ଫୁଲବାଣୀ, ୧୫/୧୧ : କନ୍ଧମାଳରେ ଆଜି ବି ରହିଛି ଅନେକ ଦୁର୍ଗମ ଅଞ୍ଚଳ, ଯେଉଁ ଅଞ୍ଚଳକୁ ଆଜି ପର୍ଯ୍ୟନ୍ତ ଗମନାଗମନର ସୁବିଧା ନାହିଁ। ବିଶେଷ କରି ଅସୁସ୍ଥ ଓ ଗର୍ଭବତୀମାନେ ଏଥିପାଇଁ ବହୁ ସମସ୍ୟା ଭୋଗୁଛନ୍ତି। କନ୍ଧମାଳ ଗଞ୍ଜାମ ସୀମାର ରାଇକିଆ ବ୍ଲକ୍‌ ବାଦଗଡ଼ ଗ୍ରାମ ଉପାନ୍ତ ଅଞ୍ଚଳରେ ରହିଛି । ଭଲ ରାସ୍ତା ନଥିବାରୁ ଗର୍ଭବତୀ ଓ ଅନ୍ୟ ରୋଗୀମାନେ ଡାକ୍ତରଖାନା ପହଞ୍ଚିବାରେ ସମସ୍ୟା ହେଉଛି । ରାସ୍ତା ନିର୍ମାଣ ପାଇଁ ପ୍ରଶାସନ ଶୁଣିଲାନି । ଏନେଇ ମହିଳାମାନେ ରାସ୍ତା ନିର୍ମାଣ କରିଛନ୍ତି । କନ୍ଧମାଳରେ ବାଦଗଡ଼ ଗ୍ରାମ ରହିଥିଲେ ମଧ୍ୟ ସ୍ୱାସ୍ଥ୍ୟ, ବଜାର, ଶିକ୍ଷା ପାଇଁ ଏମାନେ ଗଞ୍ଜାମ ଜିଲ୍ଲାର ସୋରଡା ଉପରେ ନିର୍ଭରଶୀଳ । ଗ୍ରାମ ଠାରୁ ସୋରଡାର ଦୂରତା ମାତ୍ର ୧୨ କିଲୋମିଟର । ଏହି ରାସ୍ତା ମଧ୍ୟରୁ ପ୍ରାୟ ୮ କିଲୋମିଟର ଗଞ୍ଜାମ ପ୍ରଶାସନ ପକ୍ଷରୁ ନିର୍ମିତ ହୋଇଥିବା ବେଳେ ସୀମାରେ ଥିବା ୪ କିଲୋମିଟର ରାସ୍ତା କନ୍ଧମାଳରେ ରହିଛି । ଏହି ରାସ୍ତାର ଅବସ୍ଥା ଭଲ ନ ଥିବାରୁ ବାଦଗଡ଼ ସମେତ ଦୁଇଟି ପଞ୍ଚାୟତର ୨୨ଟି ଗ୍ରାମର ଅଧିବାସୀ ଅସୁବିଧା ସମ୍ମୁଖୀନ ହେଉଛନ୍ତି । ୫୦ ବର୍ଷ ତଳେ ନିର୍ମାଣ ହୋଇଥିବା ରାସ୍ତା ଅବସ୍ଥା ଏବେ ଅତି ଶୋଚନୀୟ ରହିଛି । ୪ କିଲୋମିଟର ରାସ୍ତାର ନିର୍ମାଣ ପାଇଁ ରାଇକିଆ ବ୍ଲକର ରଣବା ଓ ଇନ୍ଦ୍ରଗଡ଼ ପଞ୍ଚାୟତର ଅଧିବାସୀ ସରପଞ୍ଚଙ୍କ ଠାରୁ ଜିଲ୍ଲାପାଳ, ଆର୍‌ଡିସି, ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଛନ୍ତି । 

ଲୋକଙ୍କ କହିବା ପ୍ରକାରେ ୧୯୯୮ ମସିହାରୁ ସବୁଦିନିଆ ରାସ୍ତା ପାଇଁ ଦାବି କରାଯାଉଥିଲେ ମଧ୍ୟ ଆଜି ପର୍ଯ୍ୟନ୍ତ ନା କନ୍ଧମାଳ ନା ଗଞ୍ଜାମ ପ୍ରଶାସନ ଏହାର ମରାମତି ପାଇଁ କୌଣସି ପଦକ୍ଷେପ ଗ୍ରହଣ କରି ନାହାନ୍ତି । ରାସ୍ତା ଉପରେ ନିର୍ଭର କରୁଥିବା ବାଦଗଡ ସମେତ କାନସରୁ, ନୂଆକାନସରୁ, ସିକିରିଗୁଡ଼ା ଆଦି ୨୨ଟି ଗ୍ରାମବାସୀ ସମସ୍ୟାର ସମ୍ମୁଖୀନ ହେଉଛନ୍ତି । ୪ କିଲୋମିଟର ରାସ୍ତା ମଧ୍ୟରୁ ପ୍ରାୟ ୭୦ ମିଟର ରାସ୍ତା ସଂରକ୍ଷିତ ଜଙ୍ଗଲ ମଧ୍ୟରେ ରହିଥିବା ଯୋଗୁଁ ଆଜି ପର୍ଯ୍ୟନ୍ତ ସେହି ରାସ୍ତା ନିର୍ମାଣ ହୋଇ ପାରୁନଥିବା ଅଭିଯୋଗ ହୋଇଛି । ଗର୍ଭବତୀ ଓ ଗୁରୁତର ରୋଗୀ ଚିକିତ୍ସା ପାଇଁ ସୋରଡ଼ା ଡାକ୍ତରଖାନା ଉପରେ ନିର୍ଭର କରୁଛନ୍ତି । କଦର୍ଯ୍ୟ ରାସ୍ତା ଯୋଗୁଁ ରୋଗୀ ଡାକ୍ତରଖାନାରେ ପହଞ୍ଚିବାରେ ବିଳମ୍ବ ହେଉଛି । ଅନେକ ସମୟରେ ରୋଗୀଙ୍କ ବାଟରେ ମୃତ୍ୟୁ ହେଉଥିବା ଅଭିଯୋଗ ହେଉଛି । ଆଶା, ଅଙ୍ଗନବାଡ଼ି କର୍ମୀମାନେ ଗର୍ଭବତୀଙ୍କୁ ଡାକ୍ତରଖାନାକୁ ନେବାବେଳେ ଚିନ୍ତାରେ ପଡ଼ି ଯାଆନ୍ତି । 

ଦାବି ଓ ଅଭିଯୋଗ ପରେ ପ୍ରଶାସନ କର୍ଣ୍ଣପାତ ନ କରିବାରୁ ମହିଳାମାନେ ଅଣ୍ଟା ଭିଡିଛନ୍ତି । ଚାନ୍ଦା କରି ସ୍ୱୟଂ ସହାୟକ ଗୋଷ୍ଠୀ, ଆଶା ଓ ଅଙ୍ଗନବାଡ଼ି କର୍ମୀ ଓ ଅନ୍ୟମାନେ ସାମିଲ୍‌ ହୋଇ ପ୍ରାୟ ଦେଢ କିଲୋମିଟର ରାସ୍ତା ମରାମତି କରିଛନ୍ତି । ଅନ୍ତତଃ ପକ୍ଷେ ଦୁଇ ଚକିଆ ଯାନ ଯାତାୟାତ କରିବା ସମ୍ଭବ ହୋଇପାରିଛି । ଶହ ଶହ ମହିଳା ଓ ପୁରୁଷ ଏବଂ ଯୁବକମାନେ ସାମିଲ୍‌ ହୋଇ ଦୁଇ ଦିନ ଧରି ଉକ୍ତ ରାସ୍ତାକୁ ମରାମତି କରିଛନ୍ତି । ଏହାର ସ୍ଥାୟୀ ପ୍ରତିକାର ପାଇଁ ଦାବି କରିଛନ୍ତି ଗ୍ରାମବାସୀ । ଜିଲ୍ଲା ପ୍ରଶାସନ ଓ ବନ ବିଭାଗ ମଧ୍ୟରେ ସମନ୍ୱୟ ସ୍ଥାପନ କରି ସମସ୍ୟାର ସମାଧାନ କରିବା ଦିଗରେ ପଦକ୍ଷେପ ନେଲେ ୨୨ ଖଣ୍ଡ ଗ୍ରାମର ଅଧିବାସୀ ଉପକୃତ ହୁଅନ୍ତେ।