ମାଣତ୍ରୀ,୩/୬ : ଶାଳ ମଞ୍ଜିକୁ ପରିବାରର ୪ -୫ସଦସ୍ୟ ଛୁଆ ପିଲା ମିଶି ଦିନ ଯାକ ପ୍ରାୟ ୧୦ରୁ ୧୫କେଜି ସଂଗ୍ରହ କରିପାରନ୍ତି । ଯାହାର ମୁଲ୍ୟ କେଜି ପିଛା ମାତ୍ର ୭ଟଙ୍କା, ଏମିତି ହିସାବ କରିବା ଯଦି ଗୋଟେ ପରିବାର ଦିନକୁ ମାତ୍ର ୭୦ଟଙ୍କାରୁ ୧୦୫ଟଙ୍କା ଲେଖାଏଁ ମିଳୁଛି, କିନ୍ତୁ ପରିଶ୍ରମ କରୁଛନ୍ତି ୫ଜଣ । ଲଘୁ ଜଙ୍ଗଲଜାତ ଦ୍ରବ୍ୟର ଏହା ହେଉଛି ମୂଲ୍ୟ । ସରକାରୀ ସଂସ୍ଥା ତ କେହି କିଣୁ ନାହାନ୍ତି । ବେପାରୀମାନେ ନିଜ ଇଛାରେ ଦର ନିର୍ଦ୍ଧାରଣ କରି ତାକୁ ନେଉଛନ୍ତି । ମୟୂରଭଞ୍ଜର ବନବାସୀ ଓ ଆଦିବାସୀମାନେ ଏମିତି ଶୋଷଣର ଶିକାର ହୋଇ ଚାଲିଛନ୍ତି । 

୨୦୧୪ରେ କେନ୍ଦ୍ର ସରକାର ଲଘୁ ଜଙ୍ଗଲଜାତ ଦ୍ରବ୍ୟର କ୍ରୟ ପାଇଁ ରାଜ୍ୟ ସରକାର ଘୋଷଣା କରିଥିଲେ। ମାତ୍ର ବଡ଼ ସାହି, ବେତନଟୀ ଅଞ୍ଚଳରେ ଲଘୁ ଜଙ୍ଗଲଜାତ ଦ୍ରବ୍ୟ କିଣୁଥିବା ସରକାରୀ ସଂସ୍ଥାର କୌଣସି ଅଫିସ୍ ନାହିଁ। ଏବେ ଚାର ମଞ୍ଜି, ଶାଳ ମଞ୍ଜି, କଚଡ଼ା ମଞ୍ଜି, ମହୁଲ ଫୁଲ, କୁସୁମ ମଞ୍ଜି, ବଉଳ ମଞ୍ଜି ଉତ୍ପାଦନର ସମୟ ଅଟେ । ଶାଳ ମଞ୍ଜିରେ ତୈଳ ଅଂଶ ରହିଥିବାରୁ ବନସ୍ପତି ପ୍ରସ୍ତୁତ ପାଇଁ ଏହାର ଯଥେଷ୍ଟ ଚାହିଦା ରହିଛି । ବାହାର ରାଜ୍ୟରେ ଶାଳ ମଞ୍ଜିର ଭଲ ଦର ରହିଛି। ହେଲେ ଗାଁରେ ଗୋଟିଏ ପରିବାରର ୫ଜଣ ମିଶି ଶାଳ ମଞ୍ଜି ଗୋଟାଇ ସେଗୁଡିକୁ ଛଡ଼ାଇ ସଫା କରି ପ୍ରସ୍ତୁତ କରିବାବେଳକୁ ଏହା ୧୦କେଜି ଶାଳ ମଞ୍ଜିରୁ ୭/୮କେଜି ମଞ୍ଜି ହୋଇଥାଏ । ଆଉ ବେପାରୀମାନେ ଏହାର ମୂଲ୍ୟ ମାତ୍ର କିଲୋ ପ୍ରତି ୭ଟଙ୍କାରେ କିଣି ନେଇଛନ୍ତି ବୋଲି ପ୍ରକାଶ କରିଛନ୍ତି ଲୋକମାନେ । 

ସେମାନେ ସକାଳୁ ସକାଳୁ ବାହାରି ଯାଇ ଦିନ ତମାମ୍ ଖରା ଓ ଗୁଳୁ ଗୁଳିରେ ମଞ୍ଜି ସଂଗ୍ରହ କରିଥାନ୍ତି । ଏହା ପରେ ମଞ୍ଜିକୁ ପୋଡ଼ି ପିଚୁ ରାସ୍ତାରେ ସଫା କରିବା ପରେ ସେମାନେ ପ୍ରାୟ ଦିନକୁ ୧୦ରୁ ୧୫କେଜି ପ୍ରସ୍ତୁତ କରିପାରନ୍ତି। ଏହାର ପ୍ରତିବଦଳରେ ଦିନକୁ ସେମାନେ ମାତ୍ର ୭୦ରୁ ୧୦୫ଟଙ୍କା ପାଆନ୍ତି । ସେହିଭଳି ପାଚିଲା ଟୁଲ ମଧ୍ୟରୁ ମଞ୍ଜିକୁ କାଢିବା ପରେ ସେ ଗୁଡ଼ିକୁ ଧୋଇ ଶୁଖାଇ ଥାଆନ୍ତି । ଶୁଖିବା ପରେ ସେ ଗୁଡ଼ିକୁ ପଥରରେ ଫଟାଇ ତା ମଧ୍ୟରେ ଥିବା ମଞ୍ଜିକୁ କାଢିଥାନ୍ତି । ଏହି ମଞ୍ଜି ସଂଗ୍ରହରେ ପରିବାରର ସମସ୍ତେ ସାମିଲ ହୋଇଥାନ୍ତି। ଏହି ମଞ୍ଜିରୁ ପ୍ରଚୁର ତେଲ ମିଳିଥାଏ I ଯାହାକୁ ଖାଦ୍ୟ ଦ୍ରବ୍ୟ ପ୍ରସ୍ତୁତଠାରୁ ଆରମ୍ଭ କରି ଦେହରେ ଲଗାଇବା ପର୍ଯ୍ୟନ୍ତ । ତେଣୁ ଲୋକମାନେ ଏହାକୁ ବିକ୍ରି ନ କରି ଟୁଲକୁ ପେଡ଼ିଆଣି ନିଜେ ବ୍ୟବହାର କରୁଛନ୍ତି । ଫଳରେ ସେମାନେ ସୁସ୍ଥ ରହିବା ସହ ବଜାରର ମିଶ୍ରିତ ତେଲ ବ୍ୟବହାରଠାରୁ ଦୂରେଇ ରୁହନ୍ତି ବୋଲି କରୁଣାକର ମହାନ୍ତ କହିଛନ୍ତି । ଏହି ତେଲ କୋଲକାତା ମାର୍କେଟରେ ବହୁ ଚଢ଼ା ଦରରେ ବିକ୍ରି ହେଉଛି ବୋଲି ବେପରିମାନେ କୁହନ୍ତି ।