ନୂଆଦିଲ୍ଲୀ,୦୩/୦୭: ଓଲା, ଉବର, ରାପିଡୋ ଏବଂ ଇନ୍ଡ୍ରାଇଭ୍ରେ ଯାତ୍ରା କରୁଥିଲେ ଆଗକୁ ଅଧିକ ଭଡ଼ା ଦେବାକୁ ପଡ଼ିପାରେ । ସରକାର ଏଥିପାଇଁ ଏକ ନୂଆ ନିୟମ ଆଣିଛନ୍ତି । ଏବେ ଏହି କମ୍ପାନିଗୁଡ଼ିକ ଭିଡ଼ ସମୟରେ ମୂଳ ଭଡ଼ାଠାରୁ ଦୁଇ ଗୁଣା ପର୍ଯ୍ୟନ୍ତ ଚାର୍ଜ କରିପାରିବେ । ପୂର୍ବରୁ ଏଥିପାଇଁ ଲିମିଟ୍ ରହିଥିଲା ୧.୫ ଗୁଣା । ସଡ଼କ ପରିବହନ ଏବଂ ରାଜପଥ ମନ୍ତ୍ରାଳୟ ଏ ନେଇ ଏକ ନିୟମ ଜାରି କରିଛି । ଏହା ଅନୁସାରେ, ନନ୍-ପିକ୍ ଆୱାର୍ରେ ଭଡ଼ା ମୂଳ ଭଡ଼ାର ଅନ୍ୟୁନ ୫୦% ହେବା ଦରକାର । ନିୟମକୁ ୩ ମାସ ମଧ୍ୟରେ କାର୍ଯ୍ୟକାରୀ କରିବା ପାଇଁ ସରକାର ସମସ୍ତ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ।
ମନ୍ତ୍ରାଳୟ ଅନୁସାରେ, ଏହାର ଲକ୍ଷ୍ୟ ହେଉଛି ଯେ, ଅଧିକ ଚାହିଦା ଥିବା ସମୟରେ ଯାତ୍ରୀଙ୍କୁ ଉଚିତ ମୂଲ୍ୟରେ ରାଇଡ୍ ମିଳୁ ଏବଂ କମ୍ପାନିଗୁଡ଼ିକ ମନଇଚ୍ଛା ରିହାତି ନ ଦିଅନ୍ତୁ । ଭିନ୍ନ ଭିନ୍ନ ପ୍ରକାର ଗାଡ଼ି ଯଥା ଟ୍ୟାକ୍ସି, ଅଟୋରିକ୍ସା ଏବଂ ବାଇକ୍ ଟ୍ୟାକ୍ସି ପାଇଁ ମୂଳଭଡ଼ା ରାଜ୍ୟ ସରକାର ସ୍ଥିର କରିବେ । ଯଦି କୌଣସି ରାଜ୍ୟ ଏ ଯାଏ ମୂଳଭଡ଼ା ନିର୍ଦ୍ଧାରଣ କରିନାହାନ୍ତି, ତେବେ ରାଇଡ୍ ହେଲିଙ୍ଗ୍ କମ୍ପାନିକୁ ରାଜ୍ୟ ସରକାରଙ୍କୁ ନିଜର ଭଡ଼ା ଜଣାଇବାକୁ ପଡ଼ିବ । ସେହିଭଳି ରାଇଡ୍ ବାତିଲ ମାମଲାରେ ବି ନିୟମକୁ କଡ଼ାକଡ଼ି କରାଯାଇଛି । ଯଦି ଡ୍ରାଇଭର ଆପ୍ରେ ରାଇଡ୍ ରିକ୍ୱେଷ୍ଟ ଗ୍ରହଣ କରିବା ପରେ ବିନା କୌଣସି ଠୋସ୍ କାରଣରେ ଏହାକୁ ବାତିଲ କରନ୍ତି, ତେବେ ତାଙ୍କ ଉପରେ ଭଡ଼ାର ୧୦% ଜରିମାନା ଲାଗିବ, ଯାହା ସର୍ବାଧିକ ୧୦୦ ଟଙ୍କା ପର୍ଯ୍ୟନ୍ତ ଯାଇପାରିବ । ଏହି ଜରିମାନାକୁ ଡ୍ରାଇଭର ଏବଂ ରାଇଡ୍-ହେଲିଂ କମ୍ପାନି ଉଭୟଙ୍କୁ ଏକତ୍ର ଭାବେ ଦେବାକୁ ପଡ଼ିବ ।
ନୂଆ ନିୟମ ଅନୁସାରେ, ରାଇଡ୍-ହେଲିଂ କମ୍ପାନିଗୁଡ଼ିକ ସହ କାର୍ଯ୍ୟ କରୁଥିବା ସମସ୍ତ ଡ୍ରାଇଭରଙ୍କ ପାଇଁ ବୀମା ସୁବିଧାକୁ ଅନିବାର୍ଯ୍ୟ କରାଯାଇଛି । ପ୍ରତ୍ୟେକ ଡ୍ରାଇଭରଙ୍କୁ ୫ ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମା ଏବଂ ୧୦ ଲକ୍ଷ ଟଙ୍କାର ଟର୍ମ ବୀମା ମିଳିବା ଦରକାର । ମନ୍ତ୍ରାଳୟ ସ୍ପଷ୍ଟ କରିଛି ଯେ, ଡ୍ରାଇଭର ଯାତ୍ରୀଙ୍କୁ ନେବା ପାଇଁ ଯିବା ପୂର୍ବରୁ ଖାଲି ଗାଡ଼ିର ଦେୟ ଲାଗିବ ନାହିଁ । ପିକ୍ଅପ୍ ଦୂରତ୍ୱ ୩ କିଲୋମିଟରରୁ କମ୍ ଥିଲେ ଏ ନିୟମ ଲାଗୁ ହେବ । ଯଦି ପିକ୍ଅପ୍ ଦୂରତ୍ୱ ୩ କିଲୋମିଟରରୁ କମ୍ ଥିବ ସେତେବେଳେ ଯାତ୍ରୀଙ୍କ ଘରଠାରୁ ହିଁ ଭଡ଼ା ଲାଗୁ କରାଯିବ ।
