ମେଲବର୍ଣ୍ଣ, ୨୬/୦୧: ୨୦୧୫ରେ ଅଷ୍ଟ୍ରେଲିଆନ ଓପନ ସେମି ଫାଇନାଲ୍ରେ ପ୍ରବେଶ କରି ମାଡିସନ କିଜ ଆଗାମୀ ଦିନର ତାରକା ଭାବେ ପରିଚୟ ସୃଷ୍ଟି କରିଥିଲେ । ସେତେବେଳେ ତାଙ୍କ ବୟସ ଥିଲା ମାତ୍ର ୧୯ ବର୍ଷ । ୧୦ ବର୍ଷର ନିଷ୍ଠାପର ଉଦ୍ୟମ ଓ କଠିନ ପରିଶ୍ରମ ପରେ ସେ ପ୍ରଥମ କରି ଗ୍ରାଣ୍ଡସ୍ଲାମ୍ ଟାଇଟଲ ହାସଲ କରିଛନ୍ତି । ଶନିବାର ରୋଡ ଲାଭର ଏରେନାରେ ଅନୁଷ୍ଠିତ ମହିଳା ସିଙ୍ଗଲ୍ସ ଫାଇନାଲ୍ ମୁକାବିଲାରେ ଟପ୍ ସିଡ୍ ତଥା ଡିଫେଣ୍ଡିଂ ଚାମ୍ପିଅନ୍ ଅର୍ନ୍ୟା ସାବାଲେଙ୍କାକୁ ୬-୩, ୨-୬, ୭-୫ ସେଟ୍ରେ ପରାସ୍ତ କରି ଚାମ୍ପିଅନ୍ ଆଖ୍ୟା ଅର୍ଜନ କରିଛନ୍ତି । ବିଶ୍ୱର ପ୍ରଥମ ଖେଳାଳି ଭାବେ ସେମି ଫାଇନାଲ୍ ଓ ଫାଇନାଲ୍ରେ ମାନ୍ୟତା ତାଲିକାର ପ୍ରଥମ ୨ଟି ସ୍ଥାନ ଦଖଲ କରିଥିବା ଖେଳାଳିଙ୍କୁ ପରାସ୍ତ କରିଛନ୍ତି କିଜ୍ । ସେମି ଫାଇନାଲ୍ରେ ସେ ଦ୍ୱିତୀୟ ସିଡ୍ ଇଗା ସ୍ୱିଟେକଙ୍କୁ ହରାଇଥିଲେ ।
କ୍ରମାଗତ ୨୦୨୩ ଓ ୨୦୨୪ରେ ଚାମ୍ପିଅନ ହୋଇଥିବା ସାବାଲେଙ୍କା ୨୦ଟି ମ୍ୟାଚ୍ ଅପରାଜେୟ ରହିି ଫାଇନାଲ୍କୁ ଓହ୍ଲାଇଥିଲେ। ମାର୍ଟିନା ହିଙ୍ଗିସ୍ (୧୯୯୭ରୁ ୧୯୯୯)ଙ୍କ ପରେ ପ୍ରଥମ ଖେଳାଳି ଭାବେ ହ୍ୟାଟ୍ରିକ୍ ଅଷ୍ଟ୍ରେଲିଆନ ଓପନ ଟାଇଟଲ ଲକ୍ଷ୍ୟରେ ରହିଥିଲେ ସାବାଲେଙ୍କା । ମାତ୍ର ତାଙ୍କର ସବୁ ସ୍ୱପ୍ନକୁ କିଜ୍ ମଉଳାଇ ଦେଇଥିଲେ । ୨୦୨୩ ସେମି ଫାଇନାଲ୍ ପରାଜୟର ପ୍ରତିଶୋଧ ନେଇଥିଲେ କିଜ୍ ।
ଏହି ମ୍ୟାଚ ପୂର୍ବରୁ ଉଭୟ ପରସ୍ପରକୁ ୫ଥର ଭେଟିଥିଲେ ଓ ସାବାଲେଙ୍କା ୪ଟି ମ୍ୟାଚ ଜିତିଥିଲେ । ତେଣୁ ସାବାଲେଙ୍କାଙ୍କ ରାଜୁତି ଜାରି ରହିବ ବୋଲି ପୂର୍ବାନୁମାନ କରାଯାଉଥିଲା । କିନ୍ତୁ କିଜ୍ ସବୁ ଆକଳନକୁ ଭୁଲ ପ୍ରମାଣିତ କରିଦେଇଥିଲେ । ମ୍ୟାଚ୍ ଆରମ୍ଭରୁ ପ୍ରଭାବ ବିସ୍ତାର କରି ଖେଳିଥିଲେ କିଜ । ପ୍ରଥମ ସେଟ୍ରେ ସେ ୩ଟି ବ୍ରେକ୍ ପଏଣ୍ଟ ହାସଲ କରିଥିଲେ । ଅବଶ୍ୟ ସାବାଲେଙ୍କା ଲଢୁଆ ଖେଳ ପ୍ରଦର୍ଶନ କରି ଦ୍ୱିତୀୟ ସେଟ୍ ଅକ୍ତିଆର କରିଥିଲେ ଓ ୧-୧ରେ ସ୍ଥିତି ବରାବର ହୋଇଥିଲା । ତୃତୀୟ ସେଟ୍ ସଂଘର୍ଷପୂର୍ଣ୍ଣ ରହିଥିଲା । ୫-୫ରେ ସ୍ଥିତି ବରାବର ରହିବା ପରେ କିଜ୍ ନିଜ ସର୍ଭିସରେ ଆଉ ଏକ ପଏଣ୍ଟ ହାତେଇ ୬-୫ରେ ଅଗ୍ରଣୀ ହାସଲ କରିଥିଲେ ।
ଏହାପରେ ସାବାଲେଙ୍କାଙ୍କ ସର୍ଭିସକୁ ବ୍ରେକ୍ କରି କିଜ୍ ମ୍ୟାଚ୍ ପଏଣ୍ଟ ହାସଲ କରିଥିଲେ । ଏହା ପୂର୍ବରୁ କିଜ୍ ଥରେ ମାତ୍ର ଗ୍ରାଣ୍ଡସ୍ଲାମ୍ ଫାଇନାଲ୍କୁ ଉନ୍ନୀତ ହୋଇଥିଲେ । ୨୦୧୭ ୟୁଏସ୍ ଓପନ ଫାଇନାଲରେ ସେ ସ୍ଲୋଆନ ଷ୍ଟିଫେନ୍ସଙ୍କ ଠାରୁ ୬-୩, ୬-୦ ସେଟ୍ରେ ପରାଜିତ ହୋଇଥିଲେ । ୪୬ତମ ଗ୍ରାଣ୍ଡସ୍ଲାମ୍ରେ କିଜ ପ୍ରଥମ ଟାଇଟଲ ହାସଲ କରିଥିଲେ । ପ୍ରଥମ ଗ୍ରାଣ୍ଡସ୍ଲାମ୍ ଟାଇଟଲ ପାଇଁ ତାଙ୍କୁ ଲମ୍ବା ଅପେକ୍ଷା କରିବାକୁ ପଡ଼ିଥିଲା । ତାଙ୍କ ପୂର୍ବରୁ କେବଳ ମାରିଅନ ବାର୍ତୋଲି ୪୭ତମ ଓ ଫ୍ଲାଭିଆ ପେନେଟଶ ୪୯ତମ ଗ୍ରାଣ୍ଡସ୍ଲାମ୍ରେ ପ୍ରଥମ ଟାଇଟଲ ହାସଲ କରିଥିଲେ ।
