ଭୁବନେଶ୍ୱର ୧୧/୦୪: ପ୍ରାୟ ସମସ୍ତେ ଏକଥା ଶୁଣିଥିବେ ଯେ କୁହାଯାଏ ଫ୍ରିଜ୍ ପାଣି ସ୍ୱାସ୍ଥ୍ୟ ପାଇଁ କ୍ଷତିକାରକ । ସମସ୍ତଙ୍କର ଧାରଣା ଯେ ଏହା ଗଳା ଖରାପ କରିବା ସହ କାଶ-ଥଣ୍ଡା ପରି ସମସ୍ୟାକୁ ବହୁଗୁଣିତ କରିଥାଏ । କିନ୍ତୁ କେବେ ଶୁଣିଛନ୍ତି ଫ୍ରିଜ୍ ପାଣି ପେଟ ସମସ୍ୟାର ମଧ୍ୟ କାରଣ ହୋଇପାରେ । ଯଦି ଶୁଣିନାହାନ୍ତି, ତେବେ ଚାଲନ୍ତୁ ଜାଣିବା ଡାଏଟିସିଆନ୍ ଓ ନ୍ୟୁଟ୍ରିସନିଷ୍ଟ ଦିବ୍ୟାଙ୍କଠାରୁ । କେତେକ ସ୍ଥିତିରେ ଫ୍ରିଜ୍ ପାଣି ପେଟ ସମସ୍ୟାକୁ ବଢାଇଥାଏ ।
ଥଣ୍ଡା ପାଣିର ଝଟ୍କା : ଯଦି ଆପଣ ହଠାତ୍ ଫ୍ରିଜ୍ରୁ ପାଣି କାଢି ପିଉଥାନ୍ତି, ତେବେ ପେଟକୁ ଝଟ୍କା ଲାଗିଥାଏ । ଏହି ସ୍ଥିତିରେ ବ୍ୟକ୍ତି ପେଟରେ ଯନ୍ତ୍ରଣା କିମ୍ବା ସମସ୍ୟା ଦେଖାଦେଇପାରେ । ଯଦି ସମସ୍ୟାରୁ ରକ୍ଷା ପାଇବାକୁ ବାହାନ୍ତି, ତେବେ ମାଠିଆ ପାଣି ବ୍ୟବହାର କରିପାରନ୍ତି ।
ଶୀଘ୍ର ଶୀଘ୍ର ପାଣି ପିଇବା : କେତେକ ଲୋକଙ୍କ ପାଖରେ ଶାନ୍ତିରେ ବସି ପାଣି ପିଇବାକୁ ମଧ୍ୟ ସମୟ ନଥାଏ । ତେଣୁ ସେମାନେ ଶୀଘ୍ର ଶୀଘ୍ର ପାଣି ପିଇବାକୁ ପସନ୍ଦ କରିଥାନ୍ତି । ଏଭଳି ସ୍ଥିତିରେ ଥଣ୍ଡା ପାଣି ପିଇଲେ ଅଧିକ ପାଣି ପିଇଥାନ୍ତି । ଫଳରେ ପେଟ ଫୁଲିବା ସହ ସମସ୍ୟା ସୃଷ୍ଟି ହୋଇପାରେ । ଏଥିରୁ ରକ୍ଷା ପାଇବା ପାଇଁ ଶାନ୍ତ ଭାବେ ବସି ଧୀରେ ଧୀରେ ପାଣି ପିଇବା ଆବଶ୍ୟକ ।
ସ୍ୱଚ୍ଛ ପାଣି ନ ପିଇବା : ଯଦି ପାଣି ସ୍ୱଚ୍ଛ ହେବା ପରିବର୍ତ୍ତେ ବ୍ୟାକ୍ଟେରିଆ, ଭୂତାଣୁ ବା ଅନ୍ୟ କୌଣସି ଜୀବାଣୁଯୁକ୍ତ ହୋଇଥାଏ । ତେବେ ପେଟ ସମସ୍ୟା ସୃଷ୍ଟି ହେବା ସ୍ୱାଭାବିକ୍ । ଏହି ସ୍ଥିତିରୁ ଦୂରେଇ ରହିବା ପାଇଁ ଫ୍ରିଜ୍ରେ ପାଣି ରଖିବା ପୂର୍ବରୁ ଏହାକୁ ଭଲ ଭାବେ ଫିଲ୍ଟର୍ କରି ନେବା ଉଚିତ୍ ।
କେମିକାଲ୍ ଲିକେଜ୍ : କେତେକ ପ୍ଲାଷ୍ଟିକ୍ ପାଣି ବୋତଲ ବା କଣ୍ଟେନର୍ର ପାଣିରେ BPH କିମ୍ବା Phethalates ପରି ରସାୟନ ମିଶିଯାଇଥାଏ । ଯାହା ସମ୍ଭବତଃ ହର୍ମୋନ୍ ଅସନ୍ତୁଳନ କିମ୍ବା ଅନ୍ୟାନ୍ୟ ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ । ଏହି ସମସ୍ୟାରୁ ମୁକ୍ତି ପାଇବା ପାଇଁ ପ୍ଲାଷ୍ଟିକ୍ ବୋତଲ୍ ପରିବର୍ତ୍ତେ କାଚ ବା ଅନ୍ୟାନ୍ୟ ଧାତୁର ବୋତଲ ବ୍ୟବହାର କରିବା ଉଚିତ୍ ।
