ଭାପୁର,୦୩/୧୧: ମହାନଦୀରୁ ଏକ ସାତଫୁଟ ଲମ୍ବର ମୃତ କୁମ୍ଭୀର ଉଦ୍ଧାର ହୋଇଛି । ନୟାଗଡ଼ ଜିଲ୍ଲା ଭାପୁର ବ୍ଲକ ଅନ୍ତର୍ଗତ ପଦ୍ମାବତୀ ନିକଟସ୍ଥ ମହାନଦୀରୁ କିଛି ମତ୍ସ୍ୟଜୀବୀ ମାଛ ଧରିବାକୁ ଯାଇଥିବା ବେଳେ କୁମ୍ଭୀରର ମୃତଦେହକୁ ଉଦ୍ଧାର କରିଛନ୍ତି ।
ରବିବାର ସକାଳୁ କିଛି ମତ୍ସ୍ୟଜୀବୀ ମହାନଦୀକୁ ମାଛ ଧରିବାକୁ ଯିବାବେଳେ ହନୁମନ୍ତପ୍ରସାଦ ଓ ପଦ୍ମାବତୀ ମଝି ମହାନଦୀ କୂଳରେ ଏକ କୁମ୍ଭୀର ଦେଖି ବନବିଭାଗକୁ ଜଣାଇଥିଲେ । ଭାପୁର ବନବିଭାଗ ଅଧିକାରୀ ବନମାଳୀ ରାଉତ ଓ ବନ କର୍ମଚାରୀ ଘଟଣାସ୍ଥଳରେ ପହଞ୍ଚି କୁମ୍ଭୀରଟି ମରି ଭାସୁଥିବା ଦେଖିବାକୁ ପାଇଥିଲେ । ଏହା ଏକ ଅଣ୍ଡିରା ବଉଳା କୁମ୍ଭୀର ଓ ଏହାର ଲମ୍ବ ସାତଫୁଟ ହେବ ବୋଲି ସୂଚନା ମିଳିଛି । ଭାପୁର ଭିଏଏସ ଜ୍ୟୋତିର୍ମୟୀ ପାତ୍ର, ଏଲଆଇ ଲକ୍ଷ୍ମୀକାନ୍ତ ସାହୁ ପହଞ୍ଚି କୁମ୍ଭୀର ବ୍ୟବଚ୍ଛେଦ ପରେ ନଦୀ କୂଳରେ ପୋତି ଦେଇଥିଲେ । ତେବେ ଏହି କୁମ୍ଭୀର କେଉଁଠୁ ଏବଂ କିପରି ଆସିଲା, ଏ ନେଇ ତଦନ୍ତ ଚାଲୁ ରହିଥିବା ବନବିଭାଗ ଅଧିକାରୀ ସୂଚନା ଦେଇଛନ୍ତି ।
