ନୂଆଦିଲ୍ଲୀ: ପାକିସ୍ତାନର ସିନ୍ଧ ପ୍ରଦେଶରେ ସିନ୍ଧୁ ନଦୀରେ ନିର୍ମାଣ ହେଉଥିବା କେନାଲ ପ୍ରକଳ୍ପକୁ ନେଇ ତୀବ୍ର ବିରୋଧ ପ୍ରକାଶ ପାଇଛି। ଏହି ପ୍ରକଳ୍ପରେ ପାଞ୍ଜାବକୁ ଅଧିକ ଜଳ ଯୋଗାଯିବାର ଯୋଜନା ରହିଛି। ଯାହା ସିନ୍ଧରେ ଜଳ ଅଭାବକୁ ଆହୁରି ଗମ୍ଭୀର କରିବ ବୋଲି ସ୍ଥାନୀୟ ଲୋକେ ଆଶଙ୍କା ପ୍ରକାଶ କରି ବିରୋଧ ପ୍ରଦର୍ଶନ ଜାରି ରଖିଛନ୍ତି। ଗତ ମଙ୍ଗଳବାର ନୌଶାହାରୋ ଫେରୋଜଠାରେ ଏହି ବିରୋଧ ହିଂସାତ୍ମକ ରୂପ ନେଇଥିଲା। ଯେଉଁଠାରେ ପ୍ରଦର୍ଶନକାରୀମାନେ ସିନ୍ଧର ଗୃହ ମନ୍ତ୍ରୀ ଜିଆ ଲାନଜାରଙ୍କ ବାସଭବନରେ ନିଆଁ ଲଗାଇ ଦେଇଥିଲେ। ଏହି ଘଟଣାରେ ସୁରକ୍ଷା କର୍ମୀଙ୍କ ଦ୍ୱାରା ଦୁଇ ଜଣ ସାମାଜିକ କର୍ମୀଙ୍କୁ ଗୁଳି କରି ହତ୍ୟା କରାଯାଇଥିବା ବେଳେ ଏବଂ ଅନେକ ଆହତ ହୋଇଛନ୍ତି।

ସୂଚନା ଅନୁଯାୟୀ, ଗ୍ରୀନ୍ ପାକିସ୍ତାନ ଇନିସିଏଟିଭ୍ ଅଧୀନରେ ନିର୍ମିତ ଏହି ୩.୩ ବିଲିୟନ ଡଲାରର କେନାଲ ପ୍ରକଳ୍ପ ମୁଖ୍ୟତଃ ପାଞ୍ଜାବରେ ୪୮ ଲକ୍ଷ ଏକର ଜମିକୁ ସିଞ୍ଚନ ପାଇଁ ଉଦ୍ଦିଷ୍ଟ। କିନ୍ତୁ ସିନ୍ଧବାସୀ ଏହାକୁ ତୀବ୍ର ବିରୋଧ କରୁଛନ୍ତି। କାରଣ ଏହି କେନାଲ କାର୍ଯ୍ୟକ୍ଷମ ହେଲେ ସିନ୍ଧରେ ଜଳ ଅଭାବ ୫୦% ବୃଦ୍ଧି ପାଇବାର ସମ୍ଭାବନା ରହିଛି। ଯାହା କୃଷି ଓ ପାନୀୟ ଜଳ ଉପରେ ଗମ୍ଭୀର ପ୍ରଭାବ ପକାଇବ। ପ୍ରଦର୍ଶନକାରୀମାନେ ଏହି ପ୍ରକଳ୍ପକୁ "ସିନ୍ଧ ବିରୋଧୀ" ବୋଲି କହିବା ସହିତ ଏହାକୁ ବାତିଲ କରିବାକୁ ଦାବି କରୁଛନ୍ତି।

ପାକିସ୍ତାନ ସେନା ମୁଖ୍ୟ ଜେନେରାଲ ଆସିମ ମୁନିରଙ୍କ ଉପରେ ମଧ୍ୟ ଏହି ବିରୋଧରେ ଜଡ଼ିତ ଥିବାର ଅଭିଯୋଗ ହୋଇଛି। ସ୍ଥାନୀୟ ଲୋକେ ଏବଂ ରାଜନୈତିକ ନେତାମାନେ ଅଭିଯୋଗ କରୁଛନ୍ତି ଯେ ଏହି ପ୍ରକଳ୍ପ ସେନା ଦ୍ଵାରା ସମର୍ଥିତ। ଯାହା ସିନ୍ଧର ଆଗ୍ରହକୁ ଉପେକ୍ଷା କରି ପଞ୍ଜାବ ପ୍ରଦେଶକୁ ପରିପୃଷ୍ଟ କରିବାରେ ସହାୟକ ହେବ। ପ୍ରଦର୍ଶନକାରୀମାନେ ସେନା ଓ ସରକାର ବିରୁଦ୍ଧରେ ସ୍ଲୋଗାନ ମଧ୍ୟ ଦେଇଛନ୍ତି। ତେବେ ସବୁଠୁ ଆଶ୍ଚର୍ଯ୍ୟର କଥା ହେଉଛି ବିଭିନ୍ନ ସାମାଜିକ ଗଣମାଧ୍ୟମରେ ସିନ୍ଧବାସୀ ସିନ୍ଧର ସ୍ଵାଧୀନତା ଦାବି ନେଇ ସ୍ୱର ଉଠାଇଛନ୍ତି।

ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ ଏବଂ ପିପିପି ଅଧ୍ୟକ୍ଷ ବିଲାୱାଲ ଭୁଟ୍ଟୋ ଜାରଦାରୀ ଏକ ବୈଠକରେ ଘୋଷଣା କରିଛନ୍ତି ଯେ କାଉନସିଲ ଅଫ କମନ ଇଣ୍ଟରେଷ୍ଟ (CCI)ରେ ସମ୍ମତି ବିନା କେନାଲ ନିର୍ମାଣ ହେବ ନାହିଁ। କିନ୍ତୁ ପ୍ରଦର୍ଶନକାରୀମାନେ ଏକ ଆନୁଷ୍ଠାନିକ ବାତିଲ ଘୋଷଣା ଦାବି କରି ନିଜ ପ୍ରଦର୍ଶନ ଜାରି ରଖିଛନ୍ତି। ଏହି ଆନ୍ଦୋଲନ ଯୋଗୁଁ ସିନ୍ଧ ଓ ପଞ୍ଜାବ ମଧ୍ୟରେ ପରିବହନ ଗୁରୁତର ଭାବେ ପ୍ରଭାବିତ ହୋଇଛି। ଯାହା ପାକିସ୍ତାନର ଅର୍ଥନୀତି ଉପରେ ନକାରାତ୍ମକ ପ୍ରଭାବ ପକାଇଛି। ଯାହାଫଳରେ ପାକିସ୍ତାନର ଅନେକ ପ୍ରାନ୍ତରେ ଲୋକମାନଙ୍କ ପାଖରେ ଜରୁରି ବ୍ୟବହାର୍ଯ୍ୟ ସାମଗ୍ରୀ ପହଞ୍ଚି ପାରିନାହିଁ। ଏଥିପାଇଁ ବିଭିନ୍ନ ଅଞ୍ଚଳରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଦର ଆକାଶ ଛୁଆଁ ହୋଇଛି। 

ଏହି ଘଟଣା ପାକିସ୍ତାନରେ ସେନା ଓ ସରକାର ମଧ୍ୟରେ ବିଭେଦ ଏବଂ ସିନ୍ଧରେ ଅସନ୍ତୋଷର ଚିତ୍ର ଉପସ୍ଥାପନ କରିଛି। ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ଏହି ସଙ୍କଟ ଆଗକୁ ଆହୁରି ଗମ୍ଭୀର ହୋଇପାରେ। ଯଦି ସରକାର ସ୍ଥାନୀୟ ଲୋକଙ୍କ ଆଶଙ୍କାକୁ ସମାଧାନ ନ କରନ୍ତି ତେବେ ଏହି ଆନ୍ଦୋଳନ ଆଗକୁ ଆହୁରି ଉଗ୍ର ରୁପ ଧାରଣ କରିବ।