ନୂଆଦିଲ୍ଲୀ,୨୨/୦୫: ଭୁଷୁଡ଼ି ପଡ଼ିଥିବା ଅର୍ଥବ୍ୟବସ୍ଥାକୁ ସମ୍ଭାଳିବା ପାଇଁ ପାକିସ୍ତାନ ଅନ୍ତରାଷ୍ଟ୍ରୀୟ ବ୍ୟାଙ୍କ୍ଗୁଡ଼ିକରୁ ୪.୯ ବିଲିୟନ ଡଲାର(ପାଖାପାଖି ୪୧,୦୦୦ କୋଟି ଟଙ୍କା)ର ଋଣ ନେବାକୁ ଯୋଜନା କରୁଛି । ଚଳିତ ମାସ ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍)ରୁ ୧ ବିଲିୟନ ଡଲାର(୧୨,୦୦୦ କୋଟି ଟଙ୍କା)ର ଋଣ ମଞ୍ଜୁର ବାଦ୍ ଏହି ଋଣ ନେବାକୁ ଯୋଜନା କରିଛି ପାକ୍ ।
ଏହି ଋଣ ରାଶିର ବ୍ୟବହାର ବିତ୍ତୀୟ ଆବଶ୍ୟକତାକୁ ପୂରଣ କରିବା ଏବଂ ବିଦେଶୀ ମୁଦ୍ରା ଭଣ୍ଡାରକୁ ବଢ଼ାଇବା ପାଇଁ ନିଆଯିବ । ଋଣ ପାଇଁ ପାକିସ୍ତାନ ୪ ବଡ଼ ଅନ୍ତରାଷ୍ଟ୍ରୀୟ ବ୍ୟାଙ୍କଗୁଡ଼ିକ ସହ ଆଲୋଚନ କରୁଛି । ପାକିସ୍ତାନ ଚୀନ୍ର ଆଇସିବିସି ବ୍ୟାଙ୍କ୍ରୁ ୧.୧ ବିଲିୟନ ଡଲାର ଏବଂ ଷ୍ଟାଣ୍ଡାର୍ଡ ଚାର୍ଟାର୍ଡ ଏବଂ ଦୁବାଇ ଇସ୍ଲାମିକ୍ ବ୍ୟାଙ୍କରୁ ୫୦ କୋଟି ଡଲାର ଲେଖାଏଁ ଋଣ ପାଇଁ କଥାବାର୍ତ୍ତା କରୁଛି ।
ଏହାସହିତ ଏସିଆନ୍ ଡେଭଲପ୍ମେଣ୍ଟ ବ୍ୟାଙ୍କ(ଏଡିବି)ରୁ ବି ୫୦ କୋଟି ଡଲାର ପାଇଁ ଗ୍ୟାରେଣ୍ଟି ମାଗୁଛି ପାକିସ୍ତାନ । ୨୦୨୪-୨୫ ଆର୍ଥିକବର୍ଷ ପାଇଁ ପାକ୍ ଏହାର ଆର୍ଥିକ ବିକାଶ ଲକ୍ଷ ୩.୬% ରଖିଥିଲା । କିନ୍ତୁ ବିକାଶ ହାର ୨.୬୮% ହିଁ ରହିପାରିଛି ।
ପାକିସ୍ତାନ ଗଣମାଧ୍ୟମ ସୂଚନା ଅନୁସାରେ, ସେଠାକାର ସରକାର ୨.୬୪ ବିଲିୟନ ଡଲାର(୨୨,୦୦୦ କୋଟି ଟଙ୍କା)ର ସ୍ୱଳ୍ପମିଆଦୀ ଋଣ ନେବେ, ଯାହା ଉପରେ ୭ରୁ୮% ସୁଧ ଦେବାକୁ ପଡ଼ିବ । ଏହାବ୍ୟତୀତ ସରକାର ୨.୨୭ ବିଲିୟନ ଡଲାର(୧୮,୯୦୦ କୋଟି ଟଙ୍କା)ର ଦୀର୍ଘମିଆଦୀ ଋଣ ନେବାକୁ ଯୋଜନା କରିଛି ।
ଏହାପୂର୍ବରୁ ଆଇଏମ୍ଏଫ୍ ପହଲ୍ଗାମ ଆତଙ୍କବାଦ ହମ୍ଲା ପରେ ଭାରତ-ପାକିସ୍ତାନ ମଧ୍ୟରେ ବଢ଼ିଥିବା ବିବାଦକୁ ବେଲ୍ଆଉଟ୍ ପ୍ରୋଗ୍ରାମ ପାଇଁ ବିପଦ ବୋଲି ଦର୍ଶାଇଥିଲା । ଏହାସହିତ ପରବର୍ତ୍ତୀ କିସ୍ତି ଋଣ ରାଶି ଜାରି କରିବା ପାଇଁ ପାକିସ୍ତାନ ଉପରେ ୧୧ ନୂଆ ସର୍ତ୍ତ ଲଗାଇଥିଲା । ଏବେ ଋଣ ପାଇଁ ପାକିସ୍ତାନ ଉପରେ ମୋଟ ସର୍ତ୍ତ ୫୦ରେ ପହଞ୍ଚିଛି ।
ବେଲ୍ଆଉଟ୍ ପ୍ରୋଗ୍ରାମର ପ୍ରଥମ ସମୀକ୍ଷା ବୈଠକରେ ଆଇଏମ୍ଏଫ୍ କହିଥିଲା ଯେ, ଯଦି ଭାରତ ଏବଂ ପାକିସ୍ତାନ ମଧ୍ୟରେ ବିବାଦ ବଢ଼େ ତେବେ ପାକିସ୍ତାନର ପ୍ରତିରକ୍ଷା ବଜେଟ୍ ଋଣ କ୍ଷେତ୍ରରେ ଚାପ ପାଲଟିପାରେ । ଋଣ ରାଶିକୁ ଏହି ଦେଶ ଦୁରୂପଯୋଗ କରିପାରେ ବୋଲି ଆଇଏମ୍ଏଫ୍ ଆଶଙ୍କା କରୁଛି । ଋଣ ଟଙ୍କାରେ ପାକିସ୍ତାନ ଏହାର ପ୍ରତିରକ୍ଷା ବଜେଟ୍ ବଢ଼ାଇବାକୁ ଚାହେଁ ।
