ତିରୁୱନନ୍ତପୁରମ୍,୧୬/୧୧: କେନ୍ଦ୍ର ସରକାର ୱାୟନାଡ୍ ଭୂସ୍ଖଳନକୁ ଜାତୀୟ ବିପତ୍ତି ଭାବେ ଘୋଷଣା କରିବାକୁ ମନା କରିଛନ୍ତି । ନଭେମ୍ବର ୧୦ ତାରିଖରେ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ଏ ସଂପର୍କରେ କେରଳ ସରକାରଙ୍କୁ ପତ୍ର ଲେଖି ଜଣାଇଛନ୍ତି । ସ୍ପଷ୍ଟୀକରଣରେ ସେ କହିଛନ୍ତି ଯେ, ଏସ୍ଡିଆରଏଫ୍-ଏନ୍ଡିଆରଏଫ୍ର ବର୍ତ୍ତମାନ ଥିବା ଗାଇଡଲାଇନ୍ ଅନୁସାରେ କୌଣସି ବିପର୍ଯ୍ୟୟକୁ ‘ଜାତୀୟ ବିପତ୍ତି’ ଘୋଷଣା କରିବାର କୌଣସି ପ୍ରାବଧାନ ନାହିଁ । ପୂର୍ବରୁ ଅଗଷ୍ଟରେ ରାଜ୍ୟ ସରକାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପତ୍ର ଲେଖି ୱାୟନାଡ୍ ଭୂସ୍ଖଳନକୁ ଜାତୀୟ ବିପତ୍ତି ଘୋଷଣା କରିବାକୁ ଦାବି କରିଥିଲେ । ଏହାଛଡ଼ା ରାହୁଲ ଗାନ୍ଧୀ ମଧ୍ୟ ଅଗଷ୍ଟ ୭ରେ ଲୋକସଭାରେ ଏହି ଦାବି ଉଠାଇଥିଲେ । ଏପରିସ୍ଥଳେ ବିଜେପି ଏହି ପ୍ରସଙ୍ଗରେ ରାଜନୀତି କରୁଥିବା ପ୍ରିୟଙ୍କା ଗାନ୍ଧୀ ଅଭିଯୋଗ କରିଛନ୍ତି ।
ଏକ୍ସରେ ଏକ ପୋଷ୍ଟରେ ସେ ଲେଖିଛନ୍ତି, ୱାୟନାଡ୍ ଭୂସ୍ଖଳନରେ ହୋଇଥିବା ବ୍ୟାପକ କ୍ଷୟକ୍ଷତି ସତ୍ତେ୍ୱ ବିଜେପି ସରକାର ଏହାକୁ ଜାତୀୟ ବିପତ୍ତି ଘୋଷଣା କରିବାକୁ ମନା କରୁଛନ୍ତି । ଏହା କେବଳ ଦାୟିତ୍ୱହୀନତା ନୁହେଁ, ଅକଳ୍ପନୀୟ କ୍ଷତି ସହିଥିବା ଲୋକଙ୍କ ସହିତ ଅନ୍ୟାୟ । ୱାୟନାଡ୍ର ଲୋକେ ଏହାଠାରୁ ଅଧିକ ପାଇବାର ହକ୍ଦାର । କେରଳ ସରକାରଙ୍କ ଅନେକ ମନ୍ତ୍ରୀ ମଧ୍ୟ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି ।
ୱାୟନାଡ୍ରେ ଜୁଲାଇ ୨୯ ତାରିଖ ବିଳମ୍ବିତ ରାତି ୨-୪ଟା ମଧ୍ୟରେ ମୁଣ୍ଡାକାଇ, ଚୁଲାରମାଲା, ଅଟ୍ଟାମାଲା ଓ ନୂଲପୁଝା ଗାଁରେ ଭୂସ୍ଖଳନ ଘଟିଥିଲା । ସେଥିଯୋଗୁ ୪୦୦ରୁ ଅଧିକ ଲୋକେ ପ୍ରାଣ ହରାଇଥିଲେ । ଏହି ୪ଟି ଗାଁର ଆହୁରି କିଛି ଲୋକ ନିଖୋଜ ହୋଇଯାଇଥିଲେ ।
