ନୂଆଦିଲ୍ଲୀ,୦୫/୧୧: ବିଶ୍ବର ସର୍ବପୂରାତନ ଗଣତାନ୍ତ୍ରିକ ରାଷ୍ଟ୍ରର ୪୭ ତମ ରାଷ୍ଟ୍ରପତିଙ୍କୁ ବାଛିବା ପାଇଁ ଆଜି ଆମେରିକାରେ ନିର୍ବାଚନ ଅନୁଷ୍ଠିତ ହୋଇଯାଇଛି। ଏହା ଉପରେ ସମଗ୍ର ବିଶ୍ୱର ନଜର ରହିଛି। ମୁଖ୍ୟ ପ୍ରତିଯୋଗିତା ହେଉଛି ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ବର୍ତ୍ତମାନର ଉପରାଷ୍ଟ୍ରପତି କମଲା ହାରିସ୍‌ଙ୍କ ମଧ୍ୟରେ। ଭାରତ ଭଳି ଦେଶ ପାଇଁ ମଧ୍ୟ ଏହି ନିର୍ବାଚନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏଭଳି ପରିସ୍ଥିତିରେ ଆସନ୍ତୁ ଜାଣିବା ଆମେରିକାରେ କାହାର ବିଜୟ ଭାରତ ପାଇଁ ଲାଭଦାୟକ ହେବ ଏବଂ କାହାର ବିଜୟ କ୍ଷତି ଘଟାଇବ? 

ଭାରତୀୟ ବଂଶୋଦ୍ଭବ କମଲା ହାରିସଙ୍କ ମାଆ ଶ୍ୟାମଳା ଗୋପାଳନ ତାମିଲନାଡୁର ବାସିନ୍ଦା। ତାଙ୍କ ପିତା ଜାମାଇକାର ମୂଳ ବାସିନ୍ଦା। ଆମେରିକାରେ ସାକ୍ଷାତ ପରେ ତାଙ୍କ ପିତାମାତା ବିବାହ କରିଥିଲେ। ତେବେ ପରେ ଦୁହିଁଙ୍କ ମଧ୍ୟରେ ବିବାହ ବିଚ୍ଛେଦ ହୋଇଥିଲା। ଉଲ୍ଲେଖଥାଉ କି, କମଲା ହାରିସ୍ ତାଙ୍କ ମାଆଙ୍କ ସହ ଚେନ୍ନାଇରେ ଥିବା ତାଙ୍କ ଅଜାଙ୍କ ଘରକୁ ଅନେକ ଥର ଆସନ୍ତି।

ମୋଦୀଙ୍କ ସହିତ ଅପଡ଼ ସମ୍ପର୍କ:

ଆମେରିକାର ଉପରାଷ୍ଟ୍ରପତି ଥିବାବେଳେ କମଲା ହାରିସ୍ ଭାରତୀୟ ପ୍ରସଙ୍ଗରେ ଆବଶ୍ୟକ ଅନୁସାରେ ସ୍ୱର ଉତ୍ତୋଳନ କରିନାହାଁନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଗସ୍ତ ସମୟରେ ସେ କମଲା ହାରିସଙ୍କୁ ଭେଟିଥିଲେ, ସେତେବେଳେ ମଧ୍ୟ ତାଙ୍କ ସହ କୌଣସି ବଡ଼ କେମିଷ୍ଟ୍ରି ଦେଖିବାକୁ ମିଳିନଥିଲା। ରାଷ୍ଟ୍ରପତି ଜୋ ବାଇଡେନଙ୍କ ପ୍ରଶାସନ ଅନେକ ଘରୋଇ ପ୍ରସଙ୍ଗରେ ଭାରତ ବିରୋଧରେ ବିବୃତ୍ତି ଜାରି ରଖିଛି। କେବଳ ଏତିକି ନୁହେଁ ବରଂ ସଂଖ୍ୟାଲଘୁ ଏବଂ ମାନବାଧିକାରକୁ ନେଇ ଆମେରିକାର ଅନେକ ମନ୍ତ୍ରୀ ଓ ସାଂସଦ ଅନେକ ପ୍ରକାର ବିବାଦୀୟ ବୟାନ ଦେଇଥିଲେ ସୁଦ୍ଧା କମଳା ଏ ସଂକ୍ରାନ୍ତରେ କେବେ କେଉଁଠି ସ୍ବର ଉଠାଇନାହାନ୍ତି। 

କାଶ୍ମୀର ପ୍ରସଙ୍ଗରେ ବିବାଦୀୟ ବୟାନ ଦେଇଛନ୍ତି କମଳା: 

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି କମଲା ହାରିସ୍ କାଶ୍ମୀରକୁ ନେଇ ବିବାଦୀୟ ବିବୃତ୍ତି ଦେଇସାରିଛନ୍ତି। ୨୦୧୯ ରେ, ଯେତେବେଳେ ଜାମ୍ମୁ କାଶ୍ମୀରରୁ ସ୍ବତନ୍ତ୍ର ମାନ୍ୟତାକୁ ରଦ୍ଦ କରିବା ପାଇଁ ଭାରତ ସମ୍ବିଧାନର ଧାରା ୩୭୦ ଉଚ୍ଛେଦ କରାଗଲା, ସେତେବେଳେ କମଲା ହାରିସ୍ କହିଥିଲେ ଯେ, କାଶ୍ମୀରବାସୀଙ୍କୁ ମନେ ରଖିବାକୁ ହେବ ଯେ ସେମାନେ ବିଶ୍ୱରେ ଏକୁଟିଆ ନୁହଁନ୍ତି। ଯଦି ଆବଶ୍ୟକ ହୁଏ, ଆମକୁ ଏଥିରେ ହସ୍ତକ୍ଷେପ କରିବୁ। 

ଅନେକ କ୍ଷେତ୍ରରେ ମିଳିଛି ସାହାଯ୍ୟ:

କମଳା ହାରିସ୍ ଅଣ ପାରମ୍ପାରିକ ଶକ୍ତି ଉତ୍ସ ଅର୍ଥାତ୍ ଅକ୍ଷୟ ଶକ୍ତିକୁ ପ୍ରୋତ୍ସାହିତ କରିବା ସପକ୍ଷରେ ଅଛନ୍ତି ଏବଂ ଭାରତ ମଧ୍ୟ ଏହି ଦିଗରେ କ୍ରମାଗତ ଭାବରେ ଆଗକୁ ବଢ଼ୁଛି ଏବଂ ଏକ ଉଚ୍ଚ ଲକ୍ଷ୍ୟ ସ୍ଥିର କରିଛି। ଏଭଳି ପରିସ୍ଥିତିରେ ଭାରତ ଆଶା କରୁଛି ଯେ ଏଥିପାଇଁ ଏହା ଆମେରିକାରୁ ଉନ୍ନତ ବୈଷୟିକ ସହାୟତା ପାଇପାରିବ। ଏଥି ସହିତ, ଯଦି ବ୍ୟବସାୟ ଦୃଷ୍ଟିକୋଣରୁ ଦେଖାଯାଏ, କମଳା ହାରିସଙ୍କ ବିଜୟ ଭାରତୀୟ ବଜାରରେ ସ୍ଥିରତା ଆଣିପାରେ। ଏହା ବ୍ୟତୀତ ଯଦି କମଳା ହାରିସ୍ ଜିତନ୍ତି, ତେବେ ତାଙ୍କ ସହ ଉପରାଷ୍ଟ୍ରପତି ପ୍ରାର୍ଥୀ ଟିମ୍ ୱାଲଜଙ୍କ ସହ ଚୀନ୍ ପ୍ରତି ଥିବା ନରମ ମନୋଭାବ ଭାରତ ପାଇଁ ସମସ୍ୟା ସୃଷ୍ଟି କରିବ। ତାଙ୍କର ଚୀନ୍ ସହିତ ମଧ୍ୟ ସମ୍ପର୍କ ରହିଛି କିନ୍ତୁ ଇମିଗ୍ରେସନ ପ୍ରସଙ୍ଗରେ କମଳା ଭାରତକୁ ସମର୍ଥନ କରିପାରନ୍ତି। ଏହା ଭାରତୀୟ ଆଇଟି କ୍ଷେତ୍ର ପାଇଁ ଲାଭଦାୟକ ହେବ। ଅନ୍ୟପକ୍ଷରେ ଆମେରିକାର ଡେମୋକ୍ରାଟିକ୍ ସରକାର H-1B ଭିସା ପାଇଁ ଅନେକ ଭଲ କାମ କରିଛନ୍ତି।

ଚୀନ୍‌ ବିପକ୍ଷରେ ଟ୍ରମ୍ପ, ଭାରତକୁ ମିଳିପାରେ ଫାଇଦା:

ଡୋନାଲ୍ଡ ଟ୍ରମ୍ପଙ୍କ ବିଷୟରେ ଯଦି କହିବା ତେବେ, ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ କାର୍ଯ୍ୟକାଳ ମଧ୍ୟରେ ତାଙ୍କ ସହ ଭଲ ସମ୍ପର୍କ ଥିଲା। ପ୍ରତ୍ୟେକ ଥର ସେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବାବେଳେ ତାଙ୍କୁ ପୂର୍ଣ୍ଣ ଉତ୍ସାହର ସହିତ ଭେଟିଛନ୍ତି। ସେ ପ୍ରଧାନମନ୍ତ୍ରୀ ମୋଦୀଙ୍କୁ ଅନେକ ଥର ପ୍ରଶଂସା କରିଛନ୍ତି ଏବଂ ତାଙ୍କୁ ତାଙ୍କ ବନ୍ଧୁ ବୋଲି ମଧ୍ୟ କହିଛନ୍ତି। ଏଭଳି ପରିସ୍ଥିତିରେ ଯଦି ଟ୍ରମ୍ପ ରାଷ୍ଟ୍ରପତି ହୁଅନ୍ତି, ତେବେ ଭାରତୀୟ ଆଇଟି କମ୍ପାନୀଗୁଡିକ ପାଇଁ ଦ୍ୱାର ଖୋଲିବାର ସମ୍ଭାବନା ରହିବ, କାରଣ ସେ ବାଣିଜ୍ୟରେ ଚୀନ୍ ଉପରେ କଡ଼ା ନୀତି ପ୍ରଣୟନ କରୁଛନ୍ତି। ତେଣୁ ସେ ଚୀନ୍‌ର ମୋଷ୍ଟ ଫେଭର୍ଡ ନେସନ ମାନ୍ୟତାରେ ମଧ୍ୟ ପୂର୍ଣ୍ଣଛେଦ ପକାଇପାରନ୍ତି। ଟ୍ରମ୍ପଙ୍କ ବିଜୟ ସହିତ ଚୀନ୍ ଉପରେ ଆମେରିକାର ନିର୍ଭରଶୀଳତା ହ୍ରାସ ପାଇବ, ଯାହା ଭାରତ ପାଇଁ ଲାଭଦାୟକ ହେବ।

ବୈଦେଶିକ ବ୍ୟାପାର ବିଶେଷଜ୍ଞମାନେ ମଧ୍ୟ ବିଶ୍ବାସ କରନ୍ତି ଯେ ଜୋ ବିଡେନଙ୍କ ଅପେକ୍ଷା ଟ୍ରମ୍ପ ଭାରତର ଆଭ୍ୟନ୍ତରୀଣ ବ୍ୟାପାରରେ କମ୍ ହସ୍ତକ୍ଷେପ କରିବେ। ଏଥି ସହିତ ଦୁର୍ନୀତି ଅଭିଯୋଗରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀ ସମ୍ପର୍କରେ ବାଇଡେନ ସରକାର ମନ୍ତବ୍ୟ ଦେଇସାରିଛନ୍ତି। ତେବେ ଭାରତ ଏହାକୁ ପ୍ରତ୍ୟାଖ୍ୟାନ କରିଥିଲା। ଏହା ବ୍ୟତୀତ ଟ୍ରମ୍ପଙ୍କ ବିଜୟ ସହିତ ଋଷ-ୟୁକ୍ରେନ ଯୁଦ୍ଧ ମଧ୍ୟ ଭାରତ ସହାୟତାରେ ବନ୍ଦ ହୋଇପାରିବ। ଟ୍ରମ୍ପ ନିଜେ କହିଛନ୍ତି ଯେ ଯଦି ସେ ଜିତନ୍ତି ତେବେ ସେ ଯୁଦ୍ଧ ବନ୍ଦ କରିବେ। ଏହା ମଧ୍ୟ ଭାରତ ସପକ୍ଷରେ ରହିବ। ଯାହା ହେଲେ ମଧ୍ୟ ଉଭୟ ୟୁକ୍ରେନ ଏବଂ ଋଷ ଭାରତର ଗୁରୁତ୍ୱପୂର୍ଣ୍ଣ ଅଂଶୀଦାର ଦେଶ। ଋଷ ଭାରତର ଜଣେ ଭଲ ବନ୍ଧୁ। ଏଭଳି ପରିସ୍ଥିତିରେ ଭାରତ ପାଇଁ ଋଷର ସ୍ଥିରତା ମଧ୍ୟ ଗୁରୁତ୍ୱପୂର୍ଣ୍ଣ।