ନୂଆଦିଲ୍ଲୀ, ୯।୪: ଲୋକଙ୍କୁ ଘାରିଛି ଘିବଲି ନିଶା । ଘିବଲି ସବୁ କିଛି କରୁଛି । ଲୋକଙ୍କର ଫଟୋକୁ କାଟୁର୍ନ ବନଉଛି, ଭିଡିଓ ବି କରୁଛି । ଯାହା ପରେ ସେସବୁ ଫଟୋକୁ ଲୋକେ ସୋସିଆଲ ମିଡିଆରେ ସେୟାର କରୁଛନ୍ତି । ହେଲେ ଲୋକଙ୍କ ଫଟୋକୁ କାର୍ଟୁନ ବନାଉଥିବା ଏହି ଘିବଲି ଯେ କେତେ ବିପଦପୂର୍ଣ୍ଣ, ତାହା ଚିନ୍ତା କରିବା କଳ୍ପନା ବାହାରେ । ଥରେ ଭାବିଛନ୍ତି କି ? ଏହି ଘିବଲିରେ ଆମେ ଯେଉଁ ଫଟୋ, ଭିଡିଓ ଦେଉଛେ ସେସବୁ ବ୍ୟକ୍ତିଗତ ତଥ୍ୟ ଲିକ୍ ହେଉନି ତ ? ଏସବୁ ପ୍ରଶ୍ନକୁ ନେଇ ଏବେ ଚିନ୍ତାରେ ୟୁଜର୍ସ । ଆସନ୍ତୁ ଜାଣିବା ଘିବଲି ଜରିଆରେ ଆପଣଙ୍କର କେଉଁ କେଉଁ ତଥ୍ୟ ଲିକ୍ ହେଉଛି ଏବଂ କେଉଁ ପ୍ରକାରର ବିପଦ ରହିଛି ?
ବଢ଼ିଲା AI ଭୟ । ChatGPT ଜରିଆରେ ଏବେ ସହଜରେ ହୋଇପାରୁଛି ଘିବଲି ଇମେଜ୍ । ChatGPT ପାଖରେ ଆପଣଙ୍କର ମାତ୍ର, ଗୋଟିଏ ଫଟୋ ଥିଲେ ବି ଏହା ମାଧ୍ୟମରେ ଖୁବ୍ ସହଜରେ ହୋଇପାରିବ ଫେକ ଅଧାର ଓ ପାନ କାର୍ଡ । ଏହି ଆଧାର କାର୍ଡଗୁଡ଼ିକ ମୂଳ କାର୍ଡ ସହିତ ଏତେ ମେଳ ଖାଉଛି ଯେ ଏହା ଭିତରୁ କେଉଁଟି ଅସଲି ଓ କେଉଁଟି ନକଲି ଡକ୍ୟୁମେଣ୍ଟ ଜାଣିବା ବି ମୁସ୍କିଲ ହେବ । ଏକ ଜାତୀୟ ଗଣମାଧ୍ୟମ ଦ ଇକୋନୋମିକ୍ସ ଟାଇମ୍ସ ଅନୁସାରେ, Chat GPT ଜରିଆରେ ସୋସିଆଲ ମିଡିଆରେ ଏକାଧିକ ସୋସିଆଲ ମିଡିଆ ୟୁଜର୍ସ ଏଭଳି ଫେକ୍ ଆଧାରକାର୍ଡ ଓ ପାନ କାର୍ଡକୁ ସେୟାର କରିଛନ୍ତି । ଜଣେ ୟୁଜର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ବ୍ରାଜିଲର ଫୁଟବଲ ଖେଳାଳି ଖ୍ରିଷ୍ଟିଆନୋ ରୋନାଲ୍ଡୋଙ୍କ ଆଧାର କାର୍ଡ ପାଇଁ ଅନୁରୋଧ କରିଥିଲା । ମାତ୍ର, କିଛି ମିନିଟ ମଧ୍ୟରେ ଉଭୟଙ୍କ ଆଧାର କାର୍ଡ ଜେନେରେଟ ହୋଇଥିଲା । ଯାହାକି ଅବିକଳ ଆଧାର କାର୍ଡ ଭଳି ଦେଖାଯାଉଛି ।
ସରକାରଙ୍କ ଦ୍ବାରା ଜାରି କରାଯାଇଥିବା ପରିଚୟ ଏବଂ ନାଗରିକତା ଡକ୍ୟୁମେଣ୍ଟକୁ ନକଲି କରିବା ଏବେ ସହଜ ହେଲାଣି । ଏହି କାର୍ଯ୍ୟକୁ ଅତ୍ୟନ୍ତ ସହଜ କରିଦେଇଛି OpenAIର ChatGPT । ଫଳରେ ଆହୁରି ସାଇବର କ୍ରାଇମ ବଢ଼ିବାର ଆଶଙ୍କା ଦେଖାଦେଇଛି । କେବଳ ଆଧାର କି ପାନ କାର୍ଡ ନୁହେଁ Chat GPT ଜରିଆରେ ପାସପୋର୍ଟ ଓ ଭୋଟର ଆଇଡି ବି କରିହେବ । GPT-40 ନକଲି ପେମେଣ୍ଟ ରସିଦ ମଧ୍ୟ ତିଆରି କରିପାରୁଛି । ଯାହା ଦ୍ବାରା ଅସଲ ରସିଦ ଏବଂ ନକଲ ମଧ୍ୟରେ ପାର୍ଥକ୍ୟ ଜଣାପଡ଼ୁନାହିଁ ।
କହିରଖୁ କି, ଗତ ସପ୍ତାହ ମଧ୍ୟରେ, ଏଆଇ ଇମେଜ୍ ଜେନେରେଟର ବ୍ୟବହାର କରି ଲୋକମାନେ ୭୦୦ ନିୟୁତ ‘ଘିବ୍ଲୀ’ ଫଟୋ ସୃଷ୍ଟି କରିଛନ୍ତି । ଠକମାନେ ଲୋକଙ୍କ ବିଶ୍ବାସ ଜିତିବା ଏବଂ ସେମାନଙ୍କୁ ଠକିବା ପାଇଁ ଡକ୍ୟୁମେଣ୍ଟ ଜାଲିଆତିକୁ ଏକ ଅସ୍ତ୍ର ଭାବରେ ବ୍ୟବହାର କରିଆସୁଛନ୍ତି । ନକଲି ଡକ୍ୟୁମେଣ୍ଟ ତିଆରି କରିବା ଏବେ ପୂର୍ବ ଅପେକ୍ଷା ଦ୍ରୁତ ଏବଂ ସହଜ ହୋଇଯାଇଛି । ଅପବ୍ୟବହାରକୁ ରୋକିବା ପାଇଁ GPT-40ରେ ତିଆରି ହେଉଥିବା ଫଟୋରେ C2PA ମେଟାଡେଟାକୁ ଯୋଡ଼ିଛି OpenAI । ଯାହା ଦ୍ବାରା ଜଣାପଡ଼ିବ ସେହି ଫଟୋ ଏଆଇ ଦ୍ବାରା ପ୍ରସ୍ତୁତ କରାଯାଇଛି କି ନାହିଁ ।
ଷ୍ଟୁଡିଓ ଘିବଲିରେ ଫଟୋ ଦେଉଥିଲେ କିଛି ଗୁରୁତ୍ୱପୂର୍ଣ୍ଣ ଦିଗ ଉପରେ ଧ୍ୟାନ ଦିଅନ୍ତୁ । ଯଦି ଆପଣଙ୍କର ସମସ୍ତ ତଥ୍ୟ କୌଣସି ଆପ୍ କିମ୍ୱା ଚାଟ୍ ଜିପିଟିରେ ସବୁଦିନ ପାଇଁ ରହିଯାଏ, ତେବେ ଭବିଷ୍ୟତରେ ବଡ଼ ଅସୁବିଧାର ସମ୍ମୁଖୀନୱ ହୋଇପାରନ୍ତି । ଏଥିପାଇଁ ସେଟିଂରେ ୟୁଜ୍ ମାଇ ଡାଟାକୁ ଅଫ୍ କରିଦିଅନ୍ତୁ । ଏହାପରେ ଘିବିଲିରେ ଫଟୋ ଏଡିଟ୍ କଲେ ଏହାର ଦୁରୁପୋଯୋଗପ ଆଶଙ୍କା କମିଯିବ । ଆପଣଙ୍କ ଫୋନରେ ଥିବା ଯେ କୌଣସି ଆପ୍ରେ ୟୁଜ୍ ମାଇ ଡାଟାକୁ ଅଫ୍ କରିଦିଅନ୍ତୁ । ଏସବୁ ସତ୍ତ୍ୱେ, ChatGPT ଭଳି ଏଆଇ ଆପ୍ରେ ନିଜ ଫଟୋ ଏଡିଟ୍ କରିବା ପୂର୍ବରୁ ସତର୍କତା ଅବଲମ୍ୱନ କରିବା ଆବଶ୍ୟକ ।
