ଭୁବନେଶ୍ୱର,୨୦/୦୭: ରାଜ୍ୟରେ ପ୍ରସ୍ତୁତ ହେବ ବିପର୍ଯ୍ୟୟ ସହଣି ବିଦ୍ୟୁତ ଭିତ୍ତିଭୂମି । ଫଳରେ ବଡ଼ ବାତ୍ୟା ହେଉ କି ବନ୍ୟା ପରେ କଟିବନି ବିଜୁଳି । ବିଦ୍ୟୁତ ସରବରାହ ଅବ୍ୟାହତ ରହିବ । ଏ ନେଇ ରାଜ୍ୟ ସରକାର ବ୍ୟାପକ ଭାବେ ଯୋଜନା ପ୍ରସ୍ତୁତ କରିଛନ୍ତି । ବିପର୍ଯ୍ୟୟ ସହଣି ବିଦ୍ୟୁତ ଭିତ୍ତିଭୂମି ପାଇଁ ୯୭୫୬ କୋଟି ଖର୍ଚ୍ଚ କରିବାକୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛନ୍ତି । ସେଥିମଧ୍ୟରୁ ବିଦ୍ୟୁତ ବଣ୍ଟନ ବାବଦରେ ୬ହଜାର କୋଟି ଓ ପରିବହନ ବାବଦରେ ୩୭୫୬ କୋଟି ଖର୍ଚ୍ଚ କରିବାକୁ ଯୋଜନା ରହିଛି । ଏ ନେଇ ସାହାଯ୍ୟର ହାତ ବଢ଼ାଇବାକୁ କେନ୍ଦ୍ର ସରକାରଙ୍କୁ ନିବେଦନ କରାଯାଇଛି ।
ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନ୍ଡିଏମ୍ଏ) ଜାତୀୟ ବିପର୍ଯ୍ୟୟ ପରିଚାଳନା ପାଣ୍ଠିରୁ ସହାୟତା କରିବାକୁ ଅନୁରୋଧ କରାଯାଇଛି । ଏହି ପ୍ରସଙ୍ଗରେ ୨୦୨୫ ଡିସେମ୍ବର ୧୬ ତାରିଖରେ ଶକ୍ତି ବିଭାଗର ଦାୟିତ୍ୱରେ ଥିବା ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କୁ ଚିଠି ଲେଖିଥିଲେ । ପୁଣି ଚଳିତବର୍ଷ ଜୁନ ୧୬ ତାରିଖରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶ୍ରୀ ଶାହଙ୍କୁ ଚିଠି ଲେଖିଛନ୍ତି । ରାଜ୍ୟରେ ବିପର୍ଯ୍ୟୟ ସହଣି ବିଦ୍ୟୁତ ଭିତ୍ତିଭୂମି ପ୍ରସ୍ତୁତି ଦିଗରେ ଏନ୍ଡିଏମ୍ଏ ସହଯୋଗ କରିବାକୁ ଅନୁରୋଧ କରିଛନ୍ତି ।
ଅଧିକ ପଢ଼ନ୍ତୁ :- Weather Forecast: ଆଗକୁ ଆସୁଛି ବଡ଼ ବର୍ଷା, ୨୨ ତାରିଖରେ ଘୂର୍ଣ୍ଣିବଳୟ, ୨୩ରୁ ରାଜ୍ୟରେ ପ୍ରବଳ ଛେଚିବ
ମୁଖ୍ୟମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି ଯେ, ଭୌଗୋଳିକ ଦୃଷ୍ଟିକୋଣରୁ ଓଡ଼ିଶା ପ୍ରତିବର୍ଷ ବାତ୍ୟା ହେଉ କିମ୍ବା ବନ୍ୟାକୁ ମୁକାବିଲା କରୁଛି । ଗତ ୨୦ ବର୍ଷ ମଧ୍ୟରେ ୧୯୯୯ରେ ମହାବାତ୍ୟା ଓ ପରେ ଫାଇଲିନ୍, ହୁଡ୍ହୁଡ୍, ତିତ୍ଲି, ଫନି, ଅମ୍ଫନ ଓ ୟାସ୍ ଯୋଗୁଁ ଓଡ଼ିଶାରେ ବିଦ୍ୟୁତ ଭିତ୍ତିଭୂମିର ବ୍ୟାପକ କ୍ଷୟକ୍ଷତି ହୋଇଛି । ତେଣୁ ରାଜ୍ୟ ବିପର୍ଯ୍ୟୟ ସହଣି ବିଦ୍ୟୁତ ଭିତ୍ତିଭୂମି ପ୍ରସ୍ତୁତ କରିବାକୁ ଚାହୁଁଛି । ବାତ୍ୟା ହେବା ମାତ୍ରେ ରାଜ୍ୟରେ ଡାକ୍ତରଖାନାଠୁ ଆରମ୍ଭ କରି ବିଭିନ୍ନ ଜରୁରିକାଳୀନ ସୁବିଧା ମଧ୍ୟ ବାଧାପ୍ରାପ୍ତ ହେଉଛି । ତେଣୁ ଦୀର୍ଘମିଆଦି ଯୋଜନାରେ ବାତ୍ୟା ଓ ବନ୍ୟାକୁ ମୁକାବିଲା କରିବା ଭଳି ବିଦ୍ୟୁତ ଭିତ୍ତିଭୂମି ପ୍ରସ୍ତୁତ କରିବାକୁ ଯୋଜନା କରୁଛି । ପୂର୍ବରୁ ବିପର୍ଯ୍ୟୟ ମୁକାବିଲା ଭିତ୍ତିଭୂମି ପ୍ରସ୍ତୁତରେ ଓଡ଼ିଶାରେ ରେକର୍ଡ ରହିଛି । ତେଣୁ ଏ ଦିଗରେ କେନ୍ଦ୍ର ସହଯୋଗ କରିବାକୁ ମୁଖ୍ୟମନ୍ତ୍ରୀ ଅନୁରୋଧ କରିଛନ୍ତି ।
ଅପରପକ୍ଷେ ବିପର୍ଯ୍ୟୟ ସହଣି ବିଦ୍ୟୁତ ଭିତ୍ତିଭୂମି ପାଇଁ ବିଦ୍ୟୁତ ବଣ୍ଟନ ବ୍ୟବସ୍ଥାକୁ ପୋଲ୍ ଜରିଆରେ ନ କରି ଧୀରେ ଧୀରେ ଭୂତଳ କେବୁଲ୍ ଜରିଆରେ କରିବାକୁ ଯୋଜନା ପ୍ରସ୍ତୁତ ହେଉଛି । ଏ ବାବଦରେ ପ୍ରାଥମିକ ଭାବେ ଭୂତଳ କେବୁଲ ପାଇଁ ୧୩୬୫ କୋଟି ଓ ଏହା ସହ ସଂଯୋଗ ସବଷ୍ଟେସନ ପାଇଁ ୨୩୧୬ କୋଟି ଖର୍ଚ୍ଚ କରିବାକୁ ଯୋଜନା କରାଯାଇଛି । ଏବେ ରାଜ୍ୟର ସମସ୍ତ ୪ଟି ବିଦ୍ୟୁତ ବିତରଣ କମ୍ପାନୀ ଅଧୀନରେ ୩୭୦୮ କୋଟି ବ୍ୟୟରେ ଭୂତଳ କେବୁଲ ତାର ବିଛାଯିବାକୁ ଚୂଡ଼ାନ୍ତ ହୋଇଛି । ଯାହା ଦ୍ୱାରା ବାତ୍ୟା କିମ୍ୱା କାଳବୈଶାଖୀ ସମୟରେ ବିଦ୍ୟୁତ ସେବା ବାଧାପ୍ରାପ୍ତ ହେବ ନାହିଁ ।
ଓଡ଼ିଶା ବିଦ୍ୟୁତ ବିତରଣ କମ୍ପାନୀ ପାଇଁ ଏକ ସମଗ୍ର ସୁରକ୍ଷା ଡିପିଆର୍ ପ୍ରସ୍ତୁତ କରାଯାଉଛି । ବିପଜ୍ଜନକ ଖୋଲା, ତଳକୁ ଝୁଲୁଥିବା ତାର ସ୍ଥାନାନ୍ତର, ଖାଲି କଣ୍ଡକ୍ଟର୍ ସ୍ଥାନରେ ଇନସୁଲେଟେଡ୍ କଣ୍ଡକ୍ଟର(ଆବରଣ ଥିବା), ବିତରଣ ସବଷ୍ଟେସନ୍ ରେ ଫେନ୍ସିଂ (ତାର ଜାଲି) ସ୍ଥାପନ, ପାୱାର ସବଷ୍ଟେସନ ବାଉଣ୍ଡ୍ରି ୱାଲ୍ ଏବଂ ସୁରକ୍ଷା ପାଇଁ କ୍ରେଡେଲ୍/ ଗାର୍ଡ ତାର ବ୍ୟବସ୍ଥା କରାଯିବ ବୋଲି ସୂଚନା ମିଳିଛି । ବିଶେଷ କରି ପୃଥକ୍ ଭାବେ ୩୩ କେଭି ଭୂତଳ କେବୁଲ୍ ନେଟୱାର୍କ, ୩୩ କେଭି ଭୂତଳ କେବୁଲ୍ ନେଟୱାର୍କ, ଅଧିକ ଉଚ୍ଚସ୍ଥାନରେ ସବଷ୍ଟେସନ କରିବା ଭଳି ଯୋଜନା କରାଯାଇଛି ।
