ନୂଆଦିଲ୍ଲୀ,୬/୦୭: ଭାରତ ବଢୁଛି । ଏହା ସହିତ ନାଗରିକଙ୍କ ମଧ୍ୟରେ ଏହା ପ୍ରଭେଦ ମଧ୍ୟ ଦୂର କରୁଛି । ବିଭିନ୍ନ କଲ୍ୟାଣମୂଳକ ଯୋଜନା ମାଧ୍ୟମରେ ଲୋକଙ୍କୁ ସଶକ୍ତ କରୁଛନ୍ତି କେନ୍ଦ୍ର ସରକାର । ବିକାଶର ଲାଭକୁ ନାଗରିକଙ୍କ ମଧ୍ୟରେ ସମାନ ଭାବେ ବଣ୍ଟାଯାଉଛି । ସମସ୍ତଙ୍କୁ ମିଳୁଛି ସମାନ ସୁବିଧା ସୁଯୋଗ । ସମାନତାରେ ସମଗ୍ର ବିଶ୍ୱରେ ଉଦାହରଣ ପାଲଟିଛି ଭାରତ । ବିଶ୍ୱ ବ୍ୟାଙ୍କର ଏକ ନୂଆ ରିପୋର୍ଟରେ ଏଭଳି କୁହାଯାଇଛି । ମୋଦି ସରକାରଙ୍କ ଅଭିବୃଦ୍ଧି-କୈନ୍ଦ୍ରିକ ନୀତିକୁ ବିଶ୍ୱବ୍ୟାଙ୍କ୍ ପ୍ରଶଂସା କରିଛି ।
ବିଶ୍ୱବ୍ୟାଙ୍କ ପକ୍ଷରୁ ଭାରତକୁ ବିଶ୍ୱର ସବୁଠୁ ସମାନ ସମାଜ ମଧ୍ୟରୁ ଅନ୍ୟତମ ଭାବେ ଦର୍ଶାଯାଇଛି । ଭାରତର ଗିନି ସୂଚକାଙ୍କ ରହିଛି ୨୫.୫, ଯେଉଁ ଆଧାରରେ ଏହା ସ୍ଲୋଭାକିଆ, ସ୍ଲୋଭେନିଆ ଏବଂ ବେଲାରୁଷ ପରେ ଚତୁର୍ଥ ସ୍ଥାନରେ ରହିଛି । ଗିନି ସୂଚକାଙ୍କ ଦର୍ଶାଇଥାଏ ଯେ, କୌଣସି ଦେଶରେ ଲୋକଙ୍କ ମଧ୍ୟରେ କେତେ ସମାନ ଭାବେ ଆୟ ଏବଂ ଟଙ୍କାର ଆବଣ୍ଟନ କରାଯାଉଛି । ଆମେରିକାର ଗିନି ସୂଚକାଙ୍କ ସ୍କୋର ୪୧.୮ ଏବଂ ଚୀନ୍ର ୩୫.୭ ରହିଛି । ଏହାକୁ ଦେଖିଲେ ଆମେରିକା ଏବଂ ଚୀନ୍ ତୁଳନାରେ ଭାରତରେ ସମାନତା ହାର ବହୁ ମାତ୍ରାରେ ଅଧିକ ରହିଛି । ଅର୍ଥାତ୍ ଏହା ଅଧିକ ସମାନ ସମାଜ ।
ନାଗରିକଙ୍କୁ ସମାନତା ପ୍ରଦାନରେ ଭାରତ ଜି-୭ ଏବଂ ଜି-୨୦ ଦେଶଗୁଡ଼ିକଠାରୁ ବି ଭଲ ପ୍ରଦର୍ଶନ କରିଛି, ଯେଉଁଥିରେ ଅନେକ ବିକଶିତ ଅର୍ଥବ୍ୟବସ୍ଥା ବି ଅଛନ୍ତି । ପ୍ରକାଶଯୋଗ୍ୟ, ଗିନି ସୂଚକାଙ୍କରେ ସ୍କୋର୍ ଯେତେ କମ୍ ଥିବ, ଉକ୍ତ ରାଷ୍ଟ୍ରରେ ସମାନତା ସେତେ ଅଧିକ ବୋଲି ଗଣନା କରାଯାଇଥାଏ । ଏହି ସୂଚକାଙ୍କରେ ସ୍କୋର ଯେତେବେଳେ ଅଧିକ ଥିବ, ଉକ୍ତ ଦେଶ ସେତେ ମାତ୍ରାରେ ଅସମାନ ବୋଲି ଜଣାଯାଏ। ‘୦’ର ଅର୍ଥ ପୂର୍ଣ୍ଣ ସମାନତା ଏବଂ ୧୦୦ର ଅର୍ଥ ହେଉଛି ପୂର୍ଣ୍ଣ ଅସମାନ । ଭାରତର ସ୍କୋର ଜି-୭ ଏବଂ ଜି-୨୦ ରାଷ୍ଟ୍ରଗୁଡ଼ିକଠାରୁ ଅନେକ ମାତ୍ରାରେ ଭଲ ରହିଥିବା ବିଶ୍ୱ ବ୍ୟାଙ୍କ ରିପୋର୍ଟରେ ଉଲ୍ଲେଖ କରାଯାଇଛି ।
ଭାରତର ଗିନି ସୂଚକାଙ୍କକୁ ଆହୁରି ଖସାଇବା ଦିଗରେ ଅର୍ଥ ମନ୍ତ୍ରାଳୟ ଏବଂ ଅନ୍ୟାନ୍ୟ ଭିତ୍ତିଭୂମି କ୍ଷେତ୍ରଗୁଡ଼ିକ କାର୍ଯ୍ୟ କରୁଥିବା ଜଣାପଡ଼ିଛି । ତେବେ ଦେଶର ଦୂରଦୂରାନ୍ତ ଅଞ୍ଚଳ ଏବଂ ବିହାର, ପଶ୍ଚିମବଙ୍ଗ, ଝାଡ଼ଖଣ୍ଡ, କାଶ୍ମୀରର କିଛି ଅଂଶ ଏବଂ ତାମିଲ୍ନାଡୁକୁ ନେଇ ରିପୋର୍ଟରେ ଚିନ୍ତା ବ୍ୟକ୍ତ କରାଯାଇଛି । ଏସବୁ ଅଞ୍ଚଳରେ ଲୋକଙ୍କ ନିକଟରେ କେନ୍ଦ୍ର ଯୋଜନାଗୁଡ଼ିକର ପହଞ୍ଚ ବଢ଼ାଇବା ଲାଗି ଉଦ୍ୟମ ହେଉଛି । ରିପୋର୍ଟରେ କୁହାଯାଇଛି, ଭାରତ କେବଳ ବିଶ୍ୱର ଚତୁର୍ଥ ବୃହତ୍ ଅର୍ଥବ୍ୟବସ୍ଥା ନୁହେଁ, ଏହା ସମାନତା ପ୍ରଦାନରେ ଚତୁର୍ଥ ଶ୍ରେଷ୍ଠ ରାଷ୍ଟ୍ର । ଭାରତର ଆର୍ଥିକ ବିକାଶକୁ କେଉଁଭଳି ଭାବେ ଏହାର ନାଗରିକଙ୍କ ମଧ୍ୟରେ ସମାନ ରୂପେ ବଣ୍ଟାଯାଉଛି ତାହାକୁ ଏହା ପ୍ରମାଣିତ କରୁଛି । ଦାରିଦ୍ର୍ୟ ହ୍ରାସ, ବିତ୍ତୀୟ ପହଞ୍ଚର ବିସ୍ତାର ଏବଂ ଅଭାବୀ ଲୋକଙ୍କ ପାଖରେ ସିଧାସଳଖ କଲ୍ୟାଣମୂଳକ ସହାୟତା ପହଞ୍ଚାଇବାରେ ଲଗାତର ଧ୍ୟାନ ଦିଆଯିବା ଦ୍ୱାରା ଭାରତ ଏ ସଫଳତା ହାସଲ କରିଛି ।
ବିଶ୍ୱ ବ୍ୟାଙ୍କ ରିପୋର୍ଟ ଅନୁସାରେ, ଗତ ଦଶକ(୨୦୧୧-୨୦୨୩)ରେ ୧୭.୧ କୋଟି ଭାରତୀୟଙ୍କୁ ଅତିଦାରିଦ୍ର୍ୟରୁ ବାହାରକୁ ଅଣାଯାଇଛି। ୨୦୨୨-୨୩ରେ ଅତି ଦାରିଦ୍ର୍ୟ ହାର ୨.୩%କୁ ଖସିଛି । ଭାରତର ଅର୍ଥନୈତିକ ଅଭିବୃଦ୍ଧି କାହାଣୀକୁ ଏହା ଭଲ ଭାବେ ପ୍ରତିଫଳିତ କରୁଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ଘୋଷିତ ବିଭିନ୍ନ ନୀତି ଭାରତରୁ ଦାରିଦ୍ର୍ୟ ଦୂରୀକରଣକୁ ସୁନିଶ୍ଚିତ କରିଥିବା ରିପୋର୍ଟରେ ଉଲ୍ଲେଖ କରାଯାଇଛି । ସମାନତା କ୍ଷେତ୍ରରେ ଭାରତର ପ୍ରଗତି କେତେକ କେନ୍ଦ୍ର ଯୋଜନାଗୁଡ଼ିକ ଦ୍ୱାରା ସମ୍ଭବ ହୋଇଥିବା ରିପୋର୍ଟରେ ଉଲ୍ଲେଖ କରାଯାଇଛି । ଏସବୁ ଯୋଜନାଗୁଡ଼ିକ ମଧ୍ୟରେ ଜନଧନ ଯୋଜନା, ଆଧାର ଏବଂ ଡିଜିଟାଲ ପରିଚୟ, ପ୍ରତ୍ୟକ୍ଷ ସବ୍ସିଡି ସ୍ଥାନାନ୍ତର(ଡିବିଟି), ଆୟୁଷ୍ମାନ ଭାରତ, ଷ୍ଟାର୍ଟ-ଅପ୍ ଇଣ୍ଡିଆ, ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା(ପିଏମ୍ଜିକେଏୱାଇ) ଏବଂ ପିଏମ୍ ବିଶ୍ୱକର୍ମା ଯୋଜନା ଆଦି ସାମିଲ ଅଛି ।
