ନୂଆଦିଲ୍ଲୀ ୦୫/୦୫: ୟୁଏଫ୍ଓ(ଅନ୍ଆଇଡେଣ୍ଟିଫାଏଡ୍ ଫ୍ଲାଇଙ୍ଗ୍ ଅବ୍ଜେକ୍ଟ)କୁ ନେଇ ସମଗ୍ର ବିଶ୍ୱରେ ଚର୍ଚ୍ଚା ଜୋର ଧରିଛି । କିନ୍ତୁ ୟୁଏସ୍ଓ ଅର୍ଥାତ୍ ଅନ୍ଆଇଡେଣ୍ଟିଫାଏଡ୍ ସବ୍ମର୍ଜଡ୍ ଅବ୍ଜେକ୍ଟ ବିଷୟରେ କେବେ ଶୁଣିଛନ୍ତି? ଏହି ବସ୍ତୁ ଆମ ମହାସାଗରଗୁଡ଼ିକରେ ଘୂରି ବୁଲୁଛନ୍ତି । ଏଗୁଡ଼ିକୁ ଦେଖାଯିବାର ରିପୋର୍ଟ ମଧ୍ୟ ସାମ୍ନାକୁ ଆସିଛି । ଏଗୁଡ଼ିକ ଉପରେ ମଧ୍ୟ ଯାଞ୍ଚ୍ ହୋଇଛି । ସରକାରଙ୍କର କୌଣସି ଗୁପ୍ତ ଯୋଜନା ସହ ଏଭଳି ବସ୍ତୁର ସମ୍ପର୍କ ରହିଛି ନା ବାସ୍ତବରେ ଏଗୁଡ଼ିକ ଏଲିଅନ୍ ଦ୍ୱାରା ସଂଚାଳିତ, ଏ ନେଇ ପ୍ରଶ୍ନ ଉଠିଛି । ୟୁଏଫ୍ଓକୁ ନେଇ ମଣିଷର ରୁଚି ବହୁ ପୁରୁଣା । କିନ୍ତୁ ପାଣି ତଳେ ଅଜ୍ଞାତ ବସ୍ତୁ ବିଷୟରେ ସେତେ ଚର୍ଚ୍ଚା ହୁଏନାହିଁ ।
କୁହାଯାଏ, ଖ୍ରିଷ୍ଟୋଫର କଲମ୍ବସ୍ ୧୪୯୨ ମସିହାରେ ନିଜର ଆବିଷ୍କାର ସମୟରେ ଏକ ୟୁଏଫ୍ଓ ଦେଖିଥିଲେ । ବର୍ତ୍ତମାନ ୟୁଏସ୍ଓକୁ ଦେଖିବାର ଘଟଣା ବଢୁଛି । ଆମେରିକୀୟ ନୌସେନା ଏ ବିଷୟରେ ଭଲଭାବେ ପରିଚିତ । କାରଣ ଏହା ପାଣି ତଳର ବସ୍ତୁଗୁଡ଼ିକୁ ଏପର୍ଯ୍ୟନ୍ତି ସବୁଠୁ ବଡ଼ ବିପଦ ବୋଲି କହିଛି । ତେବେ ଏଲିଅନ୍ କ’ଣ ଆକାଶ ସମେତ ପାଣି ତଳେ ବି ଯାତ୍ରା କରୁଛନ୍ତି?
ଏକ ଅନ୍ତର୍ଜାତୀୟ ଗଣମାଧ୍ୟମ ଡେଲି ଷ୍ଟାର୍ ଅନୁସାରେ, ୟୁଏଫ୍ଓ ଅଧ୍ୟୟନକର୍ତ୍ତା ଓ ଫିଲ୍ମ ନିର୍ମାତା ମାର୍କ ଖ୍ରିଷ୍ଟୋଫର ଲି କହିଛନ୍ତି ‘୫୦ ଦଶକରୁ ଆମେରିକୀୟ ନୌସେନାର ୟୁଏଫ୍ଓ ସହ ଅନେକ ଥର ସାମ୍ନା ସାମ୍ନି ହୋଇଛି । ନୌସେନା ଏହାକୁ ସବୁଠୁ ବଡ଼ ବିପଦ ରୂପେ ଚିହ୍ନଟ କରିଛି ।’ ନିକଟରେ ଏକ ରିପୋର୍ଟରେ ସାମ୍ନାକୁ ଆସିଥିଲା, ଟିକ୍ ଟାକ୍ ୟୁଏଫ୍ଓକୁ ସମୁଦ୍ରରୁ ବାହାରିଥିବା ଏକ ୟୁଏସ୍ଓ ଉପରେ ବୁଲୁଥିବା ଦେଖାଯାଇଥିଲା । ଖ୍ରିଷ୍ଟୋଫର ଲିଙ୍କ ଅନୁମାନ ଯେ ଟିକ୍ ଟାକ୍ ଓ ଅନ୍ୟ ୟୁଏଫ୍ଓ ନିଜ ଇଚ୍ଛା ଅନୁସାରେ ମହାସାଗରରେ ପ୍ରବେଶ କରିବାରେ ସକ୍ଷମ । ତେଣୁ ସବୁ ୟୁଏଫ୍ଓ ୟୁଏସ୍ଓ ଅଟନ୍ତି ।
