ବେଜିଂ,୨୦।୫: ସୋମବାର ଦିନ ଚୀନ୍ର ଜିଆଙ୍ଗସି ପ୍ରଦେଶର ଏକ ପ୍ରାଥମିକ ବିଦ୍ୟାଳୟରେ ଜଣେ ମହିଳା ଛୁରାମାଡ଼ କରିଛନ୍ତି। ଛୁରୀ ଆକ୍ରମଣରେ ଅତି କମରେ ଦୁଇ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ୧୦ ଜଣ ଆହତ ହୋଇଛନ୍ତି। ଚଳିତ ମାସରେ ଦେଶରେ ଏହା ହେଉଛି ଦ୍ୱିତୀୟ ଘଟଣା। ଖବର ଅନୁଯାୟୀ, ଗୁଇସି ସହରରେ ଏହି ଘଟଣା ଘଟିଥଛି ଏବଂ ସନ୍ଦିଗ୍ଧ, ପାନ୍ ନାମକ ଜଣେ ୪୫ ବର୍ଷୀୟା ମହିଳାଙ୍କୁ ପୋଲିସ ଗିରଫ କରିଛି।
ସ୍ଥାନୀୟ ଅଧିକାରୀ କହିଛନ୍ତି ଯେ, ଆହତଙ୍କ ଚିକିତ୍ସା କରାଯାଇଛି। ସେମାନଙ୍କ ମଧ୍ୟରୁ ୬ଜଣ ଆକ୍ରମଣରୁ ରକ୍ଷା ପାଇବାକୁ ଚେଷ୍ଟା କରୁଥିବାବେଳେ ସାମାନ୍ୟ ଆହତ ହୋଇଥିଲେ। ଘଟଣାର ଅଧିକ ତଦନ୍ତ ଜାରି ରହିଛି।
ଉଲ୍ଳେଖନୀୟ ଯେ, ଚଳିତ ମାସ ଆରମ୍ଭରୁ ମେ ୭ରେ, ୟୁନାନ ପ୍ରଦେଶର ଏକ ଡାକ୍ତରଖାନାରେ ବ୍ୟାପକ ଛୁରାମାଡ଼ରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ୨୧ ଜଣ ଆହତ ହୋଇଥିଲେ। ଗତ ବର୍ଷ ଅଗଷ୍ଟ ମାସରେ ୟୂନାନରେ ଜଣେ ମାନସିକ ରୋଗରେ ପୀଡିତ ଜଣେ ବ୍ୟକ୍ତି ଛୁରୀରେ ଲୋକଙ୍କୁ ଆକ୍ରମଣ କରିବା ପରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ୭ ଜଣ ଆହତ ହୋଇଥିଲେ। ସେହିବର୍ଷ ଜୁଲାଇରେ ଦକ୍ଷିଣ-ପୂର୍ବ ପ୍ରଦେଶର ଗୁଆଙ୍ଗଡୋଙ୍ଗର ଏକ ବାଳାଶ୍ରମରେ ଛୁରାମାଡ଼ ଘଟଣାରେ ତିନି ଶିଶୁଙ୍କ ସମେତ ୬ ଜଣଙ୍କର ମୃତ୍ୟୁ ଘଟିଥିଲା।
