ନୂଆଦିଲ୍ଲୀ: ଛତିଶଗଡ଼ର ନାରାୟଣପୁର ଜିଲ୍ଲାର ଅବୁଝମାଡ଼ ଜଙ୍ଗଲରେ ବୁଧବାର ସୁରକ୍ଷାକର୍ମୀଙ୍କ ସହ ଏକ ବଡ଼ଧରଣର ଏନକାଉଣ୍ଟରରେ ନିଷିଦ୍ଧ ସିପିଆଇ (ମାଓବାଦୀ)ର ଶୀର୍ଷ ନେତା ନମ୍ବାଲା କେଶବ ରାଓ ଓରଫ ବସବରାଜୁ, ସମେତ ପ୍ରାୟ ୩୦ ଜଣ ନକ୍ସଲ ନିହତ ହୋଇଛନ୍ତି। ଏହି ଅପରେସନକୁ କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହା ନକ୍ସଲବାଦ ବିରୋଧରେ "ଐତିହାସିକ ସଫଳତା" ବୋଲି ଅଭିହିତ କରିଛନ୍ତି।
ନମ୍ବାଲା କେଶବ ରାଓ ଓରଫ ବସବରାଜୁ ସିପିଆଇ (ମାଓବାଦୀ)ର ଜେନେରାଲ ସେକ୍ରେଟାରୀ ଥିଲେ ଏବଂ ୧୯୭୦ ଦଶକରୁ ନକ୍ସଲ ଆନ୍ଦୋଳନରେ ସାମିଲ ଥିଲେ। ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲ୍ଲାର ଜିୟାନ୍ନାପେଟ ଗାଁରୁ ଆସିଥିବା ରାଓ ଓ୍ଵାରଙ୍ଗଲରେ ଥିବା ରିଜିଓନାଲ ଇଞ୍ଜିନିୟରିଂ କଲେଜରୁ ଇଞ୍ଜିନିୟରିଂ ଡିଗ୍ରୀ ହାସଲ କରିଥିଲେ। ୧୯୮୦ ମସିହାରେ ଛାତ୍ର ସଂଘ ଆନ୍ଦୋଳନରେ ଗିରଫ ହେବା ପରେ ସେ ସଂପୂର୍ଣ୍ଣ ଭାବେ ନକ୍ସଲ ଆନ୍ଦୋଳନରେ ଯୋଗ ଦେଇଥିଲେ। ସେ ଜଙ୍ଗଲ ଯୁଦ୍ଧ, ଆଇଇଡି ନିର୍ମାଣ ଏବଂ ଗରିଲା ଯୁଦ୍ଧରେ ନିପୁଣ ଥିଲେ। ୨୦୧୮ରେ ସେ ଗଣପତି (ମୁପ୍ପାଲା ଲକ୍ଷ୍ମଣ ରାଓ)ଙ୍କ ସ୍ଥାନରେ ସିପିଆଇ (ମାଓବାଦୀ)ର ମୁଖ୍ୟ ହୋଇଥିଲେ। ସେ ୨୦୧୦ ମସିହାରେ ଛତିଶଗଡ଼ର ଦାନ୍ତେଓ୍ଵାଡ଼ା ହୋଇଥିବା ଭୟଙ୍କର ମାଓ ଆକ୍ରମଣର ମାଷ୍ଟରମାଇଣ୍ଡ ଥିଲେ ବୋଲି ସୂଚନା ରହିଛି। ଏହି ଆକ୍ରମଣରେ ମୋଟ ୭୬ ଜଣ ସିଆରପିଏଫ ଯବାନ ଶହୀଦ ହୋଇଥିଲେ। ବସବରାଜୁ ଏତେ ବଡ ନାଁ ଥିଲା ଯେ ସରକାର ମୁଣ୍ଡଜାମିନି ପାଇଁ ୧.୫ କୋଟି ଟଙ୍କା ଘୋଷଣା କରିଥିଲେ। ତଥାପି ଦୀର୍ଘ ଚାରି ଦଶନ୍ଧିରୁ ଅଧିକ ସମୟ ପୁଲିସ ଆଖିରେ ଧୂଳି ଦେଇ ନିଜ ମାଓ କାର୍ଯ୍ୟକଳାପ ଜାରି ରଖିଥିଲେ ବସବରାଜୁ।
ଏହି ଅପରେସନ ନାରାୟଣପୁର, ବିଜାପୁର, ଦାନ୍ତେଓ୍ଵାଡ଼ା ଏବଂ କୋଣ୍ଡାଗାଁ ଜିଲ୍ଲାରୁ ଡିଆରଜି (ଡିଷ୍ଟ୍ରିକ୍ଟ ରିଜର୍ଭ ଗାର୍ଡ) ଦଳମାନଙ୍କୁ ନେଇ ଆରମ୍ଭ ହୋଇଥିଲା। ମାଓବାଦୀଙ୍କ ସେଣ୍ଟ୍ରାଲ କମିଟି ଏବଂ ପୋଲିଟବ୍ୟୁରୋ ସଦସ୍ୟଙ୍କ ଉପସ୍ଥିତି ସମ୍ପର୍କରେ ଗୁପ୍ତଚର ସୂଚନା ଆଧାରରେ ଏହି ଅପରେସନ ଆରମ୍ଭ ହୋଇଥିଲା। ଅବୁଝମାଡ଼ର ଘନ ଜଙ୍ଗଲ ଏବଂ ଇନ୍ଦ୍ରାବତୀ ଜାତୀୟ ଉଦ୍ୟାନ ଅଞ୍ଚଳରେ ଏହି ଏନକାଉଣ୍ଟର ହୋଇଥିଲା। ଏହି ଅପରେସନରେ ଜଣେ ଡିଆରଜି ଯବାନ ସହିଦ ହୋଇଥିବା ବେଳେ କିଛି ଅନ୍ୟ ଯବାନ ଆହତ ହୋଇଛନ୍ତି। ଘଟଣାସ୍ଥଳରୁ ବହୁ ପରିମାଣର ଅସ୍ତ୍ରଶସ୍ତ୍ର ମଧ୍ୟ ଜବତ କରାଯାଇଛି।
କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହା ଏହି ଅପରେସନକୁ ପ୍ରଶଂସା କରି କହିଛନ୍ତି ଯେ "ନକ୍ସଲବାଦ ବିରୋଧରେ ଭାରତର ତିନି ଦଶନ୍ଧିର ଲଢ଼େଇରେ ପ୍ରଥମ ଥର ପାଇଁ ଜେନେରାଲ ସେକ୍ରେଟାରୀ ସ୍ତରର ନେତାଙ୍କୁ ଟାର୍ଗେଟ କରାଯାଇଛି" ବୋଲି କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଏହି ସଫଳତା ପାଇଁ ସୁରକ୍ଷାକର୍ମୀଙ୍କୁ ପ୍ରଶଂସା କରିଛନ୍ତି ଏବଂ ୨୦୨୬ ମାର୍ଚ୍ଚ ୩୧ ସୁଦ୍ଧା ସମଗ୍ର ଦେଶରୁ ନକ୍ସଲବାଦକୁ ନିର୍ମୂଳ କରିବାକୁ ସରକାର ପ୍ରତିଶ୍ରୁତିବଦ୍ଧ ବୋଲି କହିଛନ୍ତି।
ସୁରକ୍ଷା ଅଧିକାରୀଙ୍କ ମତରେ, ନମ୍ବାଲା କେଶବ ରାଓଙ୍କ ମୃତ୍ୟୁ ସିପିଆଇ (ମାଓବାଦୀ) ପାଇଁ ଏକ ବଡ଼ ଆଘାତ ସୃଷ୍ଟି କରିପାରେ। ତାଙ୍କ ଅନୁପସ୍ଥିତି ନକ୍ସଲମାନଙ୍କ ଯୋଗାଯୋଗ ଏବଂ ନେତୃତ୍ୱ ଶୃଙ୍ଖଳା ସ୍ୱଳ୍ପ ଅବଧି ପାଇଁ ବାଧାପ୍ରାପ୍ତ ହୋଇପାରେ। ୨୦୨୫ ମସିହାରେ ଛତିଶଗଡ଼ରେ ୨୦୦ରୁ ଅଧିକ ନକ୍ସଲ ନିହତ ହୋଇଛନ୍ତି। ଯାହା ସରକାରଙ୍କ ନକ୍ସଲ ବିରୋଧୀ ଅଭିଯାନର ତୀବ୍ରତାକୁ ଦର୍ଶାଇଛି। ଏହି ଏନକାଉଣ୍ଟର ନକ୍ସଲବାଦ ବିରୋଧରେ ସୁରକ୍ଷାକର୍ମୀଙ୍କ ଏକ ଗୁରୁତ୍ୱପୂର୍ଣ୍ଣ ସଫଳତା ଭାବେ ବିବେଚିତ ହୋଇଛି।
