ପାଟନା,୧୭/୧୧: ପାଟନାର ନାଳନ୍ଦା ମେଡିକାଲ କଲେଜ ଓ ହସ୍ପିଟାଲ (ଏନ୍ଏମ୍ସିଏଚ୍)ରେ ଏକ ଅଭାବନୀୟ ଘଟଣା ଘଟିଛି । ଏଠାରେ ଚିକିତ୍ସା ପାଇଁ ଭର୍ତ୍ତି ହୋଇଥିବା ଜଣେ ରୋଗୀଙ୍କର ଆଖିକୁ ତାଡ଼ି ନିଆଯାଇଛି । ରୋଗୀଙ୍କ ପରିବାର ଲୋକ ହସ୍ପିଟାଲରେ ହଙ୍ଗାମା କରିବା ପରେ ଘଟଣା ଲୋକଲୋଚନକୁ ଆସିଛି । ଏହାକୁ ନେଇ ଆଲମଗଞ୍ଜ ଥାନାରେ ମାମଲା ଦାୟର ହୋଇଛି ।
ନଭେମ୍ବର ୧୪ରେ ନାଳନ୍ଦା ନିବାସୀ ଫଣ୍ଟୁଶ କୁମାରଙ୍କୁ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ତାଙ୍କ ପେଟରେ ଗୁଳି ବାଜିଥିଲା। ଚିକିତ୍ସା ଚାଲିଥିବା ବେଳେ ଶନିବାର ସେ ଆଖି ବୁଜିଥିଲେ । ଏହାପରେ ପରିବାର ଲୋକ ଯାଇ ଦେଖିଲା ବେଳକୁ ଫଣ୍ଟୁଶଙ୍କର ଗୋଟିଏ ଆଖି ଗାଏବ ଥିଲା ।
ଏହି ମାମଲାକୁ ନେଇ ଜଣେ ଡାକ୍ତର ସଫେଇ ଦେଇ କହିଛନ୍ତି, ସମ୍ଭବତଃ ରୋଗୀଙ୍କ ଆଖିକୁ ମୂଷା ନେଇଯାଇଥିବ । ହସ୍ପିଟାଲର ଅଧୀକ୍ଷକ ଡା. ବିନୋଦ ସିଂହ କହିଛନ୍ତି, ଫଣ୍ଟୁଶଙ୍କୁ ଚିକିତ୍ସା ଲାଗି ଗତ ଗୁରୁବାର ହସ୍ପିଟାଲକୁ ଅଣାଯାଇଥିଲା । ପେଟରେ ଗୁଳି ବାଜିଥିବାରୁ ପରଦିନ ଅସ୍ତ୍ରୋପଚାର ହୋଇଥିଲା । ଅସ୍ତ୍ରୋପଚାରର ୩୬ ଘଣ୍ଟା ପରେ ତାଙ୍କର ମୃତ୍ୟୁ ଘଟିଥିଲା । ତାଙ୍କୁ ଆଇସିୟୁରେ ରଖାଯାଇଥିଲା । ତାଙ୍କର ବାମ ଆଖି ଗାଏବ ଥିବା ପରିବାର ଲୋକେ କହିଥିଲେ । ସେମାନଙ୍କ ଅଭିଯୋଗକୁ ନେଇ ତଦନ୍ତ କରାଯାଉଛି । ଆଖିକୁ ମୂଷା ନେଇଛି କି ବୋଲି ପଚାରିବାରୁ ସେ କହିଛନ୍ତି, ତାହା ବି ହୋଇପାରେ । ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପରେ ସବୁ ଖୁଲାସା ହୋଇଯିବ।
