ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ମତଦାନ ଜାରି ରହିଛି। ଏହି ସମୟରେ ଦ୍ୱିତୀୟ ପର୍ଯ୍ୟାୟ ପାଇଁ ଯୁଦ୍ଧ ଚାଲିଛି । ହେଲେ ଏହାରି ଭିତରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସମେତ ବହୁ ବିରୋଧୀଦଳ ନେତା ଜେଲରେ ଅଛନ୍ତି । ତାଙ୍କ ସମର୍ଥକଙ୍କ ମଧ୍ୟରେ ସବୁଠାରୁ ବଡ ପ୍ରଶ୍ନ ହେଉଛି ଯେ, ସେମାନେ କ’ଣ ଜେଲରୁ ଭୋଟ୍ ଦେଇ ପାରିବେ କି ? ଏହାର ଉତ୍ତର ଜାଣିବା, ହେଲେ ଏହା ପୂର୍ବରୁ ଆସନ୍ତୁ ଜାଣିବା କେଉଁ କେଉଁ ନେତାମାନେ ଜେଲରେ ଅଛନ୍ତି,ଯେଉଁ ମାନଙ୍କ ପାଇଁ ଚର୍ଚ୍ଚା ହେଉଛି । ଦିଲ୍ଲୀରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ, କ୍ୟାବିନେଟ ମନ୍ତ୍ରୀ ସତ୍ୟେନ୍ଦ୍ର ଜୈନ ଏବଂ ସେମାନଙ୍କ କିଛି ଘନିଷ୍ଠ ବ୍ୟକ୍ତିଙ୍କ ସମେତ ଅନେକ ନେତା ଜେଲରେ ଅଛନ୍ତି । ଅନ୍ୟପକ୍ଷରେ ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ ମଧ୍ୟ ଜେଲରେ ଅଛନ୍ତି ।
ଏଭଳି ପରିସ୍ଥିତିରେ ଏହି ସମସ୍ତ ନେତାଙ୍କୁ ନେଇ ଚର୍ଚ୍ଚା ଏବଂ ପ୍ରଶ୍ନ ଉଠୁଛି ଯେ, କ’ଣ ଏହି ନେତାମାନେ ମତଦାନ କରିପାରିବେ କି ? ହଁ...ଏହି ସମସ୍ତ ନେତାଙ୍କ ଉପରେ ଭୋଟ୍ ଦେବା ଉପରେ ନିୟମ ରହିଛି, ଯାହାକି ଯେକୌଣସି ସାଧାରଣ କଏଦୀଙ୍କ ପାଇଁ ସମାନ । ଭାରତରେ ଜେଲରେ ବନ୍ଦୀ ଥିବା କୌଣସି ନାଗରିକଙ୍କୁ ଭୋଟ୍ ଦେବାର ଅଧିକାର ନାହିଁ । ଏଥିପାଇଁ ଏକ ଉପଯୁକ୍ତ ନିୟମ ଅଛି ଏବଂ ଏହା କାହିଁକି ବୋଲି ଆଇନରେ ମଧ୍ୟ ବର୍ଣ୍ଣନା କରାଯାଇଛି ।
ଭାରତରେ ଜେଲରେ ବନ୍ଦୀ ଥିବା ଜଣେ ଅଭିଯୁକ୍ତଙ୍କୁ ଭୋଟ୍ ଦେବାର ଅଧିକାର ନାହିଁ । ପ୍ରତିନିଧୀତ୍ବ ଅଧିନିୟମ 1951 ର ଧାରା 62 (5) ଅନୁଯାୟୀ ଏହା ନିର୍ଦ୍ଧାରିତ କରାଯାଇଛି, ଯେଉଁଥିରେ ଦର୍ଶାଯାଇଛି ଯେ ନ୍ୟାୟିକ ହେପାଜତ କିମ୍ବା ଜେଲରେ ଥିବା କୌଣସି ବ୍ୟକ୍ତି ମତଦାନ କରିବାକୁ ଯୋଗ୍ୟ ହେବେ ନାହିଁ । ଏଥ୍ ସହ ପୋଲିସ୍ ହେପାଜତରେ ରଖାଯାଇଥିବା ଲୋକଙ୍କୁ ମଧ୍ୟ ଭୋଟ୍ ଦେବାକୁ ଅନୁମତି ଦିଆଯାଇ ନାହିଁ ।