ଭୁବନେଶ୍ୱର, ୧୬/୧୦ : ଶିକ୍ଷାନୁଷ୍ଠାନ କ୍ୟାମ୍ପସକୁ ରାଗିଂମୁକ୍ତ କରିବା ଲାଗି ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି)ଠୁ ଆରମ୍ଭ କରି ଉଚ୍ଚଶିକ୍ଷା ବିଭାଗ ଯାଏ ସବୁଠି ପ୍ରୟାସ ଆରମ୍ଭ ହୋଇଛ । ଏଥିଲାଗି ସଚେତନତା ମଧ୍ୟ ସୃଷ୍ଟି କରାଯାଉଛି । ତଥାପି ଶତପ୍ରତିଶତ ରାଗିଂମୁକ୍ତ କ୍ୟାମ୍ପସ ହୋଇପାରୁନି । ଗତ ଅଗଷ୍ଟ ମାସରୁ ଶିକ୍ଷା ବର୍ଷ ଆରମ୍ଭ ହୋଇଛି । ୨ ମାସ ନହେଉଣୁ ୧୯ ରାଗିଂ ଅଭିଯୋଗ ସାମ୍ନାକୁ ଆସିଛି । ଏହା ଭିତରେ ୪ଟି ଗୁରୁତର ଅଭିଯୋଗ ରହିଛି । ଯାହା ପ୍ରମାଣ କରୁଛି ରାଗିଂ ମୁକ୍ତ କ୍ୟାମ୍ପସ କରିବାରେ ଶତପ୍ରତିଶତ ସଫଳ ହୋଇପାରୁନି ଉଚ୍ଚ ଶିକ୍ଷା ବିଭାଗ ।
୧୯ ରାଗିଂ ଅଭିଯୋଗରୁ ୧୩ଟି ସରକାରୀ ଶିକ୍ଷାନୁଷ୍ଠାନରେ ହୋଇଛି । ଏଥିରେ ରାଜ୍ୟର ପ୍ରତିଷ୍ଠିତ ବିଶ୍ୱବିଦ୍ୟାଳୟ ମଧ୍ୟରୁ ରେଭେନ୍ସା ବିଶ୍ୱବିଦ୍ୟାଳୟ, ବ୍ରହ୍ମପୁର ବିଶ୍ୱବିଦ୍ୟାଳୟ, ଓଡ଼ିଶା ବୈଷୟିକ ଓ ଗବେଷଣା ବିଶ୍ୱବିଦ୍ୟାଳୟ, ଜାତୀୟ ଆଇନ ବିଶ୍ୱବିଦ୍ୟାଳୟ ଆଦି ରହିଛି । ୧୪ଟି ରାଗିଂ ଅଭିଯୋଗର ତଦନ୍ତ ଏବେ ଚାଲିଛି । ଆଉ ୪ଟି ରାଗିଂ ଅଭିଯୋଗର ତଦନ୍ତ ହୋଇ ଅଭିଯୁକ୍ତ ଚିହ୍ନଟ କରାଯାଇ ଦଣ୍ଡ ଦିଆଯାଇଛି । ସୂଚନାଯୋଗ୍ୟ, ସାରା ଦେଶରେ ମୋଟ ୩୦୭ ରାଗିଂ ଅଭିଯୋଗ ପଞ୍ଜୀକରଣ ହୋଇଛି । ନୂଆ ଶିକ୍ଷା ବର୍ଷ ଆରମ୍ଭ ହେବାଠୁ ଆଜି ଯାଏ ୧୦ଟି ରାଜ୍ୟରେ ସର୍ବାଧିକ ରାଗିଂ ହୋଇଥିବା ଜଣାପଡ଼ିଛି । ଏଥିରେ ଓଡ଼ିଶା ୬ ନମ୍ବର ସ୍ଥାନରେ ରହିଛି । ବିହାରରେ ୨୧, ମହାରାଷ୍ଟ୍ରରେ ୨୦, ମଧ୍ୟପ୍ରଦେଶରେ ୨୭, ପଶ୍ଚିମ ବଙ୍ଗରେ ୩୧, ଉତ୍ତର ପ୍ରଦେଶରେ ସର୍ବାଧିକ ୫୧ଟି ରାଗିଂ ଅଭିଯୋଗ ସାମ୍ନାକୁ ଆସିଛି । ସରକାରୀ ଉଚ୍ଚଶିକ୍ଷାନୁଷ୍ଠାନରେ ବିଶେଷ କରି ପ୍ରଥମ ବର୍ଷ ଛାତ୍ରଛାତ୍ରୀମାନେ ରାଗିଂର ସମ୍ମୁଖୀନ ହେଉଛନ୍ତି । ତେଣୁ ଶିକ୍ଷାର୍ଥୀଙ୍କୁ କାଉନସେଲିଂ କରିବା ଏବଂ ଶିକ୍ଷାନୁଷ୍ଠାନ କ୍ୟାମ୍ପସ ସାରା ଆଣ୍ଟି ରାଗିଂ ହେଲ୍ପ ଲାଇନ ନମ୍ବର ପ୍ରକାଶ କରିବାର ଆବଶ୍ୟକତା ରହିଛି । ନିୟମିତ ଭାବେ ପାଟ୍ରୋଲିଂ ମଧ୍ୟ ଦରକାର । ହେଲେ ଅନେକ କଲେଜ ଓ ବିଶ୍ୱବିଦ୍ୟାଳୟ ଏପରି କରୁନାହାନ୍ତି । ଫଳରେ ରାଗିଂ ରୋକାଯାଇ ପାରୁନାହିଁ ।
ୟୁଜିସିର ଗାଇଡ୍ଲାଇନ ଅନୁଯାୟୀ ପ୍ରଥମ ବର୍ଷ ଅର୍ଥାତ୍ ନୂଆ କରି ନାମ ଲେଖାଇଥିବା ପିଲାଙ୍କୁ ହଷ୍ଟେଲରେ ଅଲଗା ରଖିବାର ନିୟମ ରହିଛି । ହେଲେ ଅନେକ ଶିକ୍ଷାନୁଷ୍ଠାନରେ ଗୋଟିଏ ହଷ୍ଟେଲ କୋଠାରେ ନୂଆ ଶିକ୍ଷାର୍ଥୀଙ୍କୁ ପୁରୁଣା ଶିକ୍ଷାର୍ଥୀଙ୍କ ସାଙ୍ଗରେ ରଖାଯାଉଛି । ଯାହା ଫଳରେ ଉପର ଶ୍ରେଣୀର ପିଲାଙ୍କ ଦ୍ୱାରା ନୂଆ ପିଲାମାନେ ରାଗିଂର ଶିକାର ହେଉଛନ୍ତି । ରାଗିଂ କମିଟି ଏ ଦିଗରେ ଅଧିକ ସକ୍ରିୟ ହେବା ଉଚିତ ବୋଲି ବିଭିନ୍ନ ମହଲରେ ମତ ପ୍ରକାଶ ପାଉଛି । ନିକଟରେ ବ୍ରହ୍ମପୁର ବିଶ୍ୱବିଦ୍ୟାଳୟରେ ହୋଇଥିବା ରାଗିଂ ଘଟଣାରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ୪ଜଣ ପିଜି ଶିକ୍ଷାର୍ଥୀଙ୍କୁ ବହିଷ୍କାର କରିବା ସହ ୧୩ ଜଣଙ୍କୁ ଦଣ୍ଡ ଦିଆଯାଇଛି । ଶିକ୍ଷାବିତ୍ଙ୍କ କହିବା କଥା, ରାଗିଂ ରୋକିବା ପାଇଁ ନିଆଯାଉଥିବା ପଦକ୍ଷେପ ଯଥେଷ୍ଟ ହେଉନାହିଁ । କେବଳ ଏତିକି ନୁହେଁ ଶିକ୍ଷାନୁଷ୍ଠାନ ଏବଂ ହଷ୍ଟେଲରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ହେଉନାହିଁ । ବିଶେଷ କରି ରାତି ସମୟରେ କ୍ୟାମ୍ପସ ଓ ହଷ୍ଟେଲକୁ ପ୍ରବେଶ କରୁଥିବା ଶିକ୍ଷାର୍ଥୀଙ୍କର ତଥ୍ୟକୁ ରେକର୍ଡ କରିବାର ଆବଶ୍ୟକତା ରହିଛି ।
ସୂଚନାଯୋଗ୍ୟ, ୟୁଜିସି ପକ୍ଷରୁ ଆଣ୍ଟି ରାଗିଂ ହେଲ୍ପ ଲାଇନ ନମ୍ବର (୧୮୦୦୧୮୦୫୫୨୨) ଜାରି କରାଯାଇଛି । ଯେଉଁଥିରେ ଶିକ୍ଷାର୍ଥୀମାନେ ରାଗିଂ ସଂପର୍କିତ ଅଭିଯୋଗକୁ ପଞ୍ଜୀକରଣ କରିପାରିବେ । ଗତବର୍ଷ ଏହି ହେଲ୍ପ ଲାଇନ ନମ୍ବରରେ ୪୦ଟି ଅଭିଯୋଗ ଓଡ଼ିଶାରୁ ହିଁ ପଞ୍ଜୀକରଣ କରାଯାଇଥିଲା । ଏଥିରେ ବଲାଙ୍ଗିର ମେଡିକାଲ କଲେଜ ଆଣ୍ଡ ହସ୍ପିଟାଲର ଘଟଣା ମଧ୍ୟ ଅନ୍ତର୍ଭୁକ୍ତ ଥିଲା ।
