ଲସ୍ ଆଞ୍ଜେଲ୍ସ: ଆମେରିକାର ଲସ୍ ଆଞ୍ଜେଲ୍ସରେ ଜଣେ ୩୫ ବର୍ଷୀୟ ଶିଖ୍ ବ୍ୟକ୍ତି ଗୁରପ୍ରୀତ ସିଂଙ୍କୁ ପୋଲିସ ଗୁଳି ମାରି ହତ୍ୟା କରିଥିବା ଘଟଣା ସାମ୍ନାକୁ ଆସିଛି। ଏହି ଘଟଣା ଗତ ଜୁଲାଇ ୧୩ ତାରିଖ ସକାଳେ ଘଟିଥିବା ବେଳେ ଲସ୍ ଆଞ୍ଜେଲ୍ସ ପୋଲିସ ବିଭାଗ (LAPD) ନିକଟରେ ଏହାର ବଡିକ୍ୟାମ ଫୁଟେଜ୍ ପ୍ରକାଶ କରିଛି। ଯାହା ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ଭାଇରାଲ ହେବାରେ ଲାଗିଛି।

ଘଟଣା ଅନୁଯାୟୀ, ଗୁରପ୍ରୀତ ସିଂ ଲସ୍ ଆଞ୍ଜେଲ୍ସର କ୍ରିପ୍ଟୋ.କମ୍ ଆରେନା ନିକଟସ୍ଥ ଫିଗୁଏରୋଆ ଷ୍ଟ୍ରିଟ ଏବଂ ଅଲିମ୍ପିକ ବୁଲେଭାର୍ଡର ଜନଗହଳିପୂର୍ଣ୍ଣ ଛକରେ ଗଟକା (ଏକ ପାରମ୍ପରିକ ଶିଖ୍ ଯୁଦ୍ଧକଳା) ପ୍ରଦର୍ଶନ କରୁଥିଲେ। ସେ ଏକ ଦୁଇ ଫୁଟ ଲମ୍ବା ମାଚେଟେ (ଖଣ୍ଡା) ଧରି ରାସ୍ତା ମଝିରେ ଅସ୍ତ୍ର ଚଳାଉଥିବା ଦେଖାଯାଇଥିଲା। ସ୍ଥାନୀୟ ଲୋକଙ୍କ ଅଭିଯୋଗ ପରେ ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ଅସ୍ତ୍ର ଫୋପାଡ଼ିବାକୁ ବାରମ୍ବାର ନିର୍ଦ୍ଦେଶ ଦେଇଥିଲେ। କିନ୍ତୁ ଗୁରପ୍ରୀତ ନିର୍ଦ୍ଦେଶ ମାନି ନଥିବା ଏବଂ ପୋଲିସଙ୍କ ଆଡ଼କୁ ମାଚେଟେ ଧରି ଦୌଡ଼ିଥିବା ଅଭିଯୋଗ ହୋଇଛି।

ପୋଲିସର ବଡିକ୍ୟାମ ଫୁଟେଜ୍ ଅନୁଯାୟୀ, ଗୁରପ୍ରୀତ ନୀଳ ପଗଡ଼ି, ବେଷ୍ଟ ଏବଂ ସର୍ଟସ୍ ପରିଧାନ କରି ରାସ୍ତାରେ ଗଟକା ପ୍ରଦର୍ଶନ କରୁଥିଲେ। ସେ ନିଜ ଅସ୍ତ୍ରରେ ନିଜ ଜିଭ କାଟିଥିବା ମଧ୍ୟ ଦେଖାଯାଇଥିଲା। ପୋଲିସ ଅଧିକାରୀମାନେ ଦାବି କରିଛନ୍ତି ଯେ ଗୁରପ୍ରୀତ ନିଜ ଗାଡ଼ିକୁ ରାସ୍ତା ମଝିରେ ଛାଡ଼ି ଅସ୍ତ୍ର ଚଳାଉଥିଲେ ଏବଂ ପୋଲିସ ଗାଡ଼ିକୁ ଧକ୍କା ଦେଇଥିଲେ। ଶେଷରେ ସେ ପୋଲିସଙ୍କୁ ଆକ୍ରମଣ କରିବାକୁ ଉଦ୍ୟମ କରିଥିବାରୁ ପୋଲିସ ଗୁଳି ଚଳାଇଥିଲେ। ଗୁରପ୍ରୀତଙ୍କୁ ଗୁଳିବିଦ୍ଧ ଅବସ୍ଥାରେ ହସ୍ପିଟାଲ ନିଆଯାଇଥିଲା, କିନ୍ତୁ ସେଠାରେ ତାଙ୍କର ମୃତ୍ୟୁ ହୋଇଥିଲା।

ଏହି ଘଟଣାକୁ ନେଇ ଶିଖ୍ ସମୁଦାୟରେ ତୀବ୍ର ଅସନ୍ତୋଷ ଦେଖାଦେଇଛି। ଆମେରିକାରେ ରହୁଥିବା ଅନେକ ଭାରତୀୟ ପୋଲିସର ଏହି କାର୍ଯ୍ୟକୁ ସାଂସ୍କୃତିକ ଅଜଣାତା ଏବଂ ଅତ୍ୟଧିକ ବଳ ପ୍ରୟୋଗ ବୋଲି ଅଭିଯୋଗ କରିଛନ୍ତି। ଗଟକା ହେଉଛି ଏକ ପାରମ୍ପରିକ ଶିଖ୍ ମାର୍ଶାଲ ଆର୍ଟ(ଯୁଦ୍ଧ କୌଶଳ), ଯାହା ପ୍ରାୟତଃ ସମସ୍ତ ଶିଖ୍ ଧାର୍ମିକ ଉତ୍ସବ ଏବଂ ଶୋଭାଯାତ୍ରାରେ ପ୍ରଦର୍ଶିତ ହୋଇଥାଏ। ଏଥିରେ ଖଣ୍ଡା, ଢାଲ ଏବଂ ଲାଠି ଭଳି ପାରମ୍ପରିକ ଅସ୍ତ୍ରଶସ୍ତ୍ର ବ୍ୟବହାର ହୁଏ।

ସୋସିଆଲ ମିଡିଆରେ ଅନେକ ପୋଷ୍ଟରେ ଅନେକ ୟୁଜର ପ୍ରଶ୍ନ ଉଠାଇଛନ୍ତି ଯେ ଗୁରପ୍ରୀତଙ୍କୁ ଜୀବନ୍ତ ଅବସ୍ଥାରେ ଗିରଫ କରାଯାଇ ପାରିଥାନ୍ତା କି? ତେବେ ଏହି ଘଟଣାର ତଦନ୍ତ ଜାରି ରହିଛି, ଏବଂ ପୋଲିସ ଏହାକୁ ଆତ୍ମରକ୍ଷା କାର୍ଯ୍ୟ ବୋଲି ଦାବି କରୁଛି।

ଏହି ଘଟଣା ଶିଖ୍ ସମୁଦାୟ ଏବଂ ପୋଲିସ କାର୍ଯ୍ୟଶୈଳୀ ଉପରେ ନୂଆ ବିତର୍କ ଆରମ୍ଭ କରିଛି। ଆମେରିକା ସମେତ ଅନେକ ଦେଶରେ ଭାରତୀୟ ମାନଙ୍କ ପାଇଁ ଲୋକମାନଙ୍କ ମନରେ ପ୍ରତିଶୋଧାତ୍ମକ ଭାବନା ବୃଦ୍ଧି ପାଇବାରେ ଲାଗିଛି। ତେବେ ଅଧିକ ତଥ୍ୟ ପାଇଁ ତଦନ୍ତର ଫଳାଫଳ ଅସିବାକୁ ଅପେକ୍ଷା କରାଯାଉଛି।