କୋରାପୁଟ ୦୮/୧୨: ହଳଦୀ ଚାଷୀଙ୍କ ଲାଗି ଖୁସି ଖବର । ଏଣିକି ସେମାନେ ଏହି ଚାଷ କରି ଅଧିକ ସ୍ୱାବଲମ୍ବୀ ହୋଇପାରିବେ । ହଳଦୀ ସାଙ୍ଗକୁ ଭଲ ଦରରେ ବିକିପାରିବେ ପତ୍ର । ଏହି ପତ୍ରରୁ ଆରମ୍ଭ ହୋଇଛି ତେଲ ଉତ୍ପାଦନ । ଏହି ତେଲର ବଜାର ଦର ଲିଟର ପିଛା ରହିଛି ୧୦ ହଜାର ଟଙ୍କା । କୋରାପୁଟ ଜିଲ୍ଲା ପ୍ରଶାସନ ଏବଂ ଓର୍ମାସର ମିଳିତ ଉଦ୍ୟମରେ ପରୀକ୍ଷାମୂଳକ ଭାବେ ଲକ୍ଷ୍ମୀପୁର ବ୍ଲକ୍ ତୟାପୁଟ ଅଞ୍ଚଳର ଚାଷୀଙ୍କଠାରୁ ସଂଗୃହୀତ ହଳଦୀ ପତ୍ରରୁ ଆରମ୍ଭ ହୋଇଛି ତୈଳ ଉତ୍ପାଦନ । ଏହା ସଫଳ ହେଲେ ଜିଲ୍ଲାର ଅନ୍ୟ ବ୍ଲକରେ ମଧ୍ୟ ଏହାକୁ ଗୁରୁତ୍ୱ ଦିଆଯିବ ବୋଲି କହିଛନ୍ତି ଓରମାସ୍ର ସହକାରୀ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ରୋସନ କାର୍ତ୍ତିକ ।
ଲେମନ୍ ଗ୍ରାସ୍ ଭଳି ହଳଦୀପତ୍ରରେ ଭରି ରହିଛି ଅନେକ ଔଷଧୀୟ ଗୁଣ । ଜିଲ୍ଲାର ବନ୍ଧୁଗାଁ, ନାରାୟଣପାଟଣା, ଲକ୍ଷ୍ମୀପୁର, ବୈପାରୀଗୁଡ଼ା, ଦଶମନ୍ତପୁର ଏବଂ ପଟ୍ଟାଙ୍ଗା ଅଞ୍ଚଳରୁ ଉତ୍ପାଦିତ ହଳଦୀର ସ୍ୱତନ୍ତ୍ର ଚାହିଦା ରହିଛି । ଏଥିଲାଗି ଏସବୁ ଅଞ୍ଚଳରେ ପ୍ରଚୁର ଚାଷ ହେଉଛି । ପତ୍ରଗୁଡ଼ିକ ଆପେଆପେ କ୍ଷେତରେ ପଡ଼ି ନଷ୍ଟ ହେଉଥିଲା । ଏବେ ସେଥିରୁ ତେଲ ଉତ୍ପାଦନ ଲାଗି ପ୍ରୟାସ ଆରମ୍ଭ କରିଛି ଜିଲ୍ଲା ପ୍ରଶାସନ ଏବଂ ଓରମାସ୍ । ଲକ୍ଷ୍ମୀପୁରର ତୟାପୁଟରେ ଆଦିବାସୀ ମହିଳାଙ୍କୁ ନେଇ ପ୍ରାଥମିକ ପର୍ଯ୍ୟାୟରେ ତେଲ ଉତ୍ପାଦନ ଆରମ୍ଭ ହୋଇଛି । ଏଠାରେ ୩ ଶହ କେଜି ଶୁଖିଲା ପତ୍ରରୁ ବାହାରିଛି ୧ ଲିଟର ତେଲ । ସେହିପରି ପଟ୍ଟାଙ୍ଗିରେ ଶହେ କେଜିରୁ ୫ ଶହ ଗ୍ରାମ୍ ତେଲ ବାହାର କରାଯାଇଛି ।
ଶ୍ରୀ କାର୍ତ୍ତିକ କହିଛନ୍ତି, ଅନ୍ଲାଇନ୍ ମାର୍କେଟିଂ ଆମାଜନ୍ରେ ଏହାର କେଜି ୧୦ ହଜାର ହିସାବରେ ବିକ୍ରି କରିବାକୁ ଲକ୍ଷ୍ୟ ରଖାଯାଇଛି । କୃଷି ଉତ୍ପାଦକ ସଙ୍ଗଠନ ଚାଷୀଙ୍କଠାରୁ ନଷ୍ଟ ହୋଇଯାଉଥିବା ହଳଦୀ ପତ୍ର ସଂଗ୍ରହ କରୁଛି ।ସଫଳତା ମିଳିଲେ, ଜିଲ୍ଲାର ଅନ୍ୟ ବ୍ଲକର ଚାଷୀଙ୍କଠାରୁ ହଳଦୀପତ୍ର ସଂଗ୍ରହ କରାଯାଇ ତେଲ ଉତ୍ପାଦନ ବଢ଼ାଯିବ । ଅନ୍ଲାଇନରେ ହଳଦୀ ତେଲର ଚାହିଦା ରହିଥିବାରୁ ଚାଷୀମାନଙ୍କୁ ବି ଭଲ ଲାଭ ମିଳିବ । ସବୁଠୁ ବଡ଼ କଥା ହେଲା, ଏହି ତେଲ ଉତ୍ପାଦନ ଲାଗି ଅନ୍ୟ ମେସିନ୍ର ଆବଶ୍ୟକତା ପଡ଼ିବନି । ଯେଉଁ ମେସିନରେ ଲେମନ୍ ଗ୍ରାସ୍ରୁ ତେଲ ବାହାର କରାଯାଉଛି, ସେହିଥିରେ ହିଁ ହଳଦୀ ପତ୍ରରୁ ତେଲ ବାହାର କରାଯାଇ ପାରୁଛି । ଏହି ତେଲରେ ଅନେକ ଚର୍ମରୋଗ ଭଲ ହୋଇପାରୁଥିବାରୁ ବାହାର ବଜାରରେ ଚାହିଦା ଢେର୍ ରହିଛି ।
