ଲାଗୋସ: ନାଇଜେରିଆ ଆମେରିକା ସରକାରଙ୍କ ଚାପକୁ ପ୍ରତ୍ୟାଖ୍ୟାନ କରି ଭେନେଜୁଏଲାରୁ ନିର୍ବାସିତ ବ୍ୟକ୍ତିଙ୍କୁ, ବିଶେଷତଃ ଜେଲରୁ ମୁକ୍ତ ହୋଇଥିବା ଅପରାଧୀଙ୍କୁ, ଗ୍ରହଣ କରିବାକୁ ମନା କରିଦେଇଛି। ନାଇଜେରିଆର ବୈଦେଶିକ ମନ୍ତ୍ରୀ ଯୁସୁଫ ତୁଗ୍ଗାର ଶୁକ୍ରବାର ଦିନ ଦେଶର ଏକ ଟେଲିଭିଜନ ଚ୍ୟାନେଲରେ ଦେଇଥିବା ସାକ୍ଷାତକାରରେ କହିଛନ୍ତି, "ଆମେରିକା ଆଫ୍ରିକୀୟ ଦେଶମାନଙ୍କ ଉପରେ ଭେନେଜୁଏଲାରୁ ନିର୍ବାସିତଙ୍କୁ ଗ୍ରହଣ କରିବାକୁ ବହୁତ ଚାପ ପକାଉଛି। ଯେଉଁମାନଙ୍କ ମଧ୍ୟରୁ ଅନେକ ସିଧାସଳଖ ଜେଲରୁ ଆସୁଛନ୍ତି। ନାଇଜେରିଆ ପରି ଦେଶ ପାଇଁ ଭେନେଜୁଏଲାର ଅପରାଧୀଙ୍କୁ ଗ୍ରହଣ କରିବା କଷ୍ଟକର ହେବ। ଆମର ନିଜର ଅନେକ ସମସ୍ୟା ରହିଛି। ତା ମଧ୍ୟରେ ଆମେ କାହା ଆଗରେ ନଇଁପାରିବୁ ନାହିଁ।"
ତୁଗ୍ଗାର ଆହୁରି ମଧ୍ୟ କହିଛନ୍ତି ଯେ, "ନାଇଜେରିଆରେ ପ୍ରାୟ ୨୩୦ ନିୟୁତରୁ ଅଧିକ ଜନସଂଖ୍ୟା ରହିଛି। ୩୦୦ ଜଣ ଭେନେଜୁଏଲା ନିର୍ବାସିତଙ୍କୁ ଗ୍ରହଣ କରିବା ଅନୁଚିତ ହେବ। ଏବଂ ଏହା କେବଳ ଆରମ୍ଭ ହୋଇପାରେ।" ସେ ଆମେରିକାର ନୂଆ ଭିସା ନୀତିକୁ ମଧ୍ୟ ସମାଲୋଚନା କରିଛନ୍ତି। ଯେଉଁଥିରେ ନାଇଜେରୀୟ ନାଗରିକଙ୍କ ପାଇଁ ଏକକାଳୀନ ତିନି ମାସିଆ ଭିସା ନୀତି ଜାରି କରାଯାଇଛି। ତୁଗ୍ଗାର କହିଛନ୍ତି ଯେ ନାଇଜେରିଆ ଆମେରିକୀୟ ନାଗରିକଙ୍କୁ ପାଞ୍ଚ ବର୍ଷିଆ ମଲ୍ଟିପଲ ଏଣ୍ଟ୍ରି ଭିସା ଦେଉଛି ଏବଂ କେବଳ ଇ-ଭିସା ପ୍ରଣାଳୀ ପ୍ରଚଳନ କରିଛି। ଯାହା ଆମେରିକାର ଦାବିକୁ "ପାରସ୍ପରିକ" ନୀତି ବୋଲି ଖଣ୍ଡନ କରୁଛି।
ଏହି ପ୍ରସଙ୍ଗରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନାଇଜେରିଆ ସମେତ ଅନ୍ୟ ଆଫ୍ରିକୀୟ ଦେଶମାନଙ୍କ ଉପରେ ଉଚ୍ଚ ଶୁଳ୍କ ଏବଂ ଭିସା ପ୍ରତିବନ୍ଧକ ଲଗାଇବାର ଧମକ ଦେଇଛନ୍ତି। ଟ୍ରମ୍ପ ପ୍ରଶାସନ ପୂର୍ବରୁ ମଧ୍ୟ ନିଜ ଦେଶରେ ରହୁଥିବା ଅବୌଧ ପ୍ରବାସୀମାନଙ୍କୁ ତୃତୀୟ ଦେଶମାନଙ୍କୁ ପଠାଇବାରେ ସଫଳ ହୋଇଛି। ଏଲ ସାଲଭାଡୋର ଏବଂ ଦକ୍ଷିଣ ସୁଦାନ ଆମେରିକା ଚାପ ଆଗରେ ନଇଁ ଅନ୍ୟ ଦେଶର ନାଗରିକମାନଙ୍କୁ ନିଜ ଦେଶରେ ପ୍ରଶୟ ଦେଇଛନ୍ତି।
ତୁଗ୍ଗାରଙ୍କ ଏହି ନିଷ୍ପତ୍ତି ନାଇଜେରିଆର ଜାତୀୟ ସ୍ୱାର୍ଥ ଏବଂ ସାର୍ବଭୌମତ୍ୱକୁ ପ୍ରାଥମିକତା ଦେଇଛି। ସେ ଆହୁରି କହିଛନ୍ତି ଯେ ନାଇଜେରିଆ ଆମେରିକା ସହିତ ଗ୍ୟାସ, ଖଣିଜ ଏବଂ ରେଆର ଆର୍ଥ ମେଟରିଆଲ ନେଇ ବ୍ୟବସାୟିକ ସମ୍ପର୍କ ଗଢ଼ିବାକୁ ଆଗ୍ରହୀ। କିନ୍ତୁ ନିର୍ବାସିତଙ୍କୁ ଗ୍ରହଣ କରିବା ସମ୍ଭବ ନୁହେଁ।
ଏହି ଘଟଣା ଆମେରିକାର ନିର୍ବାସନ ନୀତି ଏବଂ ଆଫ୍ରିକୀୟ ଦେଶମାନଙ୍କ ସହ କୂଟନୈତିକ ସମ୍ପର୍କ ମଧ୍ୟରେ ନୂଆ ବିବାଦ ସୃଷ୍ଟି କରିଛି। ଅନ୍ୟ ଆଫ୍ରିକୀୟ ଦେଶ ଯେପରିକି ଲାଇବେରିଆ ମଧ୍ୟ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି। ଯାହା ଟ୍ରମ୍ପ ପ୍ରଶାସନର ତୃତୀୟ ଦେଶ ନିର୍ବାସନ ଯୋଜନାକୁ ଆହୁରି ଜଟିଳ କରିଛି।
