ୱାଶିଂଟନ,୧୯/୧୦: ଖଲିସ୍ତାନୀ ବିଚ୍ଛିନ୍ନତାବାଦୀ ନେତା ଗୁରପତୱନ୍ତ ସିଂହ ପନ୍ନୁଙ୍କ ହତ୍ୟା ମାମଲାରେ ଆମେରିକାର ଆଇନ ବିଭାଗ ଭାରତୀୟ ନାଗରିକ ତଥା ପୂର୍ବତନ ଗୁଇନ୍ଦା ଅଫିସର ବିକାଶ ଯାଦବଙ୍କ ନାମରେ ଚାର୍ଜସିଟ୍ ପ୍ରସ୍ତୁତ କରିଛି । ତାଙ୍କ ବିରୋଧରେ ହତ୍ୟା ଷଡ଼ଯନ୍ତ୍ର ଓ ମନିଲଣ୍ଡରିଂ ଦଫା ଲାଗିଛି । ଏଥିସହ ଆମେରିକାର ସଂଘୀୟ ତଦନ୍ତ ସଂସ୍ଥା ଏଫବିଆଇ ତାଙ୍କୁ ମୋଷ୍ଟ ୱାଣ୍ଟେଡ ତାଲିକାରେ ସାମିଲ କରିଛି । ଏଫବିଆଇ କହିଛି ବିକାଶ ଯାଦବ ଭାରତର ବିଦେଶୀ ଗୁଇନ୍ଦା ସଂସ୍ଥା ର (ଆରଏଡବ୍ଲ୍ୟୁ-ରିସର୍ଚ୍ଚ ଆଣ୍ଡ ଆନାଲିସିସ୍ ୱିଙ୍ଗ) ସହ ଜଡିତ ।
ଆମେରିକା ବିଦେଶ ବିଭାଗ କହିଛି କି ୩୯ ବର୍ଷୀୟ ବିକାଶଙ୍କୁ ଭାରତ ସରକାର ପଦରୁ ହଟାଇବା ସହ ଗିରଫ କରିଛନ୍ତି । ବିକାଶ ପୂର୍ବରୁ ଆମେରିକାରେ ଥିଲେ । କିଛି ଦିନ ତଳୁ ସେ ଭାରତ ଚାଲିଆସିଛନ୍ତି । ତାଙ୍କ ଘର ହରିଆଣାର ରେୱାଡି ଜିଲ୍ଲା ପ୍ରାଣପୁରା ଗାଁରେ । ଅକ୍ଟୋବର ୧୦ ତାରିଖରେ ତାଙ୍କୁ ଗିରଫ କରାଯାଇଥିବା ଖବର ଆସିଛି । ପନ୍ନୁ ହତ୍ୟା ମାମଲାରେ ନ୍ୟୁୟର୍କର ସଦର୍ଣ୍ଣ ଡିଷ୍ଟ୍ରିକ୍ଟ କୋର୍ଟ ଦୁଇଜଣ ଭାରତୀୟଙ୍କ ନାମରେ ଚାର୍ଜଫ୍ରେମ କରିଛନ୍ତି । ସେମାନଙ୍କ ମଧ୍ୟରେ ଜଣେ ୫୩ ବର୍ଷୀୟ ନିଖିଲ ଗୁପ୍ତା ହୋଇଥିଲା ବେଳେ ଅନ୍ୟ ଜଣଙ୍କ ନାମ ସିସି-୧ ଉଲ୍ଲେଖ କରାଯାଇଥିଲା । ସେହି ସିସି୧ ବିକାଶ ଯାଦବ ବୋଲି ଏଫବିଆଇ ଦର୍ଶାଇଛି । ୨୦୨୩ ଜୁନ ୩୦ରେ ନିଖିଲ ଗୁପ୍ତାଙ୍କୁ ଚେକ୍ ଗଣରାଜ୍ୟରୁ ଗିରଫ କରାଯାଇଥିଲା । ଗତ ଜୁନ ୧୪ରେ ତାଙ୍କୁ ଆମେରିକା ପ୍ରତ୍ୟର୍ପଣ କରାଯାଇଛି । ଏବେ ସେ ଆମେରିକା ଜେଲ୍ରେ ଅଛନ୍ତି ।
ଚାର୍ଜସିଟ୍ରେ ଏଫବିଆଇ ଦର୍ଶାଇଛି କି ବିକାଶ ହିଁ ଏହି ହତ୍ୟା ମାମଲାରେ ନିଖିଲଙ୍କୁ ସାମିଲ କରିଛନ୍ତି । ନିଖିଲଙ୍କୁ ସେ ପନ୍ନୁଙ୍କ ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରିବା ସହ ହତ୍ୟା କରିବାକୁ ନିର୍ଦ୍ଦେଶ ଦେଇଥିଲେ । ପନ୍ନୁଙ୍କ ଠିକଣା, ମୋବାଇଲ ନମ୍ବର ଓ ନିୟମିତ ଯିବା ଆସିବା କରୁଥିବା ସ୍ଥାନ ସମ୍ପର୍କରେ ସବିଶେଷ ତଥ୍ୟ ସେ ନିଖିଲଙ୍କୁ ଦେଇଥିଲେ । ଏହା ପରେ ପନ୍ନୁଙ୍କୁ ହତ୍ୟା କରିବା ଲାଗି ନିଖିଲ ଜଣେ ସୁପାରି କିଲରଙ୍କ ସହ ଯୋଗାଯୋଗ କରିଥିଲେ । ପ୍ରକୃତରେ ଏହି ସୁପାରି କିଲର ଜଣକ ଆମେରିକାର ଡିଇଏ (ଡ୍ରଗ ଏନ୍ଫୋର୍ସମେଣ୍ଟ ଆଡମିନିଷ୍ଟ୍ରେସନ)ରେ ଗୁପ୍ତ ଏଜେଣ୍ଟ ଭାବେ କାର୍ଯ୍ୟ କରୁଥିଲେ । ବିକାଶ ଏହି ହତ୍ୟା ଲାଗି ୧ ଲକ୍ଷ ଡଲାର (ପ୍ରାୟ ୮୩ ଲକ୍ଷ ଟଙ୍କା) ଦେବାକୁ ଯୋଜନା ପ୍ରସ୍ତୁତ କରିଥିଲେ । ଅଗ୍ରୀମ ୧୫ ହଜାର ଡଲାର ଦିଆଯାଇଥିଲା । କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଅଭିଯୋଗ କରିଥିଲେ କି ତାଙ୍କ ଦେଶରେ ହୋଇଥିବା ହରଦିପ ସିଂହ ନିଜ୍ଜର ହତ୍ୟା ଘଟଣାରେ ବିକାଶଙ୍କ ସମ୍ପୃକ୍ତି ରହିଛି । କିନ୍ତୁ ଆମେରିକା ଏହାକୁ ଖଣ୍ଡନ କରିଛି । ଇତିମଧ୍ୟରେ ଭାରତ କହିଛି କି ବିକାଶ ଯାଦବ ଭାରତ ସରକାରଙ୍କ ଅଧିକାରୀ ନୁହନ୍ତି । ଏକଥା ଆମେରିକା ପ୍ରଶାସନକୁ ଜଣାଇ ଦିଆଯାଇଛି । ଏହି ମାମଲାରେ ଆମେରିକା ସହ ନିୟମିତ ଯୋଗାଯୋଗ କରାଯାଉଛି ।
