ପ୍ୟାରିସ୍,୩୧/୦୫: ଚଳିତ ଫ୍ରେଞ୍ଚ ଓପନ ଗ୍ରାଣ୍ଡସ୍ଲାମ୍ର ଷଷ୍ଠ ଦିବସରେ ବିପର୍ଯ୍ୟୟ ଘଟିନଥିଲେ ହେଁ ଅନେକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିଛି । ବିଶେଷ କରି ପୁରୁଷ ବର୍ଗରେ ଅଧିକାଂଶ ମ୍ୟାଚ୍ ଫଳାଫଳ ବାହାରିବାକୁ ୩ଘଣ୍ଟାରୁ ଅଧିକ ସମୟ ଲାଗିଛି । ମହିଳା ବର୍ଗରେ ତାରକା ଖେଳାଳିମାନେ ଆଧିପତ୍ୟ ଜାରି ରଖିଛନ୍ତି । ଟପ୍ ସିଡ୍ ଅର୍ନ୍ୟା ସାବାଲେଙ୍କା, ଡିଫେଣ୍ଡିଂ ଚାମ୍ପିଅନ୍ ଇଗା ସ୍ୱିଟେକ ପ୍ରମୁଖ ସହଜ ବିଜୟ ହାସଲ କରି ପ୍ରି-କ୍ୱାର୍ଟର (ଚତୁର୍ଥ ରାଉଣ୍ଡ୍)ରେ ସ୍ଥାନ ପକ୍କା କରିଛନ୍ତି ।
ମହିଳା ସିଙ୍ଗଲ୍ସ ତୃତୀୟ ରାଉଣ୍ଡ୍ରେ ଟପ ସିଡ୍ ସାବାଲେଙ୍କାଙ୍କ ଆଧିପତ୍ୟ ଜାରି ରହିଥିଲା । ସେ ମ୍ୟାଚ ଆରମ୍ଭରୁ ଶେଷ ପର୍ଯ୍ୟନ୍ତ ପ୍ରଭାବ ବିସ୍ତାର କରି ଖେଳି ସହଜ ବିଜୟ ହାସଲ କରିଥିଲେ । ସର୍ବିୟାର ଓଲଗା ଡାନିଲୋଭିକ୍ଙ୍କୁ ୬-୨, ୬-୩ ସେଟ୍ରେ ହରାଇବା ପାଇଁ ସାବାଲେଙ୍କାଙ୍କୁ ମାତ୍ର ୧ଘଣ୍ଟା ୧୯ମିନିଟ ଲାଗିଥିଲା । ସେହିପରି ଡିଫେଣ୍ଡିଂ ଚାମ୍ପିଅନ୍ ସ୍ୱିଟେକ ୧ଘଣ୍ଟା ୫୪ମିନିଟ୍ ମଧ୍ୟରେ ରୋମାନିଆର ଜାକଲିନ ଖ୍ରୀଷ୍ଟିଆନଙ୍କୁ ୬-୨, ୭-୫ ସେଟ୍ରେ ପରାସ୍ତ କରିଥିଲେ । ଅଷ୍ଟମ ସିଡ୍ ତଥା ଅଲିମ୍ପିକ ଚାମ୍ପିଅନ୍ କ୍ୱିନେନ ଝେଙ୍ଗ ମଧ୍ୟ ୮୬ମିନିଟ୍ ମଧ୍ୟରେ ତୃତୀୟ ରାଉଣ୍ଡ ମୁକାବିଲା ଜିତି ପ୍ରି-କ୍ୱାର୍ଟରରେ ସ୍ଥାନ ପକ୍କା କରିଥିଲେ । ସେ କାନାଡ଼ାର ଭିକ୍ଟୋରିଆ ମବୋକୋଙ୍କୁ ୬-୩, ୬-୪ ସେଟ୍ରେ ହରାଇଥିଲେ । ଅନ୍ୟ ତୃତୀୟ ରାଉଣ୍ଡ୍ ମ୍ୟାଚ୍ରେ ୧୬ତମ ସିଡ୍ ଆମଣ୍ଡା ଆମିନିସୋଭା ୭-୬(୭-୪), ୬-୪ ସେଟ୍ରେ କ୍ଲାରା ଟସନଙ୍କୁ ଓ ଲୁଡମିଲା ସାମସୋନୋଭା ୬-୨, ୬-୩ ସେଟ୍ରେ ଡାରିୟା ୟାସ୍ତ୍ରେମସ୍କାଙ୍କୁ ପରାସ୍ତ କରିଥିଲେ ।
ପୁରୁଷ ସିଙ୍ଗଲ୍ସ ତୃତୀୟ ରାଉଣ୍ଡ୍ରେ ଦଶମ ସିଡ୍ ହୋଲଗର ରୁନେ ସଂଘର୍ଷପୂର୍ଣ୍ଣ ବିଜୟ ହାସଲ କରିଥିଲେ । ଫ୍ରାନ୍ସର କ୍ୱେଣ୍ଠିନ ହେଲିସ୍ଙ୍କ ବିପକ୍ଷରେ ରୁନେ ୪-୬, ୬-୨, ୫-୭, ୭-୫, ୬-୨ ସେଟ୍ରେ ବିଜୟ ହାସଲ କରିଥିଲେ । ଏହି ମ୍ୟାଚ୍ ଜିତିବା ପାଇଁ ତାଙ୍କୁ ୩ଘଣ୍ଟା ୧୯ମିନିଟ୍ ଲାଗିଥିଲା । ଅଷ୍ଟମ ସିଡ୍ ମୁସେଟ୍ଟି ମଧ୍ୟ ୩ଘଣ୍ଟା ୨୫ ମିନିଟ୍ ଧରି ଲଢ଼େଇ କରିବା ପରେ ଆର୍ଜେଣ୍ଟିନାର ମାରିଆନୋ ନାଭୋନଙ୍କୁ ୪-୬, ୬-୪, ୬-୩, ୬-୨ ସେଟ୍ରେ ହରାଇଥିଲେ । ଦ୍ୱାଦଶ ସିଡ୍ ଟମି ପଲ୍ ଓ ୨୪ତମ ସିଡ୍ କାରେନ କାଚାନୋଭଙ୍କ ମଧ୍ୟରେ ୪ଘଣ୍ଟା ୭ ମିନିଟ୍ ଧରି ଘମାଘୋଟ ଲଢ଼େଇ ହୋଇଥିଲା । ଶେଷରେ ପଲ ୬-୩, ୩-୬, ୭-୬(୯-୭), ୩-୬, ୬-୩ ସେଟ୍ରେ ଜିତି କାଚାନୋଭଙ୍କୁ ବିଦାୟ ରାସ୍ତା ଦେଖାଇଥିଲେ । ୨୫ତମ ସିଡ୍ ଆଲେକ୍ସି ପପିରିନ ୩ଘଣ୍ଟା ୧ ମିନିଟ୍ର ସଂଘର୍ଷ ପରେ ନ୍ୟୁନୋ ବୋର୍ଜେସଙ୍କୁ ୬-୪, ୭-୬(୧୩- ୧୧), ୭-୬(୭-୫) ସେଟ୍ରେ ହରାଇ ପ୍ରି-କ୍ୱାର୍ଟରରେ ପ୍ରବେଶ କରିଥିଲେ ।
