ଭୁବନେଶ୍ୱର, ୫।୫: ଏବେ ଆପଣ ବଜାରରୁ ଆମ୍ୱ ନିଶ୍ଚିତ କିଣୁଥିବେ । ଦେଶୀ, ବାଇଗଣପଲେଇରୁ ନେଇ ଦସେରୀ, ସୁନ୍ଦରୀ, ଆଲ୍ଫନ୍ସୋ ଆଦି ଭିନ୍ନ ଭିନ୍ନ ଜାତିର ଆମ୍ବ ବଜାରରେ ଉପଲବ୍ଧ ହେଲାଣି । ବିଶେଷ କରି ସତେଜ ଓ ଚିକ୍କଣ ହଳଦିଆ ଦିଶୁଥିବା ଆମ୍ବକୁ ଆମେ କିଣିଥାଉ । କିନ୍ତୁ, ବଜାରରୁ କିଣୁଥିବା ଏହି ଆମ୍ୱ କାର୍ବାଇଡ୍ ଦିଆଯାଇ ପଚାଯାଇନି ତ ? ଆଖିକୁ ସୁନ୍ଦର ଦିଶୁଥିବା ଏହି ଆମ୍ବ, ଗଛର ପାଚିଲା ଆମ୍ୱ ନା ତାକୁ କାର୍ବାଇଡ୍ ଦିଆଯାଇ ପଚାଯାଇଛି କେମିତି ଜାଣିବେ ? ପରବର୍ତ୍ତୀ ସମୟରେ ବଜାରରୁ ଆମ୍ୱ କିଣିବାକୁ ଗଲେ କିଛି ଦିଗ ପ୍ରତି ଧ୍ୟାନ ଦିଅନ୍ତୁ । ଫଳରେ କେଉଁ ଆମ୍ୱଗୁଡ଼ିକୁ କାର୍ବାଇଡ୍ ଦିଆଯାଇ ପଚାଯାଇଛି, ତାହା ସହଜରେ ଚିହ୍ନିପାରିବେ ।
ଭାରତରେ କାର୍ବାଇଡ୍ ବ୍ୟବହାର ବେନିୟମ ହୋଇଥିଲେ ବି ଅଧିକାଂଶ ଫଳ ବେପାରୀ ଏହାକୁ ବେଧଡ଼କ ପ୍ରୟୋଗ କରିଥାନ୍ତି । ହେଲେ କିଛି ସରଳ ଉପାୟ ବିଷୟରେ ଜଣାଇବୁ, ଯାହା ଦ୍ବାରା ଆପଣ ଆମ୍ବକୁ ବିଷାକ୍ତ କାର୍ବାଇଡ୍ ଦିଆଯାଇ ପଚାଯାଇଛି କି ନାହିଁ ଜାଣିପାରିବେ । ଇନଷ୍ଟାଗ୍ରାମରେ ଏନେଇ ଏକ ଭିଡିଓ ପୋଷ୍ଟ କରି ଏ ସମ୍ପର୍କରେ ସୂଚନା ଦେଇଛନ୍ତି ଲାଇଫଷ୍ଟାଇଲ ଗୁରୁ ଲ୍ୟୁକ୍ କାଉଟିନୋ । କାର୍ବାଇଡ୍ ଦିଆଆଇଥିବା ଆମ୍ୱକୁ ଚିହ୍ନିବାକୁ କିଛି ସରଳ ପରୀକ୍ଷା ବିଷୟରେ କହିଛନ୍ତି, ଯାହା ଦ୍ୱାରା ଆପଣ ଘରେ ବସି ଆମ୍ବରେ କ୍ଷତିକାରକ କାର୍ବାଇଡ୍ ବ୍ୟବହାର କରାଯାଇଛି କି ନାହିଁ ତାହା ଯାଞ୍ଚ କରିପାରିବେ । ପ୍ରଥମେ ‘ରଙ୍ଗ ପରୀକ୍ଷା’ । ଆମ୍ବ ଚୋପାକୁ ଭଲ ଭାବରେ ଦେଖନ୍ତୁ । ଯଦି ଆମ୍ବର ଚାରିପାଖର ରଙ୍ଗ ସମାନ, ତେବେ ଏହା ଭଲ ସଙ୍କେତ । କିନ୍ତୁ, ଯଦି ଆମ୍ବ ଚାରିପଟେ ଛୋଟ ଛୋଟ କଳା ଦାଗ ରହିଛି, ତେବେ ସତର୍କ ରୁହନ୍ତୁ । ଏଥିରେ କାର୍ବାଇଡ୍ ବ୍ୟବହାର ହୋଇଥାଇପାରେ । ଦ୍ବିତୀୟରେ ‘ପ୍ରେସର୍ ଟେଷ୍ଟ୍’। ଆମ୍ବକୁ ହାତରେ ଚିପି ଦେଖନ୍ତୁ । ଯଦି ଆମ୍ବଟି ଅଧିକ ଦବି ନ ଯାଇ ସ୍ବାଭାବିକ ଭାବେ ଯେତିକି ଟାଣ ରହିବା କଥା ରହିଛି, ତେବେ ଏହା ଭଲ ଆମ୍ବ । ମାତ୍ର, କାର୍ବାଇଡ୍ ପ୍ରୟୋଗଯୁକ୍ତ ଆମ୍ବକୁ ଚାପିବା ଦ୍ବାରା ତାହା ସ୍ବାଭାବିକଠାରୁ ଅଧିକ ନରମ ଲାଗେ ।
ସବୁଠାରୁ ଗୁରୁତ୍ବପୂର୍ଣ୍ଣ ହେଉଛି ‘ପାଣି ପରୀକ୍ଷା’ । ବଜାରରୁ ଆଣିବା ପରେ ଆମ୍ବକୁ ପାଣି ଭର୍ତ୍ତି ହୋଇଥିବା ଏକ ବଡ଼ ପାତ୍ରରେ ରଖିଦିଅନ୍ତୁ । ଯଦି ଏହା ବୁଡ଼ିଯାଏ, ତେବେ ଏହା ଭଲ ଆମ୍ବ ହୋଇଥିବ । ଯଦି ଏହା ଏହା ପାଣିରେ ଭାସେ, ତେବେ ଏଥିରେ କାର୍ବାଇଡ୍ ପ୍ରୟୋଗ କରଯାଇଥିବ । ହୁଏତ ଏହି ପରୀକ୍ଷା ସବୁ ସମୟରେ ସମ୍ପୂର୍ଣ୍ଣ ନିର୍ଭୁଲ୍ ପ୍ରମାଣିତ ହୋଇନପାରେ । କାରଣ ବିଧିବଦ୍ଧ ପରୀକ୍ଷା କରିବାକୁ ହେଲେ ଏକ ଲ୍ୟାବ୍ ଆବଶ୍ୟକ । ତେବେ ଅଧିକାଂଶ ସମୟରେ ଏହି ପରୀକ୍ଷା ଠିକ୍ ହୋଇଥାଏ ବୋଲି ଲ୍ୟୁକ୍ କାଉଟିନୋ ଦର୍ଶାଇଛନ୍ତି ।
