ମୁମ୍ବାଇ,୦୨/୦୧: ମୁମ୍ବାଇର ଏକ ସ୍ୱତନ୍ତ୍ର ଅଦାଲତ ବୁଧବାର ୮ ପାକିସ୍ତାନୀ ନାଗରିକଙ୍କୁ ୨୦ ବର୍ଷ ଜେଲ ଦଣ୍ଡାଦେଶ ପ୍ରଦାନ କରିଛନ୍ତି । ଅଭିଯୁକ୍ତମାନେ ୧୦ ବର୍ଷ ତଳେ ଡ୍ରଗ୍ସ ଚୋରା ଚାଲାଣ କରୁଥିବା ବେଳେ ଗିରଫ ହୋଇଥିଲେ । କୋର୍ଟରେ ସମସ୍ତେ ଦୋଷୀ ସାବ୍ୟସ୍ତ ହୋଇଥିଲେ । ସ୍ୱତନ୍ତ୍ର ବିଚାରପତି ଶଶିକାନ୍ତ ବାଙ୍ଗର ସମସ୍ତ ଦୋଷୀଙ୍କ ଉପରେ ୨ ଲକ୍ଷ ଟଙ୍କା ଲେଖାଏଁ ଜରିମାନା ବି ଲାଗୁ କରିଛନ୍ତି ।
ଉଲ୍ଲେଖଯୋଗ୍ୟ, ୨୦୧୫ରେ ଭାରତୀୟ ତଟରକ୍ଷୀ ବାହିନୀ ଗୁଜରାଟ ତଟରେ ଏକ ବୋଟ୍ରୁ ପାକିସ୍ତାନୀ ନାଗରିକଙ୍କୁ ୨୩୨ କିଲୋଗ୍ରାମ ହେରୋଇନ ସହ ଗିରଫ କରିଥିଲା । ଏହାର ମୂଲ୍ୟ ୬.୯୬ କୋଟି ଟଙ୍କା ଥିଲା । ତଟରକ୍ଷୀ ବାହିନୀର ଜାହାଜ ‘ସଂଗ୍ରାମ’ର ତତ୍କାଳୀନ କମାଣ୍ଡିଙ୍ଗ ଅଧିକାରୀ ସ୍ୱତନ୍ତ୍ର ଅଦାଲତଙ୍କୁ ଘଟଣା ବାବଦରେ ଟିକିନିଖି ବଖାଣିଥିଲେ । ସେ କହିଥିଲେ କି ପାକିସ୍ତାନର କରାଚୀରୁ ଆସିଥିବା ‘ଅଲ୍ ୟାସିର’ ବୋଟ୍କୁ ଭାରତୀୟ ସମୁଦ୍ର ସୀମାରେ ଧରାଯାଇଥିଲା । ସେଥିରେ ଥିବା ପାକ୍ ନାଗରିକଙ୍କୁ ଗିରଫ କରାଯାଇଥିଲା । ସେମାନେ ହେଉଛନ୍ତି ଅଲୀବଖ୍ସା ସିନ୍ଧି, ମକ୍ସୁଦ ମାସିମ୍, ମହମ୍ମଦ ନାଥୋ, ମହମ୍ମଦ ଅହମ୍ମଦ ଇନାୟତ, ମହମ୍ମଦ ୟୁସୁଫ ଗଗୱାନି, ମହମ୍ମଦ ୟୁନୁସ ସିନ୍ଧି, ମହମ୍ମଦ ଗୁଲ୍ହସନ ସିନ୍ଧି ଏବଂ ଗୁଲ୍ହସନ ସିଦ୍ଦିକ ସିନ୍ଧି ।
