ଯଦି ଆପଣ ଆପଣଙ୍କ ଉପର ପେଟରେ ହଠାତ୍ ତୀବ୍ର ଯନ୍ତ୍ରଣା ଅନୁଭବ କରୁଛନ୍ତି ଯାହା କିଛି ସମୟ ପରେ କମିଯାଉଛି, ତେବେ ଏହା ପିତ୍ତକୋଷରେ ଷ୍ଟୋନ୍ର ଲକ୍ଷଣ ହୋଇପାରେ। ଏହି ସମସ୍ୟା ମହିଳାମାନଙ୍କଠାରେ ଅଧିକ ଦେଖାଯାଏ ଏବଂ ପ୍ରାୟତଃ ବିଳମ୍ବରେ ଜଣାପଡ଼ିଥାଏ। ପିତ୍ତକୋଷ ଷ୍ଟୋନ୍ ହେଉଛି ଛୋଟ କଠିନ କଣିକା ଯାହା ପିତ୍ତକୋଷରେ ଗଠିତ ହୁଏ। ଏଗୁଡ଼ିକ କୋଲେଷ୍ଟ୍ରଲ ଏବଂ ପିତ୍ତରୁ ଗଠିତ। ଯେତେବେଳେ ଏଗୁଡ଼ିକ ପିତ୍ତନଳୀକୁ ଅବରୋଧ କରନ୍ତି, ସେତେବେଳେ ଏଗୁଡ଼ିକ ପେଟରେ ତୀବ୍ର ଯନ୍ତ୍ରଣା ସୃଷ୍ଟି କରନ୍ତି ଯାହା ପିଠି କିମ୍ବା କାନ୍ଧରେ ମଧ୍ୟ ହୋଇପାରେ । ପ୍ରାରମ୍ଭରେ, କୌଣସି ଲକ୍ଷଣ ଦେଖା ଦେଇନଥାଏ। ତଥାପି, ଷ୍ଟୋନ୍ ବଢ଼ିବା ସହିତ, ତେଲିଆ ଖାଦ୍ୟ ଖାଇବା ପରେ ଯନ୍ତ୍ରଣା ସହିତ ବାନ୍ତି ହୋଇପାରେ।
ଏହି ସମସ୍ୟା ବିଶେଷକରି ମହିଳା, ୪୦ ବର୍ଷରୁ ଅଧିକ ବୟସ୍କ ବ୍ୟକ୍ତି ଏବଂ ମେଦବହୁଳ ଲୋକଙ୍କଠାରେ ସାଧାରଣ। ଦ୍ରୁତ ଓଜନ ହ୍ରାସ କିମ୍ବା ବାରମ୍ବାର ଗର୍ଭଧାରଣ ମଧ୍ୟ ଏହି ବିପଦକୁ ବୃଦ୍ଧି କରେ। ଏହି ସମସ୍ୟା ଗୁରୁତର ହେଲେ, ଏହାକୁ ଆକ୍ୟୁଟ୍ କୋଲେସିଷ୍ଟାଇଟିସ୍ କୁହାଯାଏ। ଏହି ଅବସ୍ଥାରେ ପିତ୍ତକୋଷ ସମ୍ପୂର୍ଣ୍ଣ ଭାବରେ ଅବରୋଧିତ ହୋଇଯାଏ ଏବଂ ରୋଗୀ ଜ୍ୱର, ଥଣ୍ଡା ଏବଂ ବାନ୍ତି ଭଳି ଲକ୍ଷଣ ଅନୁଭବ କରନ୍ତି। ଏପରି ପରିସ୍ଥିତିରେ, ତୁରନ୍ତ ଡାକ୍ତରଙ୍କ ସହିତ ପରାମର୍ଶ କରିବା ଗୁରୁତ୍ୱପୂର୍ଣ୍ଣ।
ଯଦି ଯନ୍ତ୍ରଣା ସାମାନ୍ୟ ଥାଏ, ତେବେ ଔଷଧ ଏବଂ ଖାଦ୍ୟପେୟ ସଂଶୋଧନ ଦ୍ୱାରା ଉପଶମ ମିଳିପାରେ। ତଥାପି, ଯଦି ଯନ୍ତ୍ରଣା ଜାରି ରହେ, ତେବେ ଡାକ୍ତରମାନେ ଲାପାରୋସ୍କୋପି ସାହାଯ୍ୟରେ ପିତ୍ତକୋଷ କାଢିବାକୁ ପରାମର୍ଶ ଦେଇପାରନ୍ତି। ପିତ୍ତକୋଷରେ ଷ୍ଟୋନ୍ ହେବାକୁ ରୋକିବା ପାଇଁ ଛଣା ବା ଡିପ୍ ପ୍ରାଏଡ୍ ଖାଦ୍ୟ କମ୍ ଖାଆନ୍ତୁ, ଧୀରେ ଧୀରେ ଓଜନ ହ୍ରାସ କରନ୍ତୁ ଏବଂ ପ୍ରତିଦିନ ହାଲୁକା ବ୍ୟାୟାମ କରନ୍ତୁ। ଶରୀରରେ ପିତ୍ତର ସନ୍ତୁଳନ ବଜାୟ ରଖିବା ପାଇଁ ପ୍ରଚୁର ପାଣି ପିଇବା ମଧ୍ୟ ଅତ୍ୟନ୍ତ ଜରୁରୀ। ସର୍ବୋତ୍ତମ ଉପାୟ ହେଉଛି ବର୍ଷକୁ ଥରେ ପେଟର ଅଲ୍ଟ୍ରାସାଉଣ୍ଡ କରାଇବା । ଯାହା ଦ୍ଵାରା ପିତ୍ତକୋଷରେ ଷ୍ଟୋନ୍ ଭଳି ସମସ୍ୟା ଚିହ୍ନଟ ହୋଇପାରିବ ଏବଂ ଚିକିତ୍ସା ସହଜ ହୋଇପାରିବ।
