ମାଲକାନଗିରି,୦୩/୧୧: ମାଲକାନଗିରି ସୀମାନ୍ତ ଛତିଶଗଡ଼ର ସୁକମା ଜିଲ୍ଲାରେ ମାଓ ଆକ୍ରମଣ । ଆକ୍ରମଣର ଶିକାର ହେଲେ ଡ୍ୟୁଟିରେ ଥିବା ଦୁଇ ଜଣ ଡିଆରଜିର ଯବାନ କର୍ତମ ଦେବା ଓ ସୋଢି କୁନା । ଗୁରୁତର ଅବସ୍ଥାରେ ଯବାନ ଦ୍ୱୟଙ୍କୁ ରାୟପୁରକୁ ସ୍ଥାନାନ୍ତର କରାଯାଇଛି । ଏହି ଆକ୍ରମଣରେ ମାଓବାଦୀ ମାନେ ଯବାନଙ୍କ ବନ୍ଧୁକ ମଧ୍ୟ ଲୁଟି ନେଇଛନ୍ତି ।
ସୂଚନା ମୁତାବକ, ସୁକମା ଜିଲ୍ଲା ଜଗରକୋଣ୍ଡା ଅଞ୍ଚଳରେ ସାପ୍ତାହିକ ବଜାର ଚାଲିଥିଲା । ଏହି ସମୟରେ ମାଓବାଦୀ ମାନେ ଡ୍ୟୁଟିରେ ଥିବା ଦୁଇ ଜଣ ଡିଆରଜି ଯବାନଙ୍କ ଉପରେ ଅତର୍କିତ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ କର୍ତମ ଦେବା ଓ ସୋଢି କୁନା ଗୁରୁତର ଭାବେ ଆହତ ହୋଇଥିଲେ । ଏହି ଆକ୍ରମଣରେ ମାଓବାଦୀ ମାନେ ଯବାନଙ୍କ ବନ୍ଧୁକ ଲୁଟି ନେଇଥିଲେ । ଏନେଇ ସ୍ଥାନୀୟଲୋକେ ତୁରନ୍ତ ଅନ୍ୟ ପୋଲିସ କର୍ମଚାରୀଙ୍କୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଅନ୍ୟ ପୋଲିସ କର୍ମଚାରୀ ମାନେ ପହଞ୍ଚି ଦୁଇ ଯବାନଙ୍କୁ ଉଦ୍ଧାର କରି ପ୍ରଥମେ ଜାଗର କୋଣ୍ଡା ସ୍ୱାସ୍ଥ୍ୟ କେନ୍ଦ୍ରକୁ ନେଇ ପ୍ରାଥମିକ ଚିକିତ୍ସା ଯୋଗାଇ ଦେଇଥିଲେ । ପରେ ଉତ୍ତମ ଚିକିତ୍ସା ପାଇଁ ଦୁଇ ଯବାନଙ୍କୁ ହେଲିକ୍ୟାପ୍ଟର ଯୋଗେ ରାୟପୁରକୁ ସ୍ଥାନାନ୍ତର କରାଯାଇଥିଲା । ଏନେଇ ସୁକମା ଏସପି କିରଣ ଚୌହାନ ସୂଚନା ଦେଇଛନ୍ତି । ଅନ୍ୟପଟେ ଏହି ଘଟଣା ପରେ ସାପ୍ତାହିକ ବଜାରରେ ଆତଙ୍କ ଖେଳିଯାଇଛି ।
