ଭୁବନେଶ୍ୱର,୧୬/୧୦ : ରାଜ୍ୟରେ ଶିଶୁଙ୍କ ଅପପୁଷ୍ଟି ଦୂର କରିବାରେ ଛତୁଆର ବିକଳ୍ପ ସାଜିପାରେ ମାଣ୍ଡିଆ ସ୍ମୁଦି କିମ୍ବା ମାଣ୍ଡିଆ ଛତୁଆ । ସରକାର ଯୋଗାଣ କରୁଥିବା ଛତୁଆରେ ଗହମର ପରିମାଣ ସର୍ବାଧିକ ରହୁଥିବା ବେଳେ ଅନେକ ସମୟରେ ନିମ୍ନମାନର ସାମଗ୍ରୀ ପଡିଥିବାରୁ ପିତା ଲାଗୁଥିବା ଅଭିଯୋଗ ହେଉଛି । ଏହାଛଡା ଆଦିବାସୀମାନେ ମଧ୍ୟ ଛତୁଆ ଖାଇବାକୁ ଆଗ୍ରହ ପ୍ରକାଶ କରୁନାହାନ୍ତି । କିଛିଦିନ ତଳେ ଶିଶୁଙ୍କୁ ଦିଆଯାଉଥିବା ଛତୁଆର ମାନକୁ ନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଉଦ୍ବେଗ ପ୍ରକାଶ କରିବା ପରେ ଛତୁଆର ବିକଳ୍ପ ବ୍ୟବସ୍ଥା କରିବାକୁ ଆଲୋଚନା ହେଉଛି । ଏହି ବିକଳ୍ପ ତାଲିକାରେ ସର୍ବାଗ୍ରେ ରହିଛି ମାଣ୍ଡିଆ ସ୍ମୁୁଦି ।
ରାଜ୍ୟରେ ଶିଶୁଙ୍କ ଅପପୁଷ୍ଟି ଦୂର କରିବା ଏକ ଆହ୍ୱାନ ସାଜିଥିବାରୁ ଏହାକୁ ପ୍ରତିହତ କରିବା ଲାଗି ବିଜେଡି ସରକାର ଅମଳରେ ଆସିଥିଲା ଛତୁଆ ଯୋଜନା । ଅଙ୍ଗନବାଡ଼ି କେନ୍ଦ୍ରରେ ଶିଶୁଙ୍କୁ ଏହି ଛତୁଆ ଯୋଗାଇଦିଆଯାଉଛି । କିନ୍ତୁ ବିଡମ୍ବନା ଯେ, ଅପପୁଷ୍ଟି ମୁକ୍ତ ଓଡିଶା ଗଠନରେ ସବୁଠାରୁ ବଡ ବାଧକ ସାଜିଛି ଏହି ଛତୁଆ । ସରକାରୀ ଛତୁଆର ମାନକୁ ନେଇ ବ୍ଲକ, ଜିଲ୍ଲା, ରାଜ୍ୟ ସ୍ତରରେ ଏବଂ ଏପରିକି ବିଧାନସଭାରେ ମଧ୍ୟ ହୋଇଛି ତମ୍ବି ତୋଫାନ । ତେଣୁ ନୂଆ ସରକାରରେ ଏହି ଛତୁଆର ବିକଳ୍ପ ଲାଗି ଯୋଜନା କରାଯାଉଛି । ବିଶେଷଜ୍ଞଙ୍କ ମତାନୁସାରେ ୧ବର୍ଷରୁ ୬ବର୍ଷ ପର୍ଯ୍ୟନ୍ତ ଶିଶୁଙ୍କ ପୋଷଣ ଲାଗି ଛତୁଆର ମୁଖ୍ୟ ଉପାଦାନ ଭାବେ ୨୫୦ ଗ୍ରାମର ଗହମ କିମ୍ବା ଚୁଡା କିମ୍ବା ମାଣ୍ଡିଆ ରଖାଯାଇପାରିବ । ଏହାସହ ୧୦୦ ଗ୍ରାମର ଚିନାବାଦାମ, ୪୦ରୁ ୫୦ ଗ୍ରାମ ପିସ୍ତାବାଦାମ, ୫୦ରୁ ୬୦ ଗ୍ରାମ ଭଜା ବୁଟ ଏବଂ ସ୍ୱାଦ ଲାଗି ଗୁଜରାତିକୁ ମିଶାଇ ଉନ୍ନତମାନର ଛତୁଆ ଶିଶୁଙ୍କୁ ଦିଆଯାଇପାରିବ ।
ଏହାବାଦ୍ ଗହମ ଛତୁଆ, ଚୁଡା ଛତୁଆ ଦେଇହେବ । ସେହିପରି ମାଣ୍ଡିଆ ସହ ଦହି, ଗୁଡ, ସାମାନ୍ୟ ଲୁଣ ଦିଆଯାଇପାରିବ । ତେବେ ସବୁଠାରୁ ସୁଆଦିଆ ହେଉଛି ମାଣ୍ଡିଆ ସ୍ମୁଦି । ଏଥିରେ ମାତ୍ର ୩୦ରୁ ୪୦ ଗ୍ରାମ ମାଣ୍ଡିଆ, କ୍ଷୀର, ପିସ୍ତା ବାଦାମ, ମହୁ କିମ୍ବା ଗୁଡ ଏବଂ ଆବଶ୍ୟକସ୍ଥଳେ ଗୋଟିଏ କଦଳୀ ମିଶାଇ ଗ୍ରାଇଣ୍ଡିଂ କରି ପ୍ରତି ପିଲାଙ୍କୁ ଦିନରେ ଗୋଟିଏ ଗିଲାସ ଦିଆଯାଇପାରେ । ଏହା ପିଲାଙ୍କ ପାଟିକୁ ସୁଆଦିଆ ଲାଗିବା ସହ ସରକାରଙ୍କ ପକେଟ୍କୁ ମଧ୍ୟ ସୁହାଇବ । ଏଥିପାଇଁ ଅଳ୍ପ ଖର୍ଚ୍ଚ ହେଉଥିବାରୁ ସରକାର ଅଙ୍ଗନବାଡ଼ି କେନ୍ଦ୍ରକୁ ଏହା ଯୋଗାଇବାରେ କୌଣସି ଅସୁବିଧା ନାହିଁ ।
ଏ ସଂପର୍କରେ ସମ୍ ହସ୍ପିଟାଲ୍ର ଚିଫ୍ ଡାଇଟିସିଆନ୍ ଡାକ୍ତର ପୁଷ୍ପାଞ୍ଜଳି ମିଶ୍ର କହିଛନ୍ତି, ପିଲାଙ୍କ ପୁଷ୍ଟିହୀନତାକୁ ଦୃଷ୍ଟିରେ ରଖି ଛତୁଆକୁ ସମ୍ପୂର୍ଣ୍ଣ ବନ୍ଦ ନ କରି ଏଥିରେ ମିଶୁଥିବା ସାମଗ୍ରୀ ପରିବର୍ତ୍ତନ କରାଯାଇପାରିବ । ମାଣ୍ଡିଆରେ ଫାଇବର୍ ଏବଂ ଆଇରନ୍ ଅଧିକ ଥିବାବେଳେ କାର୍ବୋହାଇଡ୍ରେଟ୍ ପରିମାଣ ବହୁତ କମ୍ । ମାଣ୍ଡିଆ ସହ ଭଜା ବୁଟ, ଚିନାବାଦାମ ମିଶାଇ ଛତୁଆ କରି ଦେଇପାରିଲେ ପିଲାଙ୍କ କୁପୋଷଣ ଦୂର ହୋଇପାରିବ । ତେବେ ମାଣ୍ଡିଆ ଛତୁଆ, ବୁଟ ଛତୁଆ, ଚୁଡା ଛତୁଆ, ଗହମ ଛତୁଆ, ମାଣ୍ଡିଆ ପିଠା, ମାଣ୍ଡିଆ ସ୍ମୁଦି ଏ ସବୁକୁ ଗୋଟିଏ ଗୋଟିଏ ଦିନରେ ଦିଆଗଲେ ପିଲା ଖୁସିରେ ଖାଇବେ ବୋଲି ସେ ମତ ରଖିଛନ୍ତି ।
