ନୂଆଦିଲ୍ଲୀ: କେବଳ ହାଇ-ସ୍ପିଡ୍ ରେଳ ନେଟୱାର୍କ, ସର୍ବୋତ୍ତମ ବିମାନବନ୍ଦର ଏବଂ ଭୂମିକମ୍ପ-ପ୍ରତିରୋଧୀ କୋଠା ନୁହେଁ। ଜାପାନ ଏହାର ଭିତ୍ତିଭୂମି ବିକାଶରେ ଆଉ ଦୁଇ ପାଦ ଆଗକୁ ବଢ଼ିଛି ।  ଜାପାନ ଏବେ ବିଶ୍ୱର ଦ୍ରୁତତମ ଇଣ୍ଟରନେଟ୍ ହାସଲ କରିଛି । ଗବେଷକମାନେ ପ୍ରତି ସେକେଣ୍ଡରେ ୧.୦୨ ପେଟାବିଟ୍‌ ଇଣ୍ଟରନେଟ ସ୍ପିଡ୍‌ ହାସଲ କରିଛନ୍ତି । ଏହାର ଅର୍ଥି ଏହି ଇଣ୍ଟରନେଟ୍‌ ସ୍ପିଡ୍‌ରେ ଆଖି ପିଛୁଳାକେ ସମ୍ପୂର୍ଣ୍ଣ Netflix ଲାଇବ୍ରେରୀ ଡାଉନଲୋଡ୍ କରିହେବ ।

ଦେଶର ୱେବ୍ ବ୍ରାଉଜିଂ ଏବଂ ଡାଉନଲୋଡିଂ ଗତି ଭାରତର ହାରାହାରି ଇଣ୍ଟରନେଟ୍ ଗତି ୬୩.୫୫ Mbps ତୁଳନାରେ ୧୬ ନିୟୁତ ଗୁଣ ଏବଂ ଆମେରିକାର ହାରାହାରି ଇଣ୍ଟରନେଟ୍ ତୁଳନାରେ ୩.୫ ନିୟୁତ ଗୁଣ ଦ୍ରୁତ । ଜାପାନାର ଜାତୀୟ ସୂଚନା ଏବଂ ଯୋଗାଯୋଗ ପ୍ରଯୁକ୍ତିବିଦ୍ୟା ପ୍ରତିଷ୍ଠାନ (NICT) ର ଏକ ରିପୋର୍ଟରୁ ଏହା ଜଣାପଡ଼ିଛି । 

ଜାପାନର ନୂତନ ଇଣ୍ଟରନେଟ୍ ସ୍ପିଡ୍ ସହିତ, ଜଣେ ବ୍ୟକ୍ତି କେବଳ ଗୋଟିଏ ସେକେଣ୍ଡରେ ସମ୍ପୂର୍ଣ୍ଣ ଇଂରାଜୀ ୱିକିପିଡିଆକୁ ୧୦ ହଜାର ଥର ଡାଉନଲୋଡ୍ କରିପାରିବ । ଇଂରାଜୀ ୱିକିପିଡିଆ ପ୍ରାୟ ୧୦୦ GB ସ୍ଥାନ ନେଉଥିବା କୁହାଯାଏ । ଆପଣ ଗୋଟିଏ ସେକେଣ୍ଡ ମଧ୍ୟରେ 8K ଭିଡିଓ ମଧ୍ୟ ଡାଉନଲୋଡ୍ କରିପାରିବେ ।

 ଜାପାନର ଇଞ୍ଜିନିୟରମାନେ ଏହି ଗତି ହାସଲ କରି ଏକ ଚମତ୍କାର ରେକର୍ଡ ସୃଷ୍ଟି କରିଛନ୍ତି । ଏହାର ବ୍ୟବହାରିକ ପ୍ରୟୋଗ ଏପର୍ଯ୍ୟନ୍ତ ଜଣାପଡ଼ି ନାହିଁ । ଏକ ଆକଳନ ଅନୁଯାୟୀ, ୧.୦୨ ପେଟାବିଟ୍‌ ସହିତ 8K ଭିଡିଓ ଥିବା ୧୦ ନିୟୁତ ଚ୍ୟାନେଲକୁ ଏକକାଳୀନ ଦେଖାଯାଇ ପାରିବ । ଏହା ସହିତ, ମୁଭି ଲାଇବ୍ରେରୀ ଭଳି ବଡ଼ ଫାଇଲ୍ ଡାଉନଲୋଡ୍ କରିବାକୁ କେବଳ କିଛି ସେକେଣ୍ଡ ସମୟ ଲାଗିବ। ଏହା ସହିତ, 8K କିମ୍ବା 16K ସମେତ ଉଚ୍ଚ-ରିଜୋଲ୍ୟୁସନ୍ ଭିଡିଓ ଷ୍ଟ୍ରିମିଂ କୌଣସି ବଫରିଂ କିମ୍ବା ବିଳମ୍ବ ବିନା କରିହେବ ।

Japan has broken the internet speed record with 1.02 petabits per second

It is 3.5 million times faster than the US average pic.twitter.com/GmH6QCSEj7

— Dexerto (@Dexerto) July 10, 2025

ସେପଟେ ଇଣ୍ଟରନେଟ୍‌ ଦୁନିଆରେ ଜାପାନ ପାଇଁ ଏହା ସବୁଠାରୁ ବଡ଼ ଉପଲବ୍ଧି ହୋଇଥିଲେ ବି ଏହାକୁ ସାଧାରଣରେ ବ୍ୟବହାର କରିବା ପ୍ରାୟ ଅସମ୍ଭବ । ବର୍ତ୍ତମାନର ଇଣ୍ଟରନେଟ୍ ଭିତ୍ତିଭୂମି (ଫାଇବର ଅପ୍ଟିକ୍ କେବୁଲ୍ ଏବଂ ବ୍ୟବହାରକାରୀ ଡିଭାଇସ୍) ଏପରି ଗତି ପରିଚାଳନା କରିବା ପାଇଁ ଡିଜାଇନ୍ ହୋଇନାହିଁ । ଏପରି ଗତି ପରିଚାଳନା କରିବା ପାଇଁ କେଉଁ ଭିତ୍ତିଭୂମି ପ୍ରସ୍ତୁତ କରାଯାଇପାରିବ ତାହା ଜଣାପଡ଼ି ନାହିଁ ।  ବାସ୍ତବିକ ଭାବରେ କହିବାକୁ ଗଲେ,  ଏପରି ଇଣ୍ଟରନେଟ୍‌ ସ୍ପିଡ୍‌ ହାସଲ ଏବଂ ବଣ୍ଟନ କରିବା ପାଇଁ ପ୍ରଯୁକ୍ତିବିଦ୍ୟା ବହୁତ ମହଙ୍ଗା ହୋଇପାରେ । ଏହା ସହିତ, ଦ୍ରୁତ ଇଣ୍ଟରନେଟ୍‌ ବ୍ୟବହାର ହେଲେ ଏଥିରେ ସାଇବର ସୁରକ୍ଷା ପ୍ରତି ମଧ୍ୟ ବଡ଼ ବିପଦ ସୃଷ୍ଟି ହେବାର ସମ୍ଭାବନା ରହିଛି । 

ଏହି ସବୁ ସମ୍ଭାବ୍ୟ ସମସ୍ୟାର ସମାଧାନ ଯେପର୍ଯ୍ୟନ୍ତ ନମିଳିଛି, ସେବେ ଯାଏଁ ସାଧାରଣ ଲୋକେ ୧.୦୨ ପେଟାବିଟ୍‌ ସ୍ପିଡ୍ ବ୍ୟବହାର କରିବା ସମ୍ଭବପର ନୁହେଁ ।