କଟକ,୦୩/୧୧: ଦଶହରା ଭଳି ଯେପରି କାଳୀ ଭସାଣି ବିଳମ୍ବ ନହୁଏ, ଦୀର୍ଘ ସମୟ ମେଢଗୁଡ଼ିକ ରାସ୍ତାରେ ପଡ଼ି ନରହେ ଓ ସମସ୍ତ ମେଢ଼ ଠିକ୍ ସମୟରେ ମୁଖ୍ୟ ରୁଟ୍ ଅତିକ୍ରମ କରି ଦେବୀଗଡ଼ାରେ ପହଞ୍ଚିବ ସେଥିପାଇଁ କଟକ ପୁଲିସ ପକ୍ଷରୁ ଆବଶ୍ୟକୀୟ ବ୍ୟବସ୍ଥା ଗ୍ରହଣ କରାଯାଇଛି । ଭସାଣି ପାଇଁ ଚଳିତ ବର୍ଷ ମୋଟ୍ ୫୧ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି । ମେଢ଼ଗୁଡ଼ିକୁ ସଠିକ୍ ଢଙ୍ଗରେ ପରିଚାଳନା ପାଇଁ ଶନିବାର ଡିସିପି ସମସ୍ତ ବରିଷ୍ଠ ଅଧିକାରୀଙ୍କୁ ଏକ ବୈଠକରେ ଆବଶ୍ୟକୀୟ ଟିପ୍ସ ଦେଇଛନ୍ତି । ପୂଜା କମିଟି ସହିତ ମିଶି ସୁରୁଖୁରୁରେ ମେଢ଼ ନେବାକୁ ଡିସିପି ଜଗମୋହନ ମୀନା ଗୁରୁମନ୍ତ୍ର ଦେଇଛନ୍ତି । ଦଶହରା ଭସାଣି ଏକ ପ୍ରକାର ଶାନ୍ତିଶୃଙ୍ଖଳାରେ ଶେଷ ହୋଇଥିବାରୁ କାଳୀ ଭସାଣିକୁ ଠିକ୍ ସେହି ଢଙ୍ଗରେ ସାରିବାକୁ ଡିସିପି ସମସ୍ତଙ୍କ ସହଯୋଗ ଲୋଡ଼ିଛନ୍ତି ।
ତେବେ ମୁତୟନ ହୋଇଥିବା ଫୋର୍ସ ମେଢ଼, ଦେବୀଗଡ଼ା ଓ ରୁଟ୍ ସହିତ ବିଭିନ୍ନ ଏଡ୍ପୋଷ୍ଟରେ ରହିବେ । ସେହିପରି ରୁଟ୍ ଯାଉଥିବା ଥାନାଗୁଡ଼ିକରେ ଗୋଟିଏ କରି ସେକ୍ସନ୍ ଫୋର୍ସ ମଧ୍ୟ ରିଜର୍ଭରେ ରହିବ । ଆବଶ୍ୟକସ୍ଥଳେ ଥାନା ଅଧିକାରୀ ଏହାକୁ କାମରେ ଲଗାଇବେ । ଅନ୍ୟ ୨ ପ୍ଲାଟୁନ୍ ଫୋର୍ସ ବିଭିନ୍ନ ବଡ଼ ଛକରେ ଟ୍ରାଫିକ୍ ପରିଚାଳନା ପାଇଁ ନିୟୋଜିତ ହେବେ । ଦଶହରା ଅପେକ୍ଷା କାଳୀ ମେଢ଼ର ସଂଖ୍ୟା ପ୍ରାୟ ୪୦ ପ୍ରତିଶତ କମ୍ ରହିଲେ ବି ଭସାଣି ଯାତ୍ରାର ଲମ୍ବ ପ୍ରାୟ ସମାନ ରହିବ । ତେଣୁ ଏହାକୁ ପରିଚାଳନାରେ ଯେପରି କୌଣସି ବିଭ୍ରାଟ୍ ନହୁଏ ସେଥିପ୍ରତି ଡିସିପି ଶ୍ରୀ ମୀନା ଶାନ୍ତି କମିଟି କର୍ମକର୍ତ୍ତା ଓ ବିଭିନ୍ନ ପୂଜା କମିଟି ସହିତ ବ୍ୟକ୍ତିଗତ କଥା ମଧ୍ୟ ହୋଇଛନ୍ତି ।
ସୁରକ୍ଷା ଦାୟିତ୍ୱ ତଦାରଖ କରିବା ପାଇଁ ଏଏସ୍ଆଇ ଓ ଏସ୍ଆଇ ର୍ୟାଙ୍କ୍ର ପ୍ରାୟ ୨୫୦ ଅଫିସର ରହିବେ । ସେହିପରି ପ୍ରାୟ ୪୦ ଜଣ ଇନ୍ସପେକ୍ଟର, ୧୦ରୁ ଅଧିକ ଏସିପି ବା ଡିଏସ୍ପି ର୍ୟାଙ୍କ୍ର ଅଧିକାରୀ ଓ ୨ ଜଣ ଏଡିସିପି ଦୁଇଟି ସେକ୍ଟରରେ ସୁରକ୍ଷା ତଦାରଖ କରିବେ । ରାସ୍ତା ତମାମ୍ ଭସାଣି ପରିଚାଳନା ପାଇଁ ମୋଟ୍ ୬୫ଟି ଏଡ୍ପୋଷ୍ଟ ବା ଭିଏଚ୍ଏଫ୍ ପୋଷ୍ଟ ନିର୍ମାଣ ହୋଇଛି । ଏହି ପୋଷ୍ଟରେ ଜଣେ କରି ଅଫିସର ଓ ତିନି ଜଣ କର୍ମଚାରୀ ରହିବେ । କୌଣସି ପ୍ରକାର ବିଶୃଙ୍ଖଳା ହେଲେ ଏଠାରୁ ସୂଚନା ଦିଆଯାଇ ଫୋର୍ସ ପରିଚାଳନା ହେବ ।
ତେବେ କେବଳ ଦେବୀଗଡ଼ାରେ ୩ ପ୍ଲାଟୁନ୍ ଫୋର୍ସ ରହିବେ । ସେଠାରେ ଅଧିକ ଗହଳି ହେଉଥିବାରୁ ଏଭଳି ନିଷ୍ପତ୍ତି ହୋଇଛି । ଗୁରୁତ୍ୱପୂର୍ଣ୍ଣ ହେଉଛି, ଭସାଣିର ମୁଖ୍ୟ ରୁଟ୍କୁ ନୋ’ ଏଣ୍ଟ୍ରି ଜୋନ୍ ଭାବେ ଘୋଷଣା କରାଯାଇଛି । ମନଇଚ୍ଛା ସେହି ରୁଟ୍ରେ କେହି ଗାଡ଼ି ଭର୍ତ୍ତି କରି ନେଇପାରିବେ ନାହିଁ । ଏଭଳି କରିବାରୁ ଗହଳି ବଢୁଛି । ତେବେ ଦଶହରା ପାଇଁ ଯେଉଁ ‘ୱାନ୍ ୱେ ଟ୍ରାଫିକ୍’ ବ୍ୟବସ୍ଥା କରାଯାଇଥିଲା ତାହା କାଳୀମେଢ଼ ଭସାଣି ବେଳେ ରହିବ ବୋଲି ସୂଚନା ଦିଆଯାଇଛି । ରବିବାର ଦିନ ୧୨ଟାରୁ ୱାନ୍ ୱେ ଲାଗୁ ହେବ । ଭସାଣିରେ ନିୟୋଜିତ ହେବାକୁ ଥିବା କର୍ମଚାରୀ ରବିବାର ସକାଳ ୮ଟାରୁ ଭସାଣି ଶେଷ ପର୍ଯ୍ୟନ୍ତ ଡ୍ୟୁଟି କରିବେ । ରାତି ୧୨ଟା ପର୍ଯ୍ୟନ୍ତ ସାଉଣ୍ଡ୍ ବାଜି ଭସାଣି ଚାଲିବ । ୧୨ରେ ସାଉଣ୍ଡ୍ ବନ୍ଦ ହେବ ଓ ଏହା ପରେ ପାରମ୍ପରିକ ବାଦ୍ୟରେ ଭସାଣି ଶେଷ ହେବ ।
