ନୟାଗଡ଼,୨୭/୦୯: ନୟାଗଡ଼ ଜିଲ୍ଲା ରଣପୁର ତହସିଲ ଅଧୀନ ରଣପୁର ଗଡ଼ରେ ଥିବା କୋଟି କୋଟି ଟଙ୍କାର ସରକାରୀ ଜମିକୁ କେତେକ ମାଫିଆ ତହସିଲ କର୍ମଚାରୀଙ୍କୁ ହାତ କରି ସେମାନଙ୍କ ନାମରେ ରେକର୍ଡ କରି ନେଇଥିଲେ । ରେକର୍ଡଭୁକ୍ତ ଏହି ଜମିରେ ଅଣଜଳସେଚିତ ଓ ଘରବାରି ରହିଥିଲା । ଯାହାର ମୂଲ୍ୟ ପ୍ରାୟ ୫କୋଟି ଟଙ୍କାରୁ ଅଧିକ ହେବ । ଏ ସମ୍ପର୍କରେ ‘ପ୍ରମେୟ’ରେ ଗତ ୪ତାରିଖରେ ଏକ ଅନୁସନ୍ଧାନମୂଳକ ରିପୋର୍ଟ ପ୍ରକାଶ ପାଇଥିଲା । ଖବର ପ୍ରକାଶ ପରେ ତହସିଲଦାର ଉକ୍ତ ମ୍ୟୁଟେସନ୍ କେଶକୁ ପୁନର୍ବାର ବିଚାର କରିବାକୁ ଉପଜିଲ୍ଲାପାଳଙ୍କ ନିକଟକୁ ପଠାଇ ଥିଲେ । ଉପଜିଲ୍ଲାପାଳ ଏହାର ତଦନ୍ତ କରି ହଡ଼ପ ସରକାରୀ ଜମିକୁ ଆଜି ସରକାରୀ ଖାତାକୁ ଫେରାଇ ଆଣିଛନ୍ତି। ଯାହାକି ଖତିୟାନର କ୍ରମିକ ନମ୍ବର ୧୪୮୨ ରହିଛି ।
ତେବେ ଉପଜିଲ୍ଲାପାଳ ମ୍ୟୁଟେସନ କେସ୍ ନଂ ୩୩/୨୫ ତା ୨୦ା୯ା୨୦୨୫କୁ ଖାରଜ କରି ପ୍ଲଟ ନଂ ୨୩୬୩ରେ ୧ ଏକର ୭୨ ଡିସିମିଲ ଯାହାକି ଅଣଜଳସେଚିତ, ପ୍ଲଟ ନଂ ୨୩୬/୪ରେ ୨ଡିସିମିଲି ଘରବାରି ଓ ପ୍ଲଟ ନଂ ୨୩୬୬ରେ ୨୧ ଡିସିମିଲି ଘରବାରି ଯାହାକି ସମୁଦାୟ ୧ ଏକର ୯୫ ଡିସିମିଲି ଜାଗାକୁ ସରକାରୀ ଖାତାକୁ ନେବାକୁ ରଣପୁର ତହସିଲଦାରଙ୍କୁ ନିର୍ଦ୍ଦେଶ ଦେଇଛନ୍ତି । ଏ ସମ୍ପର୍କରେ ରଣପୁର ତହସିଲଦାର ଆର୍ଯ୍ୟ କୁମାର ଦମନଙ୍କୁ ପଚାରିବାରେ ଉକ୍ତ ମ୍ୟୁଟେସନ୍ କେଶକୁ ଖାରଜ କରାଯାଇ ସମସ୍ତ ଜମି ସରକାରଙ୍କ ଖାତାକୁ ଫେରିଥିବା ପ୍ରକାଶ କରିଛନ୍ତି।
