କେନ୍ଦ୍ରାପଡ଼ା/ରାଜନଗର,୨୬/୧୦: ‘ଦାନା’ ବାତ୍ୟା ପ୍ରଭାବରେ ଗଲା ୪ ଦିନ ହେଲା ବର୍ଷା ଲାଗି ରହିଛି, ଆଜିଯାଏ ସମ୍ପୂର୍ଣ୍ଣ ଛାଡ଼ିନାହିଁ । ନଦୀର ଜୁଆର ପାଣି ଓ ଲଗାଣ ବର୍ଷା ପାଣି ଜମି ରହି ଜନଜୀବନକୁ ବ୍ୟତିବ୍ୟସ୍ତ କରି ପକାଇଲାଣି । ଘରୁ ବାହାରକୁ ପାଦ ବଢାଇଲେ ଚାରିପଟେ ପାଣି । ଚୁଲିରେ ପାଣି ପଶିଯାଇଛି । ରୋଷେଇବାସ ବନ୍ଦ । ତିନି ଦିନ ହେଲା ବିଦ୍ୟୁତ ସଂଯୋଗ ନଥିବାରୁ ପାଇପ୍ ଯୋଗେ ପିଇବା ପାଣି ଯୋଗାଣ ବି ବନ୍ଦ । ପାଣିରେ ବୁଡ଼ି ରହିଥିବା ନଳକୂଅର ପ୍ରଦୂଷିତ ପାଣି ପିଇବାକୁ ବାଧ୍ୟ ହେଉଛନ୍ତି ଲୋକେ । - ଏ ଦୟନୀୟ ଚିତ୍ର ରାଜନଗର ବ୍ଲକ୍ର ବଗପାଟିଆ ଥଇଥାନ କେନ୍ଦ୍ରର ।
୨୦୧୭ ମସିହାରେ ବହୁ ପ୍ରତୀକ୍ଷିତ ସାତଭାୟା ଥଇଥାନ ପ୍ରକଳ୍ପ କାର୍ଯ୍ୟକାରୀ ହୋଇଥିଲା । ସେବର୍ଷ ମେ’ ମାସ ସୁଦ୍ଧା ସ୍ଥାନାନ୍ତର ହୋଇ ବଗପାଟିଆ ଥଇଥାନ କେନ୍ଦ୍ରକୁ ଆସିଥିଲେ ୫୭୧ ପରିବାର । ପରବର୍ତ୍ତୀ ସମୟରେ ବଞ୍ଚିତ ରହିଥିବା ୧୪୮ ପରିବାରରୁ ପ୍ରାୟ ୫୦ ପରିବାର ସେଠାରେ ଆସି ରହିଛନ୍ତି । ଭିଟାମାଟିର ମୋହ ତୁଟାଇ ବଗପାଟିଆ ଥଇଥାନ କେନ୍ଦ୍ରକୁ ଚାଲିଆସିଥିଲେ ଲୋକେ ଏଠାରେ ସୁରକ୍ଷିତ ଜୀବନଯାପନ କରିବେ ବୋଲି । ହେଲେ ଏଠାରେ ଜୀବନ ଅଧିକ ଦୁର୍ବିଷହ ହୋଇପଡ଼ିଛି । ‘ଦାନା’ ବାତ୍ୟା ଜନିତ ଲଗାଣ ବର୍ଷା ଓ ଜୁଆର ପାଣି ଲୋକଙ୍କ ଜୀବନକୁ ବିପନ୍ନ କରିଛି । ଘରୁ ବାହାରିବା କଷ୍ଟକର ହୋଇପଡ଼ିଲାଣି ଲୋକଙ୍କ ପାଇଁ । ବାତ୍ୟା ଥମିବା ପରେ ପ୍ରାୟ ୧୦୦୦ ଲୋକ ଘରକୁ ଫେରିଥିଲେ ମଧ୍ୟ ବିଦ୍ୟୁତ, ପାଣି, ଜାଳେଣି ସମସ୍ୟା ଯୋଗୁଁ ଦହଗଞ୍ଜ ହେଉଛନ୍ତି । ପାଣି ଘେରରେ ଥିବା ନଳକୂଅରୁ ପାଣି ସଂଗ୍ରହ କରି ଫୁଟାଇ ପିଉଛନ୍ତି । ସଂଯୋଗୀକରଣ ରାସ୍ତାରେ ପାଣି । ୧୯ଟି ଆପ୍ରୋଚ୍ ରୋଡ୍ରୁ ୮ଟି ରୋଡ୍ ଜଳଘେରିରେ ରହିଛି । ଲୋକେ ଜଳବନ୍ଦୀ ହୋଇ ରହିଛନ୍ତି ।
୨୩ ତାରିଖରୁ ୪ଦିନ ହେଲା ବିଦ୍ୟୁତ ସେବା ଠପ୍ ହୋଇଯାଇଛି । ଦାନା ଏଭଳି ଦୁର୍ଦ୍ଦଶା ଦେଇଛି ବଗପାଟିଆ ବାସୀଙ୍କୁ । ଥଇଥାନ ବେଳେ ସରକାରଙ୍କ ପକ୍ଷରୁ ଘର ତିଆରି କରିବାକୁ ଯେତିକି ଟଙ୍କା ମିଳିଥିଲା, ସେଥିରେ ଆଉ କିଛି ନିଜ ହାତରୁ ମିଶାଇ ଅର୍ଦ୍ଧାଧିକ ଲୋକ ଛାତ ଘର କରିଥିଲେ । ଅବଶିଷ୍ଟ ଲୋକ ଏବେ ମଧ୍ୟ ଅର୍ଥାଭାବରୁ ଘର ସମ୍ପୂର୍ଣ୍ଣ କରିନପାରି ଚାଳଛପର ଘରେ ରହୁଛନ୍ତି । ସ୍ଥାନାନ୍ତର ବେଳେ ସରକାର ଦେଇଥିବା ପ୍ରତିଶ୍ରୁତି ଏଯାଏ ପାଳନ କରିନଥିବାରୁ ଅଞ୍ଚଳବାସୀ ଏବେ ବି ସମସ୍ୟା ଭିତରେ ବଞ୍ଚୁଛନ୍ତି । ଅନ୍ୟ କିଛି ଚାରା ନାହିଁ । ‘ସାତଭାୟାରେ ଥିବା ବେଳେ ଜମିରେ ଚାଷବାଷ କରି ଚଳୁଥିଲୁ । ଛେଳିମେଣ୍ଢା ପାଳୁଥିଲୁ, ମାଛ ଧରୁଥିଲୁ । ଏଠିକି ଆସିଲା ପରେ କିଛି ନାହିଁ । ରୋଜଗାର ଉତ୍ସ ବନ୍ଦ ହୋଇଯାଇଛି । ସରକାର ୨ ଏକର ଲେଖାଏଁ ଚାଷଜମି ଯୋଗାଇଦେବେ ବୋଲି କହିଥିଲେ । ହେଲେ ଏଯାଏ ତା’ର ଦେଖାଦର୍ଶନ ନାହିଁ । ପିଲାମାନେ ଗୁଜରାଟ, କେରଳରେ ଯାଇ କାମ କଲେ ଘରେ ଚୁଲି ଜଳୁଛି । ନହେଲେ ଆମ ପାଖରେ ରୋଜଗାରର ଆଉ କିଛି ବିକଳ୍ପ ନାହିଁ । କଲୋନୀ ଚାରିପାଖ ଉଦ୍ବୃତ୍ତ ଜଳ ଘେରି ରହିଥିବାରୁ ଓ ବିଦ୍ୟୁତ ସଂଯୋଗ ୩ଦିନ ହେଲା ନଥିବାରୁ ପାନୀୟ ଜଳ ଯୋଗାଡ଼ କରିବାରେ ବହୁ ଅସୁବିଧା ହେଉଛି ବୋଲି ପୂର୍ବତନ ସରପଞ୍ଚ ସୁଦର୍ଶନ ରାଉତ କହିଛନ୍ତି ।
ସମୁଦ୍ର ଦାଉରୁ ସିନା ରକ୍ଷା ପାଇଗଲେ, ଏବେ ଆତଙ୍କ ହୋଇ ଉଭା ହୋଇଛି ବ୍ରାହ୍ମଣୀ, ପାଟଶାଳା ନଦୀ । ଫଳରେ ବର୍ଷାପାଣିରେ ରାସ୍ତା କର୍ଦ୍ଦମାକ୍ତ ହୋଇପଡ଼ିଛି । ଗ୍ରାମ୍ୟ ପାନୀୟ ଜଳ ଓ ପରିମଳ ବିଭାଗ ଟ୍ୟାଙ୍କର ଯୋଗେ ପାଣି ଯୋଗାଇ ଦେବାକୁ କହିଥିଲେ । ରାସ୍ତା ଖରାପ ଥିବାରୁ ଗାଡ଼ି ପହଞ୍ଚିବା ସମ୍ଭବପର ନୁହେଁ । କଥା ଏତିକିରେ ରହିନି, ଖାଲୁଆ ଜମିରେ ମାଟି ଫିଲିଂ କାମ କରିବାକୁ କୁହାଯାଇଥିଲେ ବି ହେଲାନାହିଁ । ଏଥିସହ ସଂଯୋଗୀକରଣ ରାସ୍ତାଗୁଡ଼ିକ ବି ଏଯାଏ ଅଧାପନ୍ତରିଆ ହୋଇ ପଡ଼ିଛି । କିଛି ଘଣ୍ଟା କାଳ ବର୍ଷା ପରେ ରାସ୍ତାରେ ଗାଡ଼ି ଚଳାଚଳ ଦୂରର କଥା ଚାଲିଚାଲି ଯିବା କଷ୍ଟକର ହୋଇପଡୁଛି ବୋଲି ସ୍ଥାନୀୟ ଲୋକେ କହିଛନ୍ତି ।
ସମୁଦ୍ର ପ୍ରଭାବିତ ସାତଭାୟା ଅଞ୍ଚଳର ୫୭୧ ପରିବାର ଇତିମଧ୍ୟରେ ବଗପାଟିଆରେ ରହିସାରିଲେଣି । ଘର ନିର୍ମାଣ ପାଇଁ ପ୍ରତି ପରିବାରକୁ ୧୦ ଡେସିମିଲ ଜମି ସହ ଦେଢ଼ ଲକ୍ଷ ଟଙ୍କା, ଖାଲଖମା ଜମି ପୋତିବା ଲାଗି ୧୦ ହଜାର ଟଙ୍କା ମିଳିଥିଲା । ହେଲେ ସେତିକି ଟଙ୍କାରେ ଖାଲୁଆ ଜମି ପୋତି ଘର ତିଆରି କରିବା ସମ୍ଭବପର ନଥିଲା । ଅର୍ଦ୍ଧାଧିକ ଅର୍ଥ କେବଳ ଜମିକୁ ପୋତିବାରେ ଖର୍ଚ୍ଚ ହୋଇଯାଇଥିଲା । ୩୬୮ ପରିବାର ନିଜ ହାତରୁ ମିଶାଇ ପକ୍କା ଘର କାମ ଶେଷ କରିଛନ୍ତି । ଅବଶିଷ୍ଟ ୨୦୩ ପରିବାର ଅର୍ଥାଭାବରୁ କାମ ସମ୍ପୂର୍ଣ୍ଣ କରି ପାରିନାହାନ୍ତି । ଝାଟିମାଟି ଚାଳଛପର ଘରେ ରହୁଛନ୍ତି ।
ପ୍ରଶାସନ ପକ୍ଷରୁ ଏଠାରେ ପାଣି, ବିଦ୍ୟୁତ ପରି ସେବା ଯୋଗାଇ ଦେଇଥିବା ବେଳେ ପଞ୍ଚାୟତ ଅଫିସ, ରାଜୀବ ଗାନ୍ଧି ସେବା କେନ୍ଦ୍ର ଗୃହ, ୩ଟି ଅଙ୍ଗନବାଡ଼ି କେନ୍ଦ୍ର, ଗୋଦାମ ଗୃହ ନିର୍ମାଣ ଆଦି ବିଭିନ୍ନ ପ୍ରକଳ୍ପ ନିର୍ମାଣ କାମ ସରିଥିଲା । ହେଲେ ଥଇଥାନ କେନ୍ଦ୍ରକୁ ସଂଯୋଗ କରୁଥିବା ୧୯ଟି ସଂଯୋଗୀକରଣ ରାସ୍ତା ପକ୍କା ହୋଇପାରି ନାହିଁ । ଗୁପ୍ତିଠାରୁ ବଗପାଟିଆ ଥଇଥାନ କେନ୍ଦ୍ର ପର୍ଯ୍ୟନ୍ତ ୨ କିଲୋମିଟର ରାସ୍ତା ପିଚୁ ହୋଇଥିଲେ ମଧ୍ୟ ତାହା ବିପର୍ଯ୍ୟସ୍ତ ଅବସ୍ଥାରେ ରହି ଲୋକଙ୍କ ଦୁର୍ଦ୍ଦଶା ବଢାଇଛି ।
