ଲକ୍ଷ୍ନୌ, ୨୭/୦୪: ଚଳିତ ଆଇପିଏଲ୍ରେ ଶନିବାର ରାଜସ୍ଥାନ ରୟାଲ୍ସ ଓ ଲକ୍ଷ୍ନୌ ସୁପରଜାଏଣ୍ଟ୍ସ ପରସ୍ପରକୁ ଭେଟିବେ । ସୁପରଜାଏଣ୍ଟ୍ର ଘରୋଇ ଗ୍ରାଉଣ୍ଡ ଏକାନ୍ନା ଷ୍ଟାଡ଼ିୟମ୍ରେ ଏହି ମ୍ୟାଚ୍ ଖେଳାଯିବ । ରାଜସ୍ଥାନ ରୟାଲ୍ସ ପ୍ରଥମ ଦଳ ଭାବେ ପ୍ଲେ-ଅଫ୍ରେ ପହଞ୍ଚିବାକୁ ଯୋଜନା କରୁଥିବାବେଳେ ଘରୋଇ ଦଳ ପୂର୍ବ ପରାଜୟର ପ୍ରତିଶୋଧ ନେବା ଲକ୍ଷ୍ୟରେ ରହିଛି । ଘରୋଇ ଗ୍ରାଉଣ୍ଡ୍ରେ ସୁପରଜାଏଣ୍ଟ୍ସର ପଲା ଭାରି ଜଣା ପଡ଼ୁଥିଲେ ହେଁ ଏହି ମ୍ୟାଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ଉଭୟ ଦଳର ପ୍ରଦର୍ଶନରେ ଅନେକ ସାମଞ୍ଜସ୍ୟ ରହିଛି ।
ଉଭୟ ଦଳର ଉପରଭାଗ ବ୍ୟାଟରମାନେ ଚମତ୍କାର ଫର୍ମରେ ରହିଛନ୍ତି ଓ ଦଳକୁ ଜିତାଇବାରେ ପ୍ରମୁଖ ଭୂମିକା ନିର୍ବାହ କରୁଛନ୍ତି । ତେଣୁ ନିମ୍ନ କ୍ରମ ବ୍ୟାଟରମାନଙ୍କୁ ପରିଶ୍ରମ କରିବାକୁ ପଡ଼ୁନାହିଁ । ଠିକ୍ ସେହିପରି ଉଭୟ ଦଳର ବୋଲିଂ ବିଭାଗ ଶକ୍ତିଶାଳୀ ଓ ଯଥେଷ୍ଟ ବିଭିନ୍ନତା ରହିଛି । ଉଭୟ ଦଳ ମାର୍ଚ୍ଚ ୨୪ ତାରିଖରେ ପରସ୍ପରକୁ ଭେଟିଥିଲେ । ରାଜସ୍ଥାନ ରୟାଲ୍ସ ଉକ୍ତ ମ୍ୟାଚ୍କୁ ୨୦ ରନ୍ରେ ଜିତିଥିଲା । ଉଭୟ ଦଳର ଏହା ପ୍ରଥମ ମ୍ୟାଚ୍ ରହିଥିଲା। ବର୍ତ୍ତମାନ ସମୟ ବଦଳିଛି । ସୁପରଜାଏଣ୍ଟ୍ସ ଚମତ୍କାର ଫର୍ମରେ ରହିଛି । ରୟାଲ୍ସ ଦଳ ଟେବୁଲ୍ ଟପ୍ପର ରହିଥିବାରୁ ଆସନ୍ତା କାଲିର ମ୍ୟାଚ୍ ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି ।
ଶନିବାର ପ୍ରଦର୍ଶନ ଅପେକ୍ଷା ରଣନୀତି ବେଶ୍ ଗୁରୁତ୍ୱପୂର୍ଣ୍ଣ ହେବ । ଶନିବାର ପେସ୍ ବୋଲିଂ ବିସ୍ମୟ ମୟଙ୍କ ଯାଦବ ପ୍ରତ୍ୟାବର୍ତ୍ତନ କରିବା ସମ୍ଭାବନା ରହିଛି । ସେ ଫିଟ୍ ଘୋଷିତ ହେଲେ ୟଶ ଠାକୁର ଏକାଦଶରୁ ବାଦ ପଡ଼ିବେ । ସେହିପରି ରାଜସ୍ଥାନ ରୟାଲ୍ସ ଦଳ ଅପରିବର୍ତ୍ତିତ ରଖିବ ।
ସୱାଇ ମାନସିଂ ଷ୍ଟାଡ଼ିୟମ୍(ରାଜସ୍ଥାନ ରୟାଲ୍ସର ଘରୋଇ ଗ୍ରାଉଣ୍ଡ) ତୁଳନାରେ ଏକାନ୍ନା ପିଚ୍ ସାମାନ୍ୟ ମନ୍ଥର । ଆସନ୍ତା କାଲି ନାଲି ମାଟିରେ ପ୍ରସ୍ତୁତ ପିଚ୍ରେ ଖେଳ ହୋଇପାରେ । ସୁପରଜାଏଣ୍ଟ୍ସ ଘରୋଇ ଗ୍ରାଉଣ୍ଡ୍ରେ ୩ଟି ମ୍ୟାଚ୍ ଖେଳିଛି ଓ ଏଥିରୁ କଳା ମାଟିରେ ପ୍ରସ୍ତୁତ ପିଚ୍ରେ ୨ଟି ମ୍ୟାଚ୍ ଖେଳି ବିଜୟ ହାସଲ କରିଛି । ଏହି ପିଚ୍ ସ୍ପିନରଙ୍କୁ ସହାୟତା କରିବ । ମାତ୍ର ରାଜସ୍ଥାନ ରୟାଲ୍ସ ନିକଟରେ ରବି ଅଶ୍ୱିନ ଓ ୟୁଝବେନ୍ଦ୍ର ଚହଲଙ୍କ ଭଳି ସ୍ପିନର ରହିଥିବାରୁ ସୁପରଜାଏଣ୍ଟ୍ସ ନାଲି ମାଟିରେ ପ୍ରସ୍ତୁତ ପିଚ୍କୁ ଚୟନ କରିପାରେ ।