ନୂଆଦିଲ୍ଲୀ ୦୩/୧୧: ‘ମୁଁ କାହିଁକି ୧୦ଟି ଫରାରି, ୨୦ଟି ହୀରା ଘଣ୍ଟା ଓ ୨ଟି ଜେଟ୍ ବିମାନ ରଖିବାକୁ ଚାହିଁବି । ଏହାଦ୍ୱାରା ସାରା ବିଶ୍ୱର କି ଲାଭ ହେବ? ମୁଁ ଭୋକିଲା ରହି ଚାଷଜମିରେ କାମ କରୁଥିଲି । ଖାଲି ପାଦରେ ଖୋଳୁଥିଲି ଓ ସ୍କୁଲ ଯାଇନଥିଲି । ବର୍ତ୍ତମାନ ମୁଁ ଲୋକଙ୍କୁ ସାହାଯ୍ୟ କରିପାରିବି ।’ ଏହା ହେଉଛି ସେନେଗଲର ଫୁଟବଲ ସୁପରଷ୍ଟାର ସାଡିଓ ମାନେଙ୍କ କଥା । ସେ କେବଳ ଭାଷଣବାଜି ଲାଗି ଏକଥା କହିନାହାନ୍ତି । ନିଜର କଥାକୁ କାର୍ଯ୍ୟରେ ପରିଣତ କରି ବି ଦେଖାଇଛନ୍ତି । ଅତ୍ୟଧିକ ଗରିବୀ ମଧ୍ୟରୁ ଆସିଥିବା ମାନେ ତାଙ୍କ ଗାଁର କାୟାକଳ୍ପ ପରିବର୍ତ୍ତନ କରିଦେଇଛନ୍ତି ।
ମାନେ ମାତ୍ର ୭ ବର୍ଷ ବୟସରୁ ନିଜ ପିତାଙ୍କୁ ହରାଇଥିଲେ । ଆଫ୍ରିକାର ସବୁଠୁ ଗରିବ ଅଞ୍ଚଳ ମଧ୍ୟରୁ ଅନ୍ୟତମ ଏକ ସ୍ଥାନରେ ଅଙ୍ଗୁରରେ ଖେଳିବାରୁ ଆରମ୍ଭ ହୋଇଥିବା ତାଙ୍କର ସ୍ୱପ୍ନ ଏବେ ଏକ ଐତିହାସିକ ଅନ୍ତର୍ଜାତୀୟ କ୍ୟାରିୟରରେ ପରିଣତ ହୋଇଛି । ମାନେ ଇଂଲଣ୍ଡର ଲିଭରପୁଲ ଓ ଜର୍ମାନୀର ବାୟେର୍ନ ମ୍ୟୁନିକ୍ କ୍ଲବ୍ ଲାଗି ଖେଳିସାରିଛନ୍ତି । କ୍ରୀଡ଼ା କ୍ଷେତ୍ରରୁ ରୋଜଗାର କରୁଥିବା ଅର୍ଥଦ୍ୱାରା ନିଜ ଗାଁ ବାମ୍ବାଲିରେ ଅନେକ ଜୀବନକୁ ଆଲୋକିତ କରୁଛନ୍ତି ସେ । ବିଶ୍ୱ ବ୍ୟାଙ୍କ୍ର ଆକଳନ ଅନୁସାରେ ବାମ୍ବାଲିରେ ୭୦ ପ୍ରତିଶତରୁ ଅଧିକ ଲୋକ ଗରିବୀ ମଧ୍ୟରେ କାଳାତିପାତ କରୁଛନ୍ତି । ନିଜ ରୋଜଗାରରୁ ଏକ ନିୟୁତ ପାଉଣ୍ଡ ଅର୍ଥ ବିନିଯୋଗ କରି ମାନେ ବାମ୍ବାଲିକୁ ସେହି ଜାଲରୁ ବାହାରକୁ ବାହାର କରିବାର ମିଶନ୍ରେ ଅଛନ୍ତି । ୩ ଲକ୍ଷ ଡଲାର ଖର୍ଚ୍ଚ କରି ଏକ ସ୍କୁଲ ବନାଇଛନ୍ତି ସେ । ଏକ ହସ୍ପିଟାଲ ନିର୍ମାଣ କରିବା ବାବଦରେ ତାଙ୍କର ୬ ଲକ୍ଷ ଡଲାର ଖର୍ଚ୍ଚ ହୋଇଛି ।
କେବଳ ସେତିକି ନୁହେଁ, ଛାତ୍ରଛାତ୍ରୀମାନଙ୍କୁ ସେ ମାଗଣାରେ ଲାପଟପ୍ ଓ ଇଣ୍ଟରନେଟ୍ ସେବା ବି ଉପଲବ୍ଧ କରାଇଛନ୍ତି । ସେହିପରି ଏକ ପୋଷ୍ଟ ଅଫିସ୍, ପେଟ୍ରୋଲ ପମ୍ପ, ମସଜିଦ୍ ବି ତାଙ୍କ ପ୍ରଚେଷ୍ଟାରେ ତିଆରି ହୋଇଛି । ମାନେଙ୍କର ବଦାନ୍ୟତା ଏତିକିରେ ସରିନାହିଁ । ଗାଁର ଗରିବ ପରିବାରକୁ ପ୍ରତି ମାସରେ ସେ ୭୬ ଡଲାର ସହାୟତା ପ୍ରଦାନ କରୁଛନ୍ତି । ତାଙ୍କର ଏହି କାହାଣୀ ଏବେ ସୋସିଆଲ ମିଡିଆରେ ଭାଇରାଲ୍ ହେଉଥିବାବେଳେ ଅନେକ ୟୁଜର ଏ ସଂପର୍କରେ ନିଜର ପ୍ରତିକ୍ରିୟା ଦେଇଛନ୍ତି । ଆମର କ୍ରୀଡ଼ାବିତ୍, ସେଲିବ୍ରିଟି ଓ ଧନୀ ଲୋକମାନେ ଏଭଳି ହେଲେ ଦେଶର କାୟା ପରିବର୍ତ୍ତନ ହୋଇଯାଆନ୍ତା ବୋଲି ଅନେକ ମତ ରଖିଛନ୍ତି
