ଭୁବନେଶ୍ୱର ୨୩/୦୫: ସୁସ୍ଥ ରହିବା ପାଇଁ ଶରୀରରେ ଭିଟାମିନ୍ସ ଓ ମିନେରାଲ୍ସ ଭରପୂର ରହିବା ଆବଶ୍ୟକ । ଭିଟାମିନ୍ ବି୧୨’ର ଅଭାବ ପୁରୁଷ ନା ମହିଳାଙ୍କଠାରେ ବେଶୀ ଦେଖାଦିଏ ।
ଆଜିକାଲିର ବ୍ୟସ୍ତବହୁଳ ଦୁନିଆରେ ପ୍ରତ୍ୟେକ ବ୍ୟକ୍ତି ନିଜର ସ୍ୱାସ୍ଥ୍ୟକୁ ଅଣଦେଖା କରିବାରେ ଲାଗିଛନ୍ତି । ବିଶେଷକରି ଖାଦ୍ୟପାନୀୟ କ୍ଷେତ୍ରରେ ଅଧିକାଂଶ ଲୋକ ଘର ଖାଦ୍ୟ ଛାଡ଼ି ବାହାର ଫାଷ୍ଟ ଫୁଡ୍, ପ୍ରୋସେସ୍ ଫୁଡ୍ ଓ ଛଣାଛଣି ଖାଦ୍ୟକୁ ଅଧିକ ଗୁରୁତ୍ୱ ଦେଉଛନ୍ତି । ତେଣୁ ଶରୀରକୁ ପର୍ଯ୍ୟାପ୍ତ ପୋଷକ ତତ୍ତ୍ୱର ମିଳିପାରୁନାହିଁ । ଫଳରେ ଅନେକ ପ୍ରକାରର ପୋଷକ ତତ୍ତ୍ୱର ଅଭାବଜନିତ ସମସ୍ୟା ଦେଖିବାକୁ ମିଳୁଛି । ଭିଟାମିନ୍-ବି ୧୨ ଅଭାବ ଆଜିକାଲି ପ୍ରାୟ ଲୋକଙ୍କ ପାଇଁ ଖୁବ୍ ସାଧାରଣ ହୋଇପଡିଲାଣି । ଏହା ଶରୀର ପାଇଁ ଖୁବ୍ ଜରୁରି ପୋଷକ ତତ୍ତ୍ୱ, ଯାହା ସ୍ନାୟୁର ସ୍ୱାସ୍ଥ୍ୟ, ମସ୍ତିଷ୍କର କାର୍ଯ୍ୟକ୍ଷମତା, ଲାଲ୍ ରକ୍ତକଣିକାର ନିର୍ମାଣରେ ପ୍ରମୁଖ ଭୂମିକା ଗ୍ରହଣ କରିଥାଏ । ଏହାର ଅଭାବରେ ଥକାପଣ, ମୁଣ୍ଡ ବୁଲାଇବା, ଭୁଲିବା ସମସ୍ୟା ଓ ଅବସାଦ ପରି ସମସ୍ୟା ଦେଖିବାକୁ ମିଳିଥାଏ । ଏବେ ପ୍ରଶ୍ନ ଉଠୁଛି ଏହି ଭିଟାମିନ୍-ବି୧୨ ଅଭାବ କାହାଠାରେ ଅଧିକ ଦେଖାଦିଏ ।
ମହିଳା ନା ପୁରୁଷଙ୍କଠାରେ? ଏହା କେବଳ ଶାକାହାରୀ ନା ମାଂସାହାରୀଙ୍କଠାରେ ମଧ୍ୟ ଦେଖା ଦିଏ? ଚାଲନ୍ତୁ ଜାଣିବା ନୋଏଡାର ମେଟ୍ରୋ ହସ୍ପିଟାଲ୍ର ମେଡିସିନ୍ ଡାକ୍ତର ଅକ୍ଷୟ ଗୁଗାଙ୍କଠାରୁ । ଭିଟାମିନ୍-ବି ୧୨ର ଅଭାବ ଉଭୟ ପୁରୁଷ ଓ ମହିଳାଙ୍କଠାରେ ହୋଇଥାଏ । କିଛି ସ୍ଥିତିରେ ମହିଳାଙ୍କଠାରେ ଏହାର ଆଶଙ୍କା ଅଧିକ ରହିଥାଏ । ବିଶେଷକରି ଯେଉଁ ମହିଳାମାନେ ଶାକାହାରୀ, ଗର୍ଭବତୀ ଓ ବୟସ୍କ ହୋଇଥାନ୍ତି । ଦ୍ୱିତୀୟତଃ, ପୁରୁଷଙ୍କ କ୍ଷେତ୍ରରେ ଏହାର ଅଭାବ ସେତେବେଳେ ଦେଖାଦିଏ, ଯେତେବେଳେ ସେମାନେ ଖରାପ ଜୀବନଶୈଳୀ ଗ୍ରହଣ କରିବା ସହ ଅଧିକ ଧୂମପାନ କରୁଥାନ୍ତି ବା ୬୦ ବର୍ଷରୁ ଅଧିକ ବୟସ୍କଙ୍କଠାରେ ଏହାର ଆଶଙ୍କା ଅଧିକ ରହିଥାଏ । କାରଣ ଏହି ବୟସରେ ବ୍ୟକ୍ତିର ଅବଶୋଷଣ ତନ୍ତ୍ର ଦୁର୍ବଳ ରହିଥାଏ ।
ଲକ୍ଷଣ
ଲଗାତାର ଥକିବା ଓ ଦୁର୍ବଳ ଲାଗିବା, ହାତଗୋଡ଼ ଝିମ୍ ଝିମ୍ ହେବା, ମୁଣ୍ଡ ବୁଲାଇବା, ଧ୍ୟାନକେନ୍ଦ୍ରୀତ କରିବାରେ ସମସ୍ୟା, ଭୁଲିଯିବା, ଅବସାଦ ଓ ମୁଡ୍ ସ୍ୱିଇଂ, ଭୋକ ନ ହେବା ଓ ହୃଦ୍ ସ୍ପନ୍ଦନ ବଢିବା ଆଦି ଭିଟାମିନ୍-ବି୧୨ ଅଭାବର ଲକ୍ଷଣ । ଏହା ପ୍ରାୟତଃ ଶାକାହାରୀମାନଙ୍କଠାରେ ଅଧିକ ଦେଖା ଦେଇଥାଏ । ବୟସ ବଢିବା ସହ ଶରୀରରେ ପୋଷକ ତତ୍ତ୍ୱର ଅବଶୋଷଣ କମ୍ ହୋଇଥାଏ । ମଧୁମେହ ଦୀର୍ଘଦିନ ରହିବା ପରେ ଔଷଧ ଖାଇବା ଯୋଗୁ ଏହି ଅଭାବ ଦେଖା ଦେଇପାରେ । ଏହାକୁ ପରୀକ୍ଷା ଦ୍ୱାରା ଚିହ୍ନଟ କରାଯାଇଥାଏ। ଯଦି ଭିଟାମିନ୍-ବି ୧୨ର ସ୍ତର ୨୦୦ପିଜି/ ଏମ୍ଏଲ୍ରୁ କମ୍ ରହିଥାଏ, ତେବେ ଡାକ୍ତର ଡାଏଟ୍ରେ ପରିବର୍ତ୍ତନ ପାଇଁ ପରାମର୍ଶ ଦେଇଥାନ୍ତି ।
କେମିତି କରିବେ ନିୟନ୍ତ୍ରଣ?
ଦୁଧ, ଦହି, ପନୀର, ଅଣ୍ଡା, ମାଛ, ଚିକେନ୍ ଆଦି ବି ୧୨ ଯୁକ୍ତ ଖାଦ୍ୟ । ଯଦି ଶାକାହାରୀ ହୋଇଥାନ୍ତି, ତେବେ ଡାକ୍ତର ପରାମର୍ଶ କରି ସପ୍ଲିମେଣ୍ଟ ନେବା ଜରୁରି ।
