ଭୁବନେଶ୍ୱର,୧୭/୧୦: ଓଡ଼ିଆ ଭାଷାରେ ସହଜ ଟାଇପିଂ ପାଇଁ ଆସିଲା ‘ଓଡ଼ିଆ ଲିପି’ । ଯାହା ଓଡ଼ିଆ ଭାଷା ପାଠ୍ୟ ରଚନା ଏବଂ ସମ୍ପାଦନାରେ ବିଶେଷ ସାହାଯ୍ୟ ହେବ । ଓଡ଼ିଶା ସରକାର ଓଡ଼ିଆରେ ଶାସନ ନିଷ୍ପତ୍ତି ନେବା ପରେ ଏବେ କମ୍ପ୍ୟୁଟରରେ ଓଡ଼ିଆ ଭାଷାର ବ୍ୟବହାରକୁ ସହଜ ଓ ସରଳ କରିବାକୁ ଯାଇ ଏଭଳି ପଦକ୍ଷେପ ଗ୍ରହଣ କରାଯାଇଛି । ଏହାକୁ ଦୃଷ୍ଟିରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନ ଓଡ଼ିଶା ସରକାରଙ୍କ ଓଡ଼ିଆ ଭର୍ଚୁଆଲ୍ ଏକାଡେମୀ ପକ୍ଷରୁ ଏହି ଟାଇପିଂ ଟୁଲ୍ ବା ଉପକରଣ ‘ଓଡ଼ିଆ ଲିପି’ର ଶୁଭାରମ୍ଭ କରାଯାଇଛି । ଏହାକୁ ବିକଶିତ କରିଛି ଭର୍ଚୁଆଲ୍ ଏକାଡେମୀ । ପ୍ରଥମତଃ ଏହା ୟୁନିକୋଡ୍ ଟାଇପିଂ ଉପକରଣ ଏବଂ ଓଡ଼ିଆ ବୈଷୟିକ ଜ୍ଞାନ କୌଶଳ ଅନୁକୂଳଯୁକ୍ତ । ଏହାଦ୍ୱାରା ଟାଇପିଂକୁ ସମ୍ପୂର୍ଣ୍ଣ ତ୍ରୁଟିମୁକ୍ତ କରିବାକୁ ଲକ୍ଷ୍ୟ ରଖାଯାଇଛି ।
ସୂଚନା ମୁତାବକ, ଅନେକ ଲୋକ ୮-ବିଟ୍ ଫଣ୍ଟ ବ୍ୟବହାର କରୁଛନ୍ତି । ଯାହା ଅନେକ ଡିଜିଟାଲ୍ ପ୍ଲାଟ୍ଫର୍ମ ଏବଂ ଅପରେଟିଂ ବ୍ୟବସ୍ଥାରେ କାର୍ଯ୍ୟ କରୁନାହିଁ । ମାତ୍ର ‘ଓଡ଼ିଆ ଲିପି’ ୟୁନିକୋଡ୍ ଫଣ୍ଟ୍ ବ୍ୟବହାର କରେ । ଯାହା ପ୍ରତି ଟାଇପ୍ରେ ସମାନ ଏବଂ ଠିକ୍ ଅକ୍ଷର ଦେଖାଇବ । ଯେହେତୁ ୟୁନିକୋଡ୍ ୱିଣ୍ଡୋଜ୍, ମ୍ୟାକ୍, ଆଇଓଏସ୍, ଲିନକ୍ସ ଏବଂ ଆଣ୍ଡ୍ରଏଡ୍ ଦ୍ୱାରା ସମର୍ଥିତ, ତେଣୁ ଏହା ଓଡ଼ିଆ ଭାଷାରେ ସୂଚନା ଆଦାନ ପ୍ରଦାନକୁ ଅତି ସହଜ କରିଥାଏ ବୋଲି ଏକାଡେମୀ ଅଧିକାରୀ ଜଣକ କହିଛନ୍ତି ।
୨୦୧୪ ମସିହାରେ ଷଷ୍ଠ ଭାରତୀୟ ଭାଷା ଭାବରେ ଓଡ଼ିଆ ଭାଷା ଶାସ୍ତ୍ରୀୟ ମାନ୍ୟତା ପାଇବା ସତ୍ତେ୍ୱ ବି ଏଯାଏ ଓଡ଼ିଆ ଭାଷାର କମ୍ପ୍ୟୁଟରୀକରଣ ସହଜ ହୋଇପାରିନି । ଓଡ଼ିଆ ଟାଇପିଂ ସପ୍ଟୱେର୍ ସମାଧାନରେ ୟୁନିକୋଡ୍ ସମ୍ପୂର୍ଣ୍ଣ ଅସମର୍ଥ । ବଡ଼ କଥା ହେଲା³ ବ୍ୟବହୃତ ଏହି ଟୁଲ୍ ଗୁଡ଼ିକ ଓଡ଼ିଆ ବର୍ଣ୍ଣମାଳାକୁ ସମ୍ପୂର୍ଣ୍ଣ ସମର୍ଥନ କରେ ନାହିଁ, ଫଳରେ ଠିକ୍ ଅକ୍ଷର ଏବଂ ଫର୍ମାଟିଂ ତ୍ରୁଟିର କାରଣ ହୋଇଥାଏ । ବର୍ତ୍ତମାନ ମାଇକ୍ରୋସଫ୍ଟର ଇଣ୍ଡିକ୍ ଭାଷା ଇନ୍ପୁଟ୍ ଟୁଲ୍ରେ ‘ଆକୃତି’ ଏବଂ ‘ଶ୍ରୀଲିପି’ ଟାଇପିଂ ଉପକରଣ ଅଛି । ଯାହା ଓଡ଼ିଆରୁ ଇଂରାଜୀକୁ ଅନୁବାଦ କରିବା ପାଇଁ ବ୍ୟବହୃତ ହେଉଛି । ଏଥିଲାଗି କେବଳ ‘କଳିଙ୍ଗ’ ନାଁରେ ଗୋଟିଏ ଫଣ୍ଟ୍ ରହିଛି ।
କିନ୍ତୁ ‘ଓଡ଼ିଆ ଲିପି’ ବିକଶିତ କରିଥିବା ପ୍ରସ୍ତୁତକାରୀମାନେ ୧୦ଟି ୟୁନିକୋଡ୍ ଫଣ୍ଟ୍ ଏବଂ ଏକ ମାନଚିତ୍ର କରିଛନ୍ତି । ଯେଉଁଥିରେ ‘ବର୍ଣ୍ଣବୋଧ’ରେ ଉପଲବ୍ଧ ସମସ୍ତ ଓଡ଼ିଆ ଅକ୍ଷର, ସଂଖ୍ୟା, ମାତ୍ରା, ଫଳା ଏବଂ ଯୁକ୍ତାକ୍ଷର ରହିଛି । ବ୍ୟବହାରକାରୀଙ୍କ ସୁବିଧା ଲାଗି ଟାଇପିଂ ଟୁଲ୍ ବା ଉପକରଣରେ ୪ଟି ଭିନ୍ନ କିବୋର୍ଡ- ଫୋନେଟିକ୍, ଟାଇପ୍ରାଇଟର୍, ଇନ୍ ସ୍କ୍ରିପ୍ଟ ଓ ଇଜି ରହିଛି । ଏହା ସହ ଟାଇପିଂ କଲାବେଳେ ପୂର୍ବ ପ୍ରସ୍ତୁତ କିଛି ଶବ୍ଦର ତାଲିକା ମଧ୍ୟ ଦେଖାଯିବ । ଯାହା ଟାଇପିଂ ବ୍ୟବସ୍ଥାକୁ ଅଧିକ ସହଜ କରିବ । ଫୋନେଟିକ୍ ଓ ସହଜ କିବୋଡ୍ର୍ ଗୁଡ଼ିକ ଇଂରାଜୀ ଫୋନେଟିକ୍ସ ସହିତ କି ଲେଆଉଟ୍ ଆଲାଇନ୍ କରିଛି । ଫଳରେ ବ୍ୟବହାରକାରୀ ଏହି ଅନୁକୂଳ ଡିଜାଇନ୍ ଓଡ଼ିଆ ଟାଇପ୍କୁ ଠିକଣା ଭାବେ ବ୍ୟବହାର କରିପାରିବେ । ‘ଓଡ଼ିଆ ଲିପି’କୁ ଓଡ଼ିଆ ଭର୍ଚୁଆଲ୍ ଏକାଡେମୀ ୱେବ୍ସାଇଟ୍ରୁ ମାଗଣାରେ ଡାଉନ୍ଲୋଡ୍ କରିପାରିବେ । ସେହିପରି ସାନ୍ତାଳୀ ଭାଷା ପାଇଁ ମଧ୍ୟ କିବୋର୍ଡ ଏବଂ ଫଣ୍ଟ୍ ବିକଶିତ କରାଯାଇଛି । ଡାଉନ୍ଲୋଡ୍ ବି ମାଗଣାରେ ହେଉଛି ।
