ଭୁବନେଶ୍ବର,୨୮/୧୧ : ଭିଜିଲାନ୍ସ ଜାଲରେ ପୂର୍ବତନ ପିଇଓ ବିନାୟକ ନାୟକ । ୧୨.୮୭ ଲକ୍ଷ ଟଙ୍କା ସରକାରୀ ଅର୍ଥ ଆତ୍ମସାତ ଘଟଣାରେ ଭିଜିଲାନ୍ସ ପକ୍ଷରୁ ତାଙ୍କୁ ଗିରଫ କରାଯାଇଛି । ବିନାୟକ କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଅନ୍ତର୍ଗତ କୁଏରିମାଣ୍ଡୁ ପଞ୍ଚାୟତ (ଜିପି)ର ପୂର୍ବତନ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ)।
ସୂଚନା ଅନୁସାରେ, ସେ ୧୨.୮୭ ଲକ୍ଷ ଟଙ୍କା ସରକାରୀ ଅର୍ଥ ଆତ୍ମସାତ କରିଥିବା ଅଭିଯୋଗ ହୋଇଛି । ଏହି ପାଣ୍ଠି ଜିପିର ଏସଏଫସି ପାଣ୍ଠି(ରାଜ୍ୟ ଆର୍ଥିକ କମିଶନ ପାଣ୍ଠି)ରୁ ଆସିଥିଲା ଏବଂ ଫେବୃଆରୀ ଓ ମାର୍ଚ୍ଚ ୨୦୨୫ମଧ୍ୟରେ କୌଣସି ଉନ୍ନୟନମୂଳକ କାର୍ଯ୍ୟ ନ କରି ଏହି ଅପବ୍ୟବହାର ଘଟିଥିଲା। ଅଭିଯୁକ୍ତକୁ ଫୁଲବାଣୀର ସ୍ୱତନ୍ତ୍ର ବିଚାରପତି, ଭିଜିଲାନ୍ସ କୋର୍ଟକୁ ପଠାଯାଇଛି । ମାମଲାର ଅଧିକ ତଦନ୍ତ ଜାରି ରହିଛି ।
