ଭୁବନେଶ୍ୱର୦୨/୦୮: ଶରୀରରେ ବିଭିନ୍ନ କାରଣରୁ ଯନ୍ତ୍ରଣା ହୋଇଥାଏ । ଯେପରିକି ରୋଗ, ଆଘାତ ଜନିତ, କ୍ଷୟ ଜନିତ ଯନ୍ତ୍ରଣା ଏବଂ କୌଣସି କାରଣ ନଥାଇ ଯନ୍ତ୍ରଣା (ସାଇକୋଜେନିକ) । ବିଶେଷ କରି ମାଂସପେଶୀ ଓ ଖଞ୍ଜାରେ ଯନ୍ତ୍ରଣା ହୋଇଥାଏ । ଶରୀରର ଅଙ୍ଗପ୍ରତ୍ୟଙ୍ଗକୁ ଘେରି ରହିଥିବା ସୂତା ଭଳି ଟିସୁ (ଫାସିଆ) ଆମ ଶରୀରର ବୃହତ ଇନ୍ଦ୍ରିୟ ଅଙ୍ଗ ଯାହାକି ଆମ ଶରୀରର ୨୫୦ ମିଲିୟନ ସ୍ନାୟୁ ବା ପେନ୍ ରିସେପ୍ଟର ଦ୍ୱାରା ଗଠିତ । ଏହାଛଡ଼ା ଶରୀରର ଚର୍ମ ମଧ୍ୟ ପାଖାପାଖି ୨୦୦ ମିଲିୟନ ପେନ୍ ରିସେପ୍ଟର ଦ୍ୱାରା ଗଠିତ। ଯେ କୌଣସି ରୋଗ, ଆଘାତ, କ୍ଷୟ କାରଣରୁ ଶରୀରରେ ଥିବା ପେନ୍ ରିସେପ୍ଟର ପାଇଁ ଆମେ ଯନ୍ତ୍ରଣା ଭୋଗିଥାଉ । କେତେକ କ୍ଷେତ୍ରରେ କୌଣସି ଶାରୀରିକ କାରଣ ନଥାଇ ମଧ୍ୟ କିଛି ବ୍ୟକ୍ତି ଯନ୍ତ୍ରଣା ଅନୁଭବ କରିଥାନ୍ତି । ଅନେକ ଦିନ ପର୍ଯ୍ୟନ୍ତ ଯନ୍ତ୍ରଣାର ଚିକିତ୍ସା ମଧ୍ୟ ଚାଲେ । ଏହାକୁ ସାଇକୋଜେନିକ୍ ପେନ୍ ବା ମନରେ ସୃଷ୍ଟି ହୋଇଥିବା ଶାରୀରିକ ଯନ୍ତ୍ରଣା କୁହାଯାଇଥାଏ । ଏହା ଏକ ମାନସିକ ରୋଗ ।
ରୋଗ, ଆଘାତ, କ୍ଷୟ ଜନିତ ଯନ୍ତ୍ରଣା ଚିକିତ୍ସା ପରେ ଦୂର ହୋଇଯିବ । ମାନସିକ କାରଣରୁ ହେଉଥିବା ଶାରୀରିକ ଯନ୍ତ୍ରଣାର ଉପଶମ ଶାରୀରିକ ଚଳନ ଶକ୍ତି ବୃଦ୍ଧି ହେଉଥିବା ବ୍ୟାୟାମ, ଖଞ୍ଜା ଗୁଡ଼ିକର ନମନୀୟତା ବୃଦ୍ଧି ହେଉଥିବା ବ୍ୟାୟାମ ଦ୍ୱାରା କେବଳ ଦୂର କରାଯାଇପାରିବ । ମାଂସପେଶୀର ଶକ୍ତି ବୃଦ୍ଧି କରାଯାଇ ପାରିଲେ ଶରୀରରେ ଅନେକ ରୋଗ ଓ ଯନ୍ତ୍ରଣା ମଧ୍ୟ ଲାଘବ ହୋଇପାରିବ । ମାଂସପେଶୀର ଶକ୍ତି ଓ ନମନୀୟତା ବୃଦ୍ଧି ହେଲେ ଶରୀରର ଖଞ୍ଜା ଗୁଡିକର ଚାପ ଓ ଘର୍ଷଣ କମ ହୋଇଥାଏ । ଦୁର୍ଘଟଣାରେ କମ କ୍ଷତି ହୁଏ । ଶରୀର ଚଳନଶୀଳ ରହୁଥିବା ଯୋଗୁଁ କାର୍ଯ୍ୟକ୍ଷମତା ଓ ଦହନ ପ୍ରକ୍ରିୟା ବୃଦ୍ଧି ହୋଇ ମେଦ ହ୍ରାସ ହୁଏ ଏବଂ ଘାତ ସମ୍ଭାବନା କମିପାରେ ।
ଶକ୍ତିବୃଦ୍ଧି କାରକ ବ୍ୟାୟାମ ଶରୀରରେ ରକ୍ତ ସଞ୍ଚାଳନକୁ ସ୍ୱାଭାବିକ କରେ ଏବଂ ଅନ୍ତଃସ୍ରାବୀ ଗ୍ରନ୍ଥିଗୁଡ଼ିକ ସନ୍ତୁଳିତ ରହି କାର୍ଯ୍ୟ କରିଥାନ୍ତି(ହର୍ମୋନାଲ ବାଲାନ୍ସ) । କଠିନ ପରିଶ୍ରମ ମଲେ ମାନସିକ ଅବସାଦ କମ୍ ହୋଇଥାଏ, ନିଦ ଠିକ୍ ହୁଏ ଏବଂ ଶରୀରର ଅନେକ ସମସ୍ୟା ଦୂର ହୋଇ ଶାରୀରିକ ଯନ୍ତ୍ରଣା ଅନେକ ପରିମାଣରେ ଦୂର ହୋଇଥାଏ । ତେଣୁ ଶରୀରର ଶକ୍ତି ବୃଦ୍ଧି କରିବା ବ୍ୟାୟାମ ଅମୃତ ସହ ସମାନ । ଲିଙ୍ଗ, ବୟସ, ଶାରୀରିକ ସ୍ଥିତି ଓ କର୍ମ ଯାହା ହୋଇଥିଲେ ମଧ୍ୟ ପ୍ରତ୍ୟେକ ବ୍ୟକ୍ତି ଶକ୍ତିଭିତ୍ତିକ ବ୍ୟାୟାମ ନିଶ୍ଚିତ କରିବା ଉଚିତ । ବାରବେଲ (ଲୁହା ରଡ୍ର ଦୁଇପଟେ ଚକା ଭଳି ଭାର ଲାଗିଥିବା ବ୍ୟାୟାମ ଉପକରଣ) ଶକ୍ତିବୃଦ୍ଧି ବ୍ୟାୟାମ ନିମନ୍ତେ ସବୁଠାରୁ ଉପଯୁକ୍ତ ଉପକରଣ ।
ଉପଯୁକ୍ତ ପ୍ରଶିକ୍ଷକଙ୍କ ନିକଟକୁ ଯାଇ ଅଥବା ଜିମ୍ ଯାଇ ନିମ୍ନଲିଖିତ ବ୍ୟାୟାମ ଗୁଡିକୁ ଶିକ୍ଷା ଲାଭ କରି ସାଧ୍ୟମତେ ଆରମ୍ଭ କରନ୍ତୁ- (୧)ବାରବେଲ୍ ବ୍ୟାକ୍ ସ୍କ୍ୱାଟ୍ (୨) ବେଞ୍ଚ୍ ପ୍ରେସ୍(୩) ଡେଡ୍ ଲିଫ୍ଟ (୪) ବେଣ୍ଟ୍ ଓଭର ରୋ(୫) ଓଭରହେଡ୍ ପ୍ରେସ୍(୬) ଫାର୍ମର୍ସ କ୍ୟାରି ବ୍ୟାୟମ ଗୁଡ଼ିକୁ ଅତି ଅଳ୍ପ ଓଜନ ସହ ଆରମ୍ଭ କରି ସପ୍ତାହରେ ଦିନେ ଛାଡ଼ି ଦିନେ ଅଭ୍ୟାସ କରନ୍ତୁ । ଏକ ଘଣ୍ଟା ମଧ୍ୟରେ ଏହି ବ୍ୟାୟାମ ଗୁଡ଼ିକ କରିହେବ । ପ୍ରଶିକ୍ଷକଙ୍କ ସହାୟତାରେ ସଠିକ ଖସଡ଼ା (କେତେ ଓଜନ, କେତେଥର ଓ କେତେ ପାଳି) ପ୍ରସ୍ତୁତ କରି ନିଜ କ୍ଷମତା ଅନୁଯାୟୀ କରନ୍ତୁ । ଧୀରେ ଧୀରେ ବ୍ୟାୟାମରେ ଅଳ୍ପ ଅଳ୍ପ ଭାର ବୃଦ୍ଧି କରନ୍ତୁ । ମାସକୁ ଦୁଇରୁ ଚାରି କିଲୋ ଓଜନ ପ୍ରତ୍ୟେକ ବ୍ୟାୟାମରେ ବଢ଼ାନ୍ତୁ ।
ଶାରୀରିକ ଅବସ୍ଥା ଅତି ଖରାପ ଥିଲେ ପ୍ରଥମ ଦୁଇ ତିନି ମାସ ପ୍ରତିଦିନ (୧) ଫ୍ରି- ସ୍କ୍ୱାଟ୍(୨) ଟେବୁଲ ଉପରେ ହାତ ରଖି ଦଣ୍ଡବୈଠକ (୩) ଆବ୍ଡୋମେନ୍ ପ୍ଲାଙ୍କ୍(୪) ଫାର୍ମର୍ସ କ୍ୟାରି ଓ ଅଳ୍ପ ଅଳ୍ପ ଝୁଲି ରହିବା ଅଭ୍ୟାସ କରି ବଳ ଓ ସାମର୍ଥ୍ୟ ବୃଦ୍ଧି କରିବେ । ତାପରେ ବାରବେଲରେ ବ୍ୟାୟାମ ଆରମ୍ଭ କରିବେ ।
ଅଭ୍ୟାସ କରି ଦେଖନ୍ତୁ ଶରୀରରୁ ଅଧିକାଂଶ ପୀଡ଼ା ଦୂର ହୋଇ ଆପଣ ବଳୁଆ ଓ ସ୍ୱାସ୍ଥ୍ୟବାନ ହୋଇପାରିବେ । ବୟସ ଓ ଲିଙ୍ଗ ନିର୍ବିଶେଷରେ ଶକ୍ତିବର୍ଦ୍ଧକ ବ୍ୟାୟାମ ହିଁ ଏକମାତ୍ର ଉତ୍ତର ।
