କେନ୍ଦ୍ରାପଡ଼ା,୨୯/୦୩: ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ନାମ କେନ୍ଦ୍ରାପଡ଼ା ଲୋକସଭା କ୍ଷେତ୍ରରୁ ପ୍ରାର୍ଥୀ ଭାବେ ଘୋଷିତ ହେବା ପରେ ବି ଅଦ୍ୟାବଧି ସେ ନିର୍ବାଚନମଣ୍ଡଳୀକୁ ଆସିନାହାନ୍ତି । ହୋଲିରେ ସାମିଲ ବି ହୋଇନାହାନ୍ତି । କେବଳ ସୋସିଆଲ୍ ମିଡିଆରେ ତାଙ୍କ ନିର୍ବାଚନ ସଂକ୍ରାନ୍ତରେ ଗୋଟିଏ, ଦୁଇଟି ଭିଡିଓ ବାର୍ତ୍ତା ପୋଷ୍ଟ ହୋଇଛି । ଯାହାକୁ ରାଜନୀତି ସମୀକ୍ଷକମାନେ ଭିନ୍ନ ଦୃଷ୍ଟିରେ ଦେଖୁଛନ୍ତି । ସମୀକ୍ଷକମାନଙ୍କ ଆକଳନ ଅନୁଯାୟୀ ବୈଜୟନ୍ତ ବୋଧହୁଏ ନିଜ ପ୍ରାର୍ଥିତ୍ୱ ଓ ପ୍ରତିଦ୍ୱନ୍ଦ୍ୱିତାକୁ ନେଇ ଦ୍ୱନ୍ଦ୍ୱରେ ଅଛନ୍ତି । ଉତ୍ତରପ୍ରଦେଶର ପ୍ରଭାରୀ ପଦ ଛାଡ଼ିବାକୁ ହୁଏତ ସେ ଚାହୁନାହାନ୍ତି । ତେଣୁ କେନ୍ଦ୍ରାପଡ଼ାରେ ଟିକଟ ପାଇବା ପରେ ହାର୍ଜିତ୍ର ଅଙ୍କ କଷୁଛନ୍ତି ।
ଯଦିଓ ସେ ପୂର୍ବରୁ ଦୁଇ ଥର ବିଜେଡି ପ୍ରାର୍ଥୀ ଭାବେ କେନ୍ଦ୍ରାପଡ଼ାରୁ ଲୋକସଭା ସାଂସଦ ଭାବେ ନିର୍ବାଚିତ ହୋଇଛନ୍ତି, ୨୦୧୯ରେ ବିଜେପିରୁ ପ୍ରତିଦ୍ୱନ୍ଦ୍ୱିତା କରି ସେ କିନ୍ତୁ ବିଜେଡିର ଅନୁଭବ ମହାନ୍ତିଙ୍କଠାରୁ ହାରି ଯାଇଥିଲେ । ଅନୁଭବ ୧ଲକ୍ଷ ୫୨ ହଜାର ୫୮୪ ଭୋଟ୍ ବ୍ୟବଧାନରେ ଜିତିଥିଲେ । ଅନୁଭବଙ୍କୁ ୬ ଲକ୍ଷ ୨୮ହଜାର ୯୩୯ ଭୋଟ୍ ମିଳିଥିବା ବେଳେ ବୈଜୟନ୍ତଙ୍କୁ ୪ଲକ୍ଷ ୭୬ ହଜାର ୩୫୫ ଖଣ୍ଡ ଭୋଟ୍ ମିଳିଥିଲା । କେନ୍ଦ୍ରାପଡ଼ାରେ ଏଥର ବି ତାଙ୍କ ପାଇଁ ସ୍ଥିତି ସେଭଳି କିଛି ଉତ୍ସାହଜନକ ନାହିଁ । ଯଦି ଏଥର ନିର୍ବାଚନରେ ସେ ପରାଜିତ ହୁଅନ୍ତି, ତାହେଲେ ଏହା ତାଙ୍କ ରାଜନୈତିକ କ୍ୟାରିୟରକୁ ପ୍ରଭାବିତ କରିପାରେ । ଏଭଳି ଦ୍ୱନ୍ଦ୍ୱ ଭିତରେ ରହି ଶ୍ରୀ ପଣ୍ଡା ଏଯାଏ କେନ୍ଦ୍ରାପଡ଼ା ଆସିନଥିବା ଚର୍ଚ୍ଚା ହେଉଛି । ତେବେ ଏ ସଂପର୍କରେ ବୈଜୟନ୍ତଙ୍କର ବା ତାଙ୍କ ଶିବିରର କାହାରି ପ୍ରତିକ୍ରିୟା ମିଳି ପାରିନାହିଁ