ନୂଆଦିଲ୍ଲୀ,୧୧/୧୧: ଖଲିସ୍ତାନୀ ଆତଙ୍କୀ ଅର୍ଶଦୀପ ସିଂହ ଓରଫ ଅର୍ଶଦୀପ ଡଲ୍ଲାକୁ କାନାଡାରେ ଗିରଫ କରାଯାଇଛି । ଗତମାସ ୨୭-୨୮ ତାରିଖରେ କାନାଡାର ମିଲଟନ ସହରରେ ଘଟିଥିବା ଏକ ଗୁଳିକାଣ୍ଡ ମାମଲାରେ ତାକୁ ଗିରଫ କରାଯାଇଥିବା ପୁଲିସ ସୂଚନା ଦେଇଛି । ତେବେ ଗିରଫ ପରେ ତାକୁ ଜାମିନରେ ଛଡାଯାଇଛି କି ନାହିଁ ତାହା ସ୍ପଷ୍ଟ ହୋଇନାହିଁ । ଭାରତ ଓ କାନାଡା ମଧ୍ୟରେ କୂଟନୈତିକ ବିବାଦ ଯୋଗୁ କୌଣସି ସୂଚନା ଆଦାନ ପ୍ରଦାନ ହୋଉନାହିଁ । ତେଣୁ ଡଲ୍ଲା ସମ୍ପର୍କରେ ଅଧିକ ଜାଣିବା ସମ୍ଭବ ହୋଇପାରୁନାହିଁ । ଡଲ୍ଲା ହେଉଛି ମୃତ ଖଲିସ୍ତାନୀ ଆତଙ୍କୀ ହରଦୀପ ସିଂହ ନିଜ୍ଜରର ଘନିଷ୍ଠ ସହଯୋଗୀ । ସେ ମଧ୍ୟ ଭାରତର ମୋଷ୍ଟ ୱାଣ୍ଟେଡ ତାଲିକାରେ ରହିଛି ।
ଗତ ସେପ୍ଟେମ୍ବର ମାସରେ ପଞ୍ଜାବର ମୋଗା ଜିଲ୍ଲାରେ କଂଗ୍ରେସ ନେତା ବଲଜିନ୍ଦର ସିଂହ ବାଲିଙ୍କୁ ତାଙ୍କ ଘରେ ଗୁଳିକରି ହତ୍ୟା କରାଯାଇଥିଲା। ଏହି ହତ୍ୟା ଘଟଣା ପଛରେ ତାର ହାତ ଥିବା ନେଇ ଡଲ୍ଲା ଦାବି କରିଥିଲା । ଗତମାସରେ ଫରିଦକୋଟ ଜିଲ୍ଲାରେ ଗୁରପ୍ରିତ୍ ସିଂହ ହରି ନାଉ ନାମକ ଜଣେ ଶିଖ୍ କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯିବା ଘଟଣାରେ ପୁଲିସ ଡଲ୍ଲାର ଦୁଇ ସହଯୋଗୀଙ୍କୁ ଗିରଫ କରିଥିଲା ।
ସେହିଭଳି ତଦନ୍ତରୁ ଜଣାପଡିଛି କି ଡଲ୍ଲାର ନିର୍ଦ୍ଦେଶରେ ଗତ ନଭେମ୍ବର ୭ ତାରିଖରେ ମଧ୍ୟପ୍ରଦେଶର ଗ୍ୱାଲିୟର ଠାରେ ଜଶୱନ୍ତ ସିଂହ ଗିଲ୍ ନାମକ ଜଣେ ବ୍ୟକ୍ତିଙ୍କୁ ହତ୍ୟା କରାଯାଇଥିଲା । ଗିଲ ୨୦୧୬ର ଏକ ହତ୍ୟା ମାମଲାରେ ଆଜୀବନ ଜେଲ୍ ଭୋଗୁଥିଲା ।
