ଭୁବନେଶ୍ୱର, ୩୦/୦୪ : ମୁଖ୍ୟସ୍ରୋତରେ ପୁଣି ସାମିଲ ହେବେ ଡ୍ରପ୍ ଆଉଟ ଶିକ୍ଷାର୍ଥୀ । ଏଥିପାଇଁ ଚାଲିବ ସର୍ଭେ । କେଉଁ କାରଣରୁ ଅଧାରୁ ପାଠ ପଢ଼ା ଛାଡ଼ିଲେ? ତାର କାରଣ ଖୋଜିବେ ଶିକ୍ଷକ । ଏଥିପାଇଁ ଆସନ୍ତାକାଲିଠୁ ମେ ୫ ତାରିଖ ଯାଏ ଘରକୁ ଘର ଯିବେ ସ୍କୁଲ ଶିକ୍ଷକ । ପ୍ରାଥମିକ, ଉଚ୍ଚ ପ୍ରାଥମିକ ଓ ହାଇସ୍କୁଲ ଶିକ୍ଷକ ଏହି ସର୍ଭେ କରିବେ । ଦିନକୁ ୨ରୁ ୩ ଘଣ୍ଟା ବୁଲିବାକୁ ନିର୍ଦ୍ଦେଶ ଦିଆଯାଇଛି । ସେମାନଙ୍କୁ ବିଭାଗ ପକ୍ଷରୁ ଦିଆଯାଇଥିବା ସ୍ୱତନ୍ତ୍ର ଆପ୍ଲିକେଶନ ମାଧ୍ୟମରେ ତଥ୍ୟ ମଧ୍ୟ ଅପଲୋଡ୍ କରିବେ । ଏନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ଚିଠି କରାଯାଇଛି ।
ବିଭାଗ ପକ୍ଷରୁ ହୋଇଥିବା ଚିଠିରେ ଉଲ୍ଲେଖ ହୋଇଛି, ରାଜ୍ୟରେ ପାଖାପାଖି ୪୮ ହଜାର ୪୪ ଜଣ ପିଲା ଡ୍ରପ୍ଆଉଟ୍ ଅଛନ୍ତି । ଯାହା ୟୁଡାଇଏସ୍ ତଥ୍ୟ କହୁଛି । ପ୍ରାଥମିକ, ଉଚ୍ଚ ପ୍ରାଥମିକ, ମାଧ୍ୟମିକ ଓ ଉଚ୍ଚ ମାଧ୍ୟମିକ ସ୍କୁଲର ଡ୍ରପ୍ଆଉଟ୍ ଶିକ୍ଷାର୍ଥୀ ଅଛନ୍ତି । ତେବେ ୬ ବର୍ଷରୁ ୧୮ ବର୍ଷ ମଧ୍ୟରେ ଥିବା ପିଲାମାନେ କଣ ପାଇଁ ସ୍କୁଲକୁ ଆସୁନାହାନ୍ତି? ପାଠପଢ଼ାରୁ ଦୂରେଇ ରହୁଛନ୍ତି? ତାର କାରଣ ଖୋଜାଯିବ । ଏହାର ପ୍ରାଥମିକ ପର୍ଯ୍ୟାୟ ଢେଙ୍କାନାଳ ଜିଲ୍ଲାର କାମାକ୍ଷାନଗରରେ ଏହାର ଏକ ପାଇଲଟ୍ ସର୍ଭେ ସରିଛି । ଏହା ମଧ୍ୟ ସଫଳ ହୋଇଛି ବୋଲି ବିଭାଗ ପକ୍ଷରୁ କୁହାଯାଇଛି । ସର୍ଭେ ସମୟରେ ଶିଶୁ ଶ୍ରମିକ ଚିହ୍ନଟ କରିବେ । ଏଥିସହ ଯଦି ପିଲା ଓ ଅଭିଭାବକ ଶ୍ରମିକ ତାକୁ ମଧ୍ୟ ସର୍ଭେ ସମୟରେ ରେକର୍ଡ କରାଯିବ । ସେହିପରି ଯୌଥ ପରିବାର ଥିଲେ ପିଲାର ବାପା ମାଙ୍କ ନାମକୁ ନେଇ ସର୍ଭେ ହେବ । ଶିକ୍ଷକମାନେ ଘରକୁ ଘର ଯାଇ ଡ୍ରପ୍ଆଉଟ୍ ପିଲାଙ୍କୁ ଚିହ୍ନଟ କରିବେ । ବ୍ଲକ୍ ଶିକ୍ଷାଅଧିକାରୀ, ସିଆର୍ସିସି ଏହାକୁ ତ୍ୱରାନ୍ୱିତ କରିବେ ।
ସର୍ଭେ କରିବାକୁ ଯାଉଥିବା ଶିକ୍ଷକମାନେ ସେମାନଙ୍କ ମୋବାଇଲ୍ରେ ବିଭାଗ ପକ୍ଷରୁ ଦିଆଯାଇଥିବା ଆପ୍ଲିକେଶନକୁ ଇନ୍ଷ୍ଟଲ୍ କରିବା ବାଧ୍ୟତାମୂଳକ । ଏହାକୁ ଅନ୍ୟ କୌଣସି ବ୍ୟକ୍ତି ସହ ବାଣ୍ଟିବେ ନାହିଁ । ବିଭାଗ ପକ୍ଷରୁ ଯେଉଁ ପର୍ଯ୍ୟନ୍ତ ନିର୍ଦ୍ଦେଶ ନ ଦିଆଯାଇଛି ସେ ଯାଏ ଜମା ବି ଏହି ଆପ୍ଲିକେଶନକୁ ଡିଲିଟ୍ କିମ୍ବା ଅନ୍ଇନ୍ଷ୍ଟଲ୍ କରିପାରିବେ ନାହିଁ । ବ୍ଲକ ଶିକ୍ଷା ଅଧିକାରୀ ନିଶ୍ଚିତ ଭାବେ ସର୍ବନିମ୍ନ ୩ରୁ ୪ଟି କ୍ଲଷ୍ଟରକୁ ଅନୁଧ୍ୟାନ କରିବାକୁ ଯିବେ । ସେହିପରି ଜିଲ୍ଲା ଶିକ୍ଷା ଅଧିକାରୀ ମଧ୍ୟ ଅତିକମ୍ରେ ୨ଟି ବ୍ଲକ ପରିଦର୍ଶନ କରିବେ ଓ ଯାଞ୍ଚ କରିବେ । ସେହିପରି ସିଆର୍ସିସି ମାନେ ୪ ସ୍କୁଲକୁ ପରିଦର୍ଶନ କରିବେ । ସର୍ଭେ ସରିବା ପରେ ପ୍ରଧାନଶିକ୍ଷକ ପ୍ରତିଦିନ ସିଆର୍ସିସିଙ୍କୁ ତଥ୍ୟ ପ୍ରଦାନ କରିବେ । ଏହାକୁ କ୍ଲଷ୍ଟର ସ୍ତରୀୟ ତଥ୍ୟ କରି ସିଆର୍ସିସି ବ୍ଲକ ଶିକ୍ଷା ଅଧିକାରୀଙ୍କୁ ପ୍ରଦାନ କରିବେ ।
ଏହି ଖବରଟିକୁ ପଢନ୍ତୁ-ଶ୍ରୀମନ୍ଦିରରେ ମହାପ୍ରଭୁଙ୍କ ଚନ୍ଦନ ଯାତ୍ରା, ନରେନ୍ଦ୍ର ପୁଷ୍କରିଣୀରେ ଜଳକ୍ରୀଡା କରିବେ ମଦନମୋହନ
