ନୂଆଦିଲ୍ଲୀ: ଆୟୁଷ୍ମାନ ଭାରତ ଯୋଜନା ଲାଗୁ କରିନଥିବାରୁ ପଶ୍ଚିମବଙ୍ଗ ଏବଂ ଦିଲ୍ଲୀର ଆପ୍ ସରକାରଙ୍କ ଉପରେ ବର୍ଷିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ରାଜେନୖତିକ ଫାଇଦା ଲାଗି ଲୋକଙ୍କ ହିତକୁ ଅଣଦେଖା କରିବା ଅମାନବୀୟ ବୋଲି କହିଛନ୍ତି ମୋଦୀ । ବୟସ୍କ ଲୋକମାନଙ୍କ ପାଇଁ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଲାଗୁ ହୋଇଛି । ୭୦ ବର୍ଷରୁ ଅଧିକ ବୟସର ଲୋକମାନଙ୍କୁ ୫ ଲକ୍ଷ ପର୍ଯ୍ୟନ୍ତ ସ୍ବାସ୍ଥ୍ୟ ସହାୟତା ଦେବାକୁ ଘୋଷଣା କରିଛନ୍ତି କେନ୍ଦ୍ର ସରକାର । ପ୍ରାୟ ୬ କୋଟି ବରିଷ୍ଠ ନାଗରିକଙ୍କୁ ସୁବିଧା ଦେବା ଲାଗି ଏହି ଯୋଜନା ଲାଗୁ ହୋଇଛି ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଦିନ ଥିଲା ଲୋକେ ଚିକିତ୍ସା ପାଇଁ ନିଜ ଜମି, ଗହଣା ବିକ୍ରି କରିବାକୁ ବାଧ୍ୟ ହେଉଥିଲେ । ବଡ଼ ରୋଗର ଚିକିତ୍ସା ଖର୍ଚ୍ଚ ଉଠାଇବାକୁ ଅନେକ ଅସମର୍ଥ ହେଉଥିଲେ । ଗରିବ ଭାଇ ଓ ଭଉଣୀଙ୍କ ଏଭଳି ଅସୁବିଧାକୁ ମୁଁ ଅଣଦେଖା କରିପାରିଲି ନାହିଁ । ଏହାକୁ ନଜରରେ ରଖି ଆୟୁଷ୍ମାନ ଭାରତ ଯୋଜନା ଜନ୍ମ ନେଲା ବୋଲି ମୋଦୀ କହିଛନ୍ତି ।
ଏହା ସହ ପ୍ରଧାନମନ୍ତ୍ରୀ ମୋଦୀ ପଶ୍ଚିମବଙ୍ଗ ଏବଂ ଦିଲ୍ଲୀର ବରିଷ୍ଠ ନାଗରିକଙ୍କୁ କ୍ଷମା ମାଗିଛନ୍ତି । ସେ କହିଛନ୍ତି, ‘ମୁଁ ଜାଣିଛି ଆପଣମାନେ ଅସୁବିଧାରେ ଅଛନ୍ତି । କିନ୍ତୁ ମୁଁ ସାହାଯ୍ୟ କରିବାକୁ ଅସମର୍ଥ । କାରଣ ଦିଲ୍ଲୀ ଏବଂ ପଶ୍ଚିମବଙ୍ଗ ସରକାର ଏହି ଯୋଜନା ଲାଗୁ କରୁନାହାନ୍ତି ।’
ରାଜନୈତିକ ଫାଇଦା ଲାଗି ଲୋକଙ୍କୁ ହଇରାଣ କରିବା ମାନବିକତା ନୁହେଁ ବୋଲି ମୋଦୀ କହିଛନ୍ତି । ଆୟୁଷ୍ମାନ ଭାରତ ଯୋଜନା ଲାଗି କେନ୍ଦ୍ର ଏବଂ ରାଜ୍ୟର ଭାଗୀଦାରିତା ୬୦:୪୦। ପଶ୍ଚିମବଙ୍ଗ ଏବଂ ଦିଲ୍ଲୀ ସରକାରଙ୍କର ନିଜର ସ୍ବାସ୍ଥ୍ୟ ବୀମା ଯୋଜନା ରହିଛି । ତେଣୁ ଦୁଇ ରାଜ୍ୟ ସରକାର ନିଜ ଯୋଜନା କେନ୍ଦ୍ର ଯୋଜନାଠାରୁ ଭଲ ବୋଲି ଦାବି କରିବା ସହ ଆୟୁଷ୍ମାନ ଭାରତ ଲାଗୁ କରୁନାହାଁନ୍ତି ।
