ନୂଆଦିଲ୍ଲୀ ୦୮/୦୪: ମାନବ-ସ୍ତରୀୟ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) । ଆର୍ଟିଫିସିଆଲ ଜେନେରାଲ ଇଣ୍ଟେଲିଜେନ୍ସ (ଏଜିଆଇ) ଭାବେ ଏହା ଲୋକପ୍ରିୟ । ୨୦୩୦ ମସିହା ସୁଦ୍ଧା ଏଜିଆଇ ଆସିବ, ଯାହା ସବୁଦିନ ପାଇଁ ମାନବତାକୁ ଧ୍ୱଂସ କରିଦେବ । ଗୁଗଲ୍ ଡିପ୍ମାଇଣ୍ଡର ନୂଆ ଅଧ୍ୟୟନ ଏହା ଅନୁମାନ କରିଛି । ଏଜିଆଇ ବା ଆର୍ଟିଫିସିଆଲ ଜେନେରାଲ ଇଣ୍ଟେଲିଜେନ୍ସର ବ୍ୟାପକ ସାମର୍ଥ୍ୟକୁ ଅଧ୍ୟନୟ ଦର୍ଶାଇଛି । ଏହା ଆମର ଭୟଙ୍କର କ୍ଷତି କରିପାରେ ବୋଲି ମଧ୍ୟ ଚେତାଇ ଦେଇଛି । ମାନବତାକୁ ସମ୍ପୂର୍ଣ୍ଣ ଧ୍ୱଂସ କରୁଥିବା ବର୍ତ୍ତମାନର ବିପଦଗୁଡ଼ିକ ଏହି ଗମ୍ଭୀର କ୍ଷତିର ସ୍ପଷ୍ଟ ଉଦାହରଣ ବୋଲି ଅଧ୍ୟୟନ ଆଲୋକପାତ କରିଛି ।
ଇତିମଧ୍ୟରେ ଏହି କ୍ଷତି ଗମ୍ଭୀର କି ନୁହେଁ, ତାହା ସ୍ଥିର କରିବା ଗୁଗଲ୍ ଡିପ୍ମାଇଣ୍ଡ୍ ପାଇଁ ବିଷୟ ନୁହେଁ । ଏହା ସମାଜର ଦୃଷ୍ଟିକୋଣ, ଯାହା ତା’ର ସାମୂହିକ ବିପଦ ସହନଶୀଳତା ଓ କ୍ଷତିର ଅବଧାରଣା ଦ୍ୱାରା ନିର୍ଦ୍ଦେଶିତ । ଅଧ୍ୟୟନର ସହ-ଲେଖକ ଡିପ୍ମାଇଣ୍ଡ୍ର ସହ-ପ୍ରତିଷ୍ଠାତା ଶେନ୍ ଲେଗ୍ ବିଶେଷକରି କହିନାହାନ୍ତି ଯେ ମାନବତା ବିଲୁପ୍ତିରେ ଏଜିଆଇ ପରିଣାମ ଦେବ । ଏହା ପରିବର୍ତ୍ତେ ଏଜିଆଇର ବିପଦକୁ କମାଇବା ପାଇଁ ଗୁଗଲ୍ ଓ ଅନ୍ୟ ଏଆଇ କମ୍ପାନିଗୁଡ଼ିକ କିଭଳି ପଦକ୍ଷେପ ନେବା ଉଚିତ୍, ତାହା ଉପରେ ଫୋକସ୍ କରିଛନ୍ତି ।
ଅଧ୍ୟୟନ ଉନ୍ନତ ଏଆଇର ବିପଦକୁ ୪ ପ୍ରମୁଖ ବିଭାଗ ଯଥା- ଅପବ୍ୟବହାର, ଭୁଲ ମାର୍ଗ, ତ୍ରୁଟି ଓ ଢାଞ୍ଚାଗତ ବିପଦରେ ବିଭକ୍ତ କରିଛି । ଏହା ମଧ୍ୟ ଡିପ୍ମାଇଣ୍ଡ୍ର ବିପଦ ପ୍ରଶମନ ରଣନୀତି ଉପରେ ଫୋକସ୍ କରିଛି, ଯାହା ଅପବ୍ୟବହାରକୁ ରୋକିବାରେ କେନ୍ଦ୍ରିତ, ଯେଉଁଠି ଲୋକେ ଅନ୍ୟର କ୍ଷତି କରିବାକୁ ଏଆଇ ବ୍ୟବହାର କରୁଛନ୍ତି ।
ଗତ ଫେବ୍ରୁଆରୀରେ ଡିପ୍ମାଇଣ୍ଡ୍ର ସିଇଓ ଡେମିସ୍ ହାସାବିସ୍ କହିଥିଲେ, ଏଜିଆଇ ମଣିଷ ଅପେକ୍ଷା ଅଧିକ ସ୍ମାର୍ଟ । ଆଗାମି ୫ କିମ୍ବା ୧୦ ବର୍ଷରେ ଏହାର ଅଭ୍ୟୁଦୟ ଆରମ୍ଭ ହେବ । ଏହାର ବିକାଶ ଉପରେ ନଜର ରଖିବାକୁ ଜାତିସଂଘ ଭଳି ଏକ ସଂଗଠନର ଗଠନ ଉପରେ ମଧ୍ୟ ସେ ଜୋର୍ ଦେଇଥିଲେ । ଅସୁରକ୍ଷିତ ପ୍ରୋଜେକ୍ଟଗୁଡ଼ିକର ଯାଞ୍ଚ୍ ଓ ସେଗୁଡ଼ିକ ସହ ମୁକାବିଲା ପାଇଁ ଏଜିଆଇକୁ ଆଇଏଇଏ ଭଳି ଏକ ପ୍ରତିଷ୍ଠାନ ସହ ଯୋଡ଼ିବାକୁ ହେବ । ଏଜିଆଇ ଏଆଇକୁ ଆଉ ପାଦେ ଆଗକୁ ନେଇଛି । ଏଆଇ କାର୍ଯ୍ୟ ଉପରେ ଫୋକସ୍ କରେ । ଅନ୍ୟପକ୍ଷେ, ଏଜିଆଇର ଲକ୍ଷ୍ୟ ଏଭଳି ବୁଦ୍ଧିମତା ପ୍ରାପ୍ତ କରିବା ଯାହା କାର୍ଯ୍ୟର ବିସ୍ତୃତ ଶୃଙ୍ଖଳାରେ ଉପଯୋଗ ହୋଇପାରିବ । ଠିକ୍ ମାନବ ବୁଦ୍ଧିମତା ଭଳି । ସଂକ୍ଷେପରେ କହିଲେ, ଏଜିଆଇ ବୁଝିବା, ଶିଖିବା ଏବଂ ବିଭିନ୍ନ କ୍ଷେତ୍ରରେ ଜ୍ଞାନର ଉପଯୋଗ କରୁଥିବା ମଣିଷ ଭଳି ସାମର୍ଥ୍ୟଯୁକ୍ତ ଏକ ମେସିନ୍ ହେବ ।
