂ ଇସ୍ରାଏଲ ମଧ୍ୟରେ ସଦ୍ୟ ଜାରିଥିବା ଯୁଦ୍ଧବିରତିର ଉଲ୍ଲଂଘନ କରୁଥିବାରୁ ଆତଙ୍କବାଦୀଙ୍କୁ ଟାର୍ଗେଟ କରାଯାଇଥିବା ଇସ୍ରାଏଲ ପକ୍ଷରୁ କୁହାଯାଇଛି।
