ନୂଆଦିଲ୍ଲୀ,୨୬/୦୪: ଭାରତର ସୁରକ୍ଷା ପ୍ରତି ବିପଦ ସୃଷ୍ଟିକଲା ଭଳି ଖବର ସାମ୍ନାକୁ ଆସିଛି । ପାକିସ୍ତାନ ବେଆଇନ ଭାବେ କବ୍ଜା କରିଥିବା କାଶ୍ମୀର(ପିଓକେ)ରେ ଚୀନ୍ ରାସ୍ତା ନିର୍ମାଣ କରୁଥିବା ଚିତ୍ର ସାଟେଲାଇଟରୁ ଦେଖିବାକୁ ମିଳିଛି । ଏହି ରାସ୍ତା ସିଆଚେନ୍ ଗ୍ଲେସିୟର ନିକଟ ଶକ୍ସଗାମ ଉପତ୍ୟାକାରେ ନିର୍ମାଣ ହେଉଛି । ୧୯୬୩ରେ ପିଓକେର ଅଂଶ ଥିବା ଶକ୍ସଗାମ୍କୁ ଚୀନ୍ ନେଇଯାଇଥିଲା । ଏହି ଉପତ୍ୟାକାରେ ଚୀନ୍ ନିଜ ରାଜପଥ ଜି-୨୧୯କୁ ଆଗକୁ ବଢ଼ାଉଛି । ଏହି ଅଞ୍ଚଳ ଚୀନ୍ର ଶିନ୍ଜିଆଙ୍ଗରେ ଆସୁଛି । ଏହା ସିଆଚୀନ୍ ଗ୍ଲେସିୟରର ଇନ୍ଦିରା କୋଲରୁ ୫୦ କିମି ଦୂର ଉତ୍ତର ଦିଗରେ ରହିଛି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଗତ ମାର୍ଚ୍ଚରୁ ଅଦ୍ୟାବଧି ଦୁଇ ଥର ସିୟାଚୀନ୍କୁ ଗସ୍ତ କରିଛନ୍ତି ।
ୟୁରୋପୀୟ ସ୍ପେସ୍ ଏଜେନ୍ସି ଏହି ସାଟେଲାଇଟ ଚିତ୍ର ଉତ୍ତୋଳନ କରିଛି । ଗତବର୍ଷ ଜୁନ୍ରୁ ଅଗଷ୍ଟ ମାସ ମଧ୍ୟରେ ଏହି ସଡ଼କ ନିର୍ମାଣ କରାଯାଇଥିବା ଜଣାପଡ଼ିଛି । ଭାରତୀୟ ସେନାର ଫାୟର ଆଣ୍ଡ୍ ଫୁରୀ କର୍ପସ୍ର ପୂର୍ବତନ କମାଣ୍ଡର ରାକେଶ ଶର୍ମା କହିଛନ୍ତି, ଚୀନ୍ ଦ୍ୱାରା ସେଠାରେ ନିର୍ମାଣ ହେଉଥିବା ରାସ୍ତା ସମ୍ପୂର୍ଣ୍ଣ ଭାବେ ବେଆଇନ । ଭାରତ କୂଟନୈତିକ ଉପାୟରେ ଏହାର ବିରୋଧ କରିବା ଉଚିତ । ଏହି ସଡ଼କ ଟ୍ରାନ୍ସ-କାରାକୋରମ ଟ୍ରାକ୍ଟରେ ରହିଛି । ଏହି ଅଞ୍ଚଳ ପୂର୍ବରୁ କାଶ୍ମୀରର ଅଂଶ ଥିଲାବେଳେ ସେଠାରେ ଭାରତର ଶାସନ ରହିଥିଲା । ଧାରା ୩୭୦ ହଟାଯିବା ପରେ କେନ୍ଦ୍ର ସରକାର ଯେଉଁ ନୂଆ ନକ୍ସା ଜାରି କରିଥିଲେ, ସେଥିରେ ଏହି ଅଞ୍ଚଳକୁ ମଧ୍ୟ ଭାରତର ସୀମାରେ ରଖାଯାଇଥିଲା । ଉକ୍ତ ଟ୍ରାକ୍ଟ ପ୍ରାୟ ୫,୩୦୦ ବର୍ଗ କିଲୋମିଟର ହେବ । ଏହାକୁ ୧୯୪୭ରେ ପାକିସ୍ତାନ କବ୍ଜା କରିନେଇଥିଲା । ପରେ ପାକିସ୍ତାନ ଚୀନ୍ ସହ ଦ୍ୱିପାକ୍ଷିକ ବୁଝାମଣା କରି ତାହାକୁ ଚୀନ୍କୁ ଦେଇ ଦେଇଥିଲା । ହେଲେ ଭାରତ ଏହି ଚୁକ୍ତିକୁ ସ୍ୱୀକାର କରେନାହିଁ । ବିଶେଷଜ୍ଞଙ୍କ ମତରେ ଅଧିକୃତ କାଶ୍ମୀରରେ କୌଣସି ପ୍ରକାର ପରିବର୍ତ୍ତନ ଭାରତର ସାର୍ବଭୌମତ୍ୱ ପ୍ରତ ବିପଦ ଏବଂ ଭାରତର ଅଞ୍ଚଳ ଉପରେ କବ୍ଜା କରିବା ଲାଗି ଷଡ଼ଯନ୍ତ୍ର ବୋଲି ବିବେଚନା କରାଯିବ । ଯଦି ଚୀନ୍କୁ ଏବେ ରୋକା ନ ଯାଏ ଏବଂ ସେଠାରେ ଏପରି ସଡ଼କ ଓ ଭିତ୍ତିଭୂମି ନିର୍ମାଣ ଜାରି ରହେ ତେବେ ତାହା ଭାରତର ସୁରକ୍ଷା ପ୍ରତି ବଡ଼ ବିପଦ।