ନୂଆଦିଲ୍ଲୀ,୨୪/୦୨: ଗାଜା ଯୁଦ୍ଧ ଏବଂ ଏହାକୁ କେନ୍ଦ୍ରକରି ଲୋହିତ ସାଗରରେ ୟେମେନୀ ହୁତି ବିଦ୍ରୋହୀଙ୍କ ଉତ୍ପାତ ଯୋଗୁ ସୋମାଲୀ ଜଳଦସ୍ୟୁଙ୍କୁ ମିଳିଛି ସୁଯୋଗ । ସେମାନେ ଧୀରେ ଧୀରେ ବଳ ଜୁଟାଇବାରେ ଲାଗିଛନ୍ତି । ପ୍ରାୟ ଏକ ଦଶନ୍ଧି ଧରି ଉଭାନ ହୋଇଯାଇଥିବା ଏହି ଭୟଙ୍କର ସମୁଦ୍ର ଲୁଟେରା ଗୋଷ୍ଠୀ ଲୋହିତ ସାଗରରେ ପୁଣି ଉତ୍ପାତ ବଢ଼ାଇଛି । ଇତିମଧ୍ୟରେ କେତେକ ଜାହାଜକୁ ଟାର୍ଗେଟ୍ ବି କଲେଣି ।
ସୋମାଲୀ ଜଳଦସ୍ୟୁ, ହୁତି ବିଦ୍ରୋହୀ ଏବଂ କେତେକ ଆଞ୍ଚଳିକସମୁଦ୍ର ଲୁଟେରାଙ୍କ ପାଇଁ ଲୋହିତ ସାଗର ଓ ଭାରତ ମହାସାଗରରେ ବାଣିଜ୍ୟିକ କାରବାର ପ୍ରଭାବିତ ହେବା ଆରମ୍ଭ କରିଛି । ସମୁଦ୍ରରେ ବାଣିଜ୍ୟିକ ଜାହାଜଗୁଡ଼ିକୁ ହୁତିମାନେ ଆକ୍ରମଣ କରିବାର ମାସକ ପରେ ଅର୍ଥାତ ୨୦୨୩ ଡିସେମ୍ବରରେ ସୋମାଲିଆର ଜଳଦସ୍ୟୁଙ୍କ ସାହସ ବଢ଼ିଯାଇଥିଲା । ସେମାନେ ମାଲ୍ଟା ପତାକା ଲାଗିଥିବା ଏକ ବିଶାଳ କାର୍ଗୋ ଜାହାଜକୁ ଭାରତ ମହାସାଗରରୁ ହାଇଜ୍ୟାକ୍ କରିନେଇଥିଲେ । ୨୦୧୭ ପରେ ଏହା ସେମାନଙ୍କର ବଡ଼ ସଫଳତା ଥିଲା ।
ଏହା ପରଠାରୁ ସେମାନଙ୍କ କାର୍ଯ୍ୟକଳାପ ବଢ଼ିବାରେ ଲାଗିଛି । ୨୦୨୪ ଜାନୁଆରୀ ୧ରୁ ସେପ୍ଟେମ୍ବର ୩୦ ମଧ୍ୟରେ ୩ଟି ଜାହାଜ ହାଇଜ୍ୟାକ୍ ହେଲାଣି । ଦୁଇଟି ଜାହାଜରେ ଜଳଦସ୍ୟୁମାନେ ପ୍ରବେଶ କରି ଗୁଳିମାଡ଼ କରିଥିଲେ । ଆଉ ୩ଟି ଜାହାଜକୁ ନେଇଯିବା ଲାଗି ଚେଷ୍ଟା କରି ବିଫଳ ହୋଇଥିଲେ । ୨୦୨୪ ମାର୍ଚ୍ଚ ୧୨ରେ ‘ଏମ୍ଭି ଅବ୍ଦୁଲ୍ଲା’ ନାମକ ଏକ ଜାହାଜକୁ ସୋମାଲୀ ଜଳଦସ୍ୟୁମାନେ ସୋମାଲିଆ ତଟଠାରୁ ୫୫୦ ନଟିକାଲ ମାଇଲ ଦୂରରେ ଅପହରଣ କରିନେଇ ଯାଇଥିଲେ ।
ଏମ୍ଭି ଅବ୍ଦୁଲ୍ଲା ମୋଜାମ୍ବିକ୍ରୁ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଅଭିମୁଖେ ୫୫ ହଜାର ଟନ୍ କୋଇଲା ନେଇ ଯାଉଥିଲା । ଏହି ସମୟରେ ଏକ ଅଜଣା ମାଛଧରା ବୋଟ୍ ସେମାନଙ୍କ ରାଡାରରେ ଦେଖାଦେଇଥିଲା । ୬ ଜଣ ଲୋକ ଅଟୋମେଟିକ୍ ରାଇଫଲ୍ ଧରି ମାଡ଼ି ଆସୁଥିବା ୱାଚ୍ମ୍ୟାନ୍ ଜାଣିବାକୁ ପାଇଥିଲେ । ସେ ତୁରନ୍ତ କ୍ୟାପ୍ଟେନ୍ଙ୍କୁ ଜଣାଇବା ପରେ ଆଉ ଏକ ସ୍ପିଡ୍ ବୋଟ୍ରେ ୬ ଜଣ ବନ୍ଧୁକଧାରୀ ଜଳଦସ୍ୟୁ ପହଞ୍ଚିଥିଲେ । ଚାହୁଁ ଚାହୁଁ ୧୨ ଜଳଦସ୍ୟୁ ଏମ୍ଭି ଅବ୍ଦୁଲ୍ଲା ଜାହାଜ ଉପରେ ଚଢ଼ି କ୍ରୁ ସଦସ୍ୟଙ୍କୁ କାବୁ କରିନେଇ ଜାହାଜକୁ ନିଜ ନିୟନ୍ତ୍ରଣକୁ ନେଇଯାଇଥିଲେ । ୩୨ ଦିନ ଧରି ପଣବନ୍ଦୀ ରହିବା ପରେ ୨୦୨୪ ଏପ୍ରିଲରେ ଜଳଦସ୍ୟୁମାନେ ଏମ୍ଭି ଅବ୍ଦୁଲ୍ଲାର କ୍ରୁ ସଦସ୍ୟମାନଙ୍କୁ ଛାଡ଼ିଦେଇଥିଲେ ।
ସୋମାଲୀ ଜଳଦସ୍ୟୁଙ୍କ ଏଭଳି ଭୟାନକ ଲେଉଟାଣି ଅନ୍ତର୍ଜାତୀୟ ସାମୁଦ୍ରିକ ବାଣିଜ୍ୟ ଉପରେ ବଡ଼ ବିପଦ ଭାବେ ଉଭା ହୋଇଛି । ଆଞ୍ଚଳିକ ଜାହାଜ ଚଳାଚଳ କ୍ଷେତ୍ରରେ ସାମିଲ ଥିବା ଲୋକଙ୍କ ପାଇଁ ଘାତକ ସାଜିଛନ୍ତି । ଅଧିକ ବ୍ୟୟଭାର ଯୋଗୁ ଜାହାଜ ମାଲିକ ସଶସ୍ତ୍ର ଗାର୍ଡଙ୍କୁ ପଠାଇବାକୁ ରାଜି ହେଉ ନ ଥିବାରୁ ସ୍ଥାନୀୟ ପେସାଦାରମାନେ ଜାହାଜ ପରିଚାଳନା ପାଇଁ କୁଣ୍ଠାବୋଧ କରୁଛନ୍ତି । ଆଉ ଯଦି ସେମାନେ ସାହସ କରି ସମୁଦ୍ରକୁ ଯାଉଛନ୍ତି, ତେବେ ସେମାନଙ୍କ ପରିବାର ଦୁର୍ଦ୍ଦିନରେ କାଳାତିପାତ କରୁଛନ୍ତି ।
ଏମ୍ଭି ଅବ୍ଦୁଲ୍ଲା ଜାହାଜରେ କ୍ରୁ ସଦସ୍ୟ ଥିବା ବାଂଲାଦେଶର ମହମ୍ମଦ ଅତିକ୍ ଉଲ୍ଲାହ ଖାନ୍ ନିଜ ଅନୁଭୂତି ମନେ ପକାଇ କୁହନ୍ତି, ସୋମାଲିଆ ଜଳଦସ୍ୟୁଙ୍କ କବଳରେ ୩୨ ଦିନ ଧରି ରହିବା ଆମ ପାଇଁ କଷ୍ଟକର ଥିଲା । ସବୁବେଳେ ପରିବାର ଚିନ୍ତା ଘାରିଥିଲା । ବାଂଲାଦେଶରେ ନିଜ ପରିବାର ପାଖକୁ ଫେରିଆସିବା ପରେ ମାସ ମାସ ଧରି ସେ କେଉଁ ଆଡ଼କୁ ଯିବାକୁ ମଙ୍ଗି ନ ଥିଲେ । କିନ୍ତୁ ନିଜ ଦେଶରେ ସ୍ୱଳ୍ପ ରୋଜଗାର ସୁଯୋଗ ଯୋଗୁ ସେ ପୁଣି ଜାହାଜକୁ ଫେରିଛନ୍ତି।
