ଭୁବନେଶ୍ବ,୦୮/୦୩: ନାରୀ ସ୍ରଷ୍ଟାଙ୍କର ଏକ ଚମତ୍କାର ସୃଷ୍ଟି । ତାଙ୍କର ଏକ ଅବର୍ଣ୍ଣନୀୟ ସୃଜନଶୀଳତା । ନାରୀ ବିନା ସୃଷ୍ଟିର ପ୍ରତିଟି ଦିଗ ଯେପରି ଅସମ୍ପୂର୍ଣ୍ଣ । ନାରୀ କେବେ ମା'ର ପଣତ କାନି ତ କେବେ ଭାଇ ହାତର ରାକ୍ଷୀ । ସେହିପରି ଆଣେ ଜଣେ ନାରୀଙ୍କ କଥା କହୁଛୁ ଯିଏ ଜାତୀୟ ଖେଳାଳିରୁ ପାଲଟିଛନ୍ତି ସଫଳ ଚାଷୀ । ଦିନେ ମାଟିରେ ଲଟପଟ ହୋଇ ଜାତୀୟ ସ୍ତରୀୟ କବାଡ଼ିରେ ଓଡ଼ିଶା ପାଇଁ ଗୌରବ ଆଣୁଥିଲେ । ଆଜି ସେହି ମାଟିରେ ଲଟପଟ ହୋଇ କୃଷି କ୍ଷେତ୍ରରେ ଆଣିଛନ୍ତି ବିପ୍ଲବ । ସ୍ୱାମୀଙ୍କ ସହ କାନ୍ଧରେ କାନ୍ଧ ମିଳାଇ ଆଗେଇ ନେଇଛନ୍ତି ନିଜର ଅନନ୍ୟ କୃଷି ସଂସାର । ଓଡ଼ିଶାର ଜଣେ ପ୍ରତିଭାବାନ୍ କବାଡ଼ି ତାରକା ଭାବେ ପରିଚୟ ହାସଲ କରିଥିବା ଆଠଗଡ଼ ଇଚ୍ଛାପୁର ଗ୍ରାମର ଅପୂର୍ବମଣି ରାଉତଙ୍କ ନାଁ ପଛରେ ଏବେ ଯୋଡ଼ି ହୋଇଯାଇଛି ଜଣେ ସଫଳ ଚାଷୀର ପରିଚୟ ।
ଅପୂର୍ବମଣିଙ୍କ ଘରେ କବାଡ଼ି ଖେଳରେ ସେ ଜିତିଥିବା ଟ୍ରଫି ସହ ଏବେ ଶୋଭା ପାଉଛି ଜିଲ୍ଲା ପ୍ରଶାସନ ଦେଇଥିବା ସଫଳ ଚାଷୀର ମାନପତ୍ର । ସାରା ବିଶ୍ୱ ଶନିବାର ‘ଅନ୍ତର୍ଜାତୀୟ ମହିଳା ଦିବସ’ ପାଳନ କରୁଥିବା ବେଳେ ଆଠଗଡ଼ର ସର୍ବଗୁଣସଂପନ୍ନା ଅପୂର୍ବମଣି ସାରା ସମାଜ ପାଇଁ ସାଜିଛନ୍ତି ପ୍ରେରଣା । ଭୁବନେଶ୍ୱରର ମଣିଚରଣ ରାଉତ ଓ ଜାନକୀ ରାଉତଙ୍କ କନ୍ୟା ଅପୂର୍ବମଣିଙ୍କର ଛୋଟବେଳୁ ଖେଳକୁଦ ପ୍ରତି ଥିଲା ଆଗ୍ରହ । ବରମୁଣ୍ଡା ସିଆର୍ପିଏଫ୍ ସ୍କୁଲ୍ରେ ପାଠ ପଢୁଥିବା ବେଳେ କବାଡ଼ି ଖେଳିବା ଆରମ୍ଭ କରିଥିଲେ । ୨୦୦୯ ମସିହାରେ କିଶୋର କ୍ଲବ୍ରୁ କବାଡ଼ି ପ୍ରତିଯୋଗିତାରେ ଓହ୍ଲାଇବା ପରେ ଖୋର୍ଦ୍ଧା ଜିଲ୍ଲା ଦଳକୁ ପ୍ରତିନିଧିତ୍ୱ କରିବାର ସୁଯୋଗ ପାଇଥିଲେ । ପ୍ରଦର୍ଶନ ଭିତ୍ତିରେ ସେହି ବର୍ଷ ଜାତୀୟ ସବ୍ଜୁନିୟର କବାଡ଼ି ଚାମ୍ପିଅନ୍ସିପ୍କୁ ଯାଇଥିଲେ । ସେବେଠାରୁ କବାଡ଼ିରେ ଆଗକୁ ଆଗକୁ ମାଡ଼ି ଚାଲିଥିଲେ ଅପୂର୍ବମଣି । ଜୁନିୟର ଓ ସିନିୟର ବର୍ଗରେ ଓଡ଼ିଶା ଦଳକୁ ପ୍ରତିନିଧିତ୍ୱ କରିବା ସହିତ ଲଗାତାର ୪ ବର୍ଷ ସର୍ବଭାରତୀୟ ବିଶ୍ୱବିଦ୍ୟାଳୟ ସ୍ତରୀୟ କବାଡ଼ି ପ୍ରତିଯୋଗିତାରେ ସାମିଲ ହେବାର ସୁଯୋଗ ପାଇଥିଲେ । ଶାରୀରିକ ଶିକ୍ଷା ପାଠ୍ୟକ୍ରମରେ ମାଷ୍ଟର୍ ଡିଗ୍ରୀ କରିବା ପରେ ତିଗିରିଆ ପିଇଟି କଲେଜରେ ତାଙ୍କୁ ନିଯୁକ୍ତି ମଧ୍ୟ ମିଳିଗଲା ।
୨୦୧୮ ମସିହାରେ କବାଡ଼ି ଖେଳାଳି ଅସିତ ପ୍ରଧାନଙ୍କ ସହ ତାଙ୍କର ବିବାହ ହୋଇଥିଲା । ଅସିତ ଏକ ଘରୋଇ କମ୍ପାନୀରେ ଚାକିରି ଛାଡ଼ି ଗାଁରେ ଚାଷ କାର୍ଯ୍ୟ ନୂଆ ନୂଆ ଆରମ୍ଭ କରୁଥାନ୍ତି । ବାହାଘରର ୬ ମାସ ଭିତରେ ଅପୂର୍ବମଣି ଚାକିରି ସହିତ ସ୍ୱାମୀଙ୍କ ବୃତ୍ତିରେ ନିଜକୁ ସାମିଲ୍ କରିଥିଲେ । କଲେଜ ସମୟ ବାଦ୍ ସେ ଚାଷ କାର୍ଯ୍ୟ ସଂପର୍କିତ ବୈଷୟିକ ଶିକ୍ଷା ହାସଲ କରିଥିଲେ । ଫଳରେ ସ୍ୱାମୀଙ୍କ ସହ ମିଶି ସେ ବୈଷୟିକ ଜ୍ଞାନକୌଶଳର ସହାୟତାରେ ବେଶ୍ କମ୍ ଦିନରେ କୃଷି କ୍ଷେତ୍ରରେ ଆଖିଦୃଶିଆ ପରିବର୍ତ୍ତନ ଆଣିପାରିଛନ୍ତି । ଆଠଗଡ଼ ଇଚ୍ଛାପୁରରେ ଅସିତଙ୍କର ପ୍ରାୟ ୫ ଏକରରୁ ଅଧିକ ଜମି ରହିଛି । ଏଠାରେ ଧାନ ଚାଷ ସହିତ ବର୍ଷ ତମାମ୍ ପର୍ଯ୍ୟାୟ କ୍ରମେ ବହୁ ପନିପରିବା ଚାଷ କରାଯାଏ । ବିନ୍, କାକୁଡି, ବାଇଗଣ, କୋବି ଭଳି ବହୁ ପନିପରିବା ଚାଷ କରି ବଜାରକୁ ଚାଲାଣ କରନ୍ତି ଅପୂର୍ବମଣି । କୁକୁଡ଼ା ଓ ଧଳା ଘୁଷୁରୀ ଫାର୍ମ ବି ରହିଛି । ଦୁଇଟି ପୋଖରୀରେ ମାଛଚାଷ ବି କରୁଛନ୍ତି । ଏ ସବୁ ଚାଷ କାର୍ଯ୍ୟ ପାଇଁ ପ୍ରାୟ ୧୦ ଜଣ ଲୋକଙ୍କୁ ବି ନିଯୁକ୍ତି ଦେଇଛନ୍ତି ଅପୂର୍ବମଣି । ଏହାସହ ସବୁ ଚାଷକୁ ନିଜେ ବୁଝାଶୁଝା କରନ୍ତି ।
ଉତ୍ପାଦନ ଠାରୁ ଆରମ୍ଭ କରି ବଜାରକୁ ଯିବା ଯାଏ ସବୁକିଛିର ହିସାବ କିତାବ ରଖିବା ସହ ଚାଷ ଜମିରେ ବି ଝାଳବୁହା ପରିଶ୍ରମ କରନ୍ତି । ଘର କାମ, ଚାଷ କାର୍ଯ୍ୟ ସହିତ ଚାକିରିକୁ ସମାନ୍ତରାଳ ଭାବେ ତୁଲାଇ ନିଜକୁ ଜଣେ ସର୍ବଗୁଣସଂପନ୍ନା ବୋହୂ ଭାବେ ପ୍ରତିଷ୍ଠିତ କରାଇ ପାରିଛନ୍ତି । ଏ ସମ୍ପର୍କରେ ଅପୂର୍ବମଣି କହନ୍ତି, ସ୍ୱାମୀଙ୍କ ସହ ଚାଷ କାମ କରିବାକୁ ମୋତେ କେହି ବାଧ୍ୟ କରନ୍ତି ନାହିଁ । ନିଜକୁ ସେ କ୍ଷେତ୍ରରେ ଯୋଗ୍ୟ ଭାବି ମୁଁ ତାଙ୍କ ସହ ଚାଷଜମିକୁ ଓହ୍ଲାଇଛି । ମୁଁ କିଛି ଦାୟିତ୍ୱ ନେଇପାରିଲେ ସ୍ୱାମୀ ଆଉ ନୂଆ କିଛି କରିବାର ସାହସ ଜୁଟାଇ ପାରୁଛନ୍ତି । ମହିଳା ଭାବେ ନିଜକୁ ମୁଁ କେବେ ଦୁର୍ବଳ ଭାବିନି ବୋଲି ପ୍ରକାଶ କରିଛନ୍ତି ଅପୂର୍ବମଣି ।
