ନୂଆଦିଲ୍ଲୀ,୦୫/୦୪: ଭାରତ ସମେତ ୬୦ରୁ ଊଦ୍ଧ୍ୱର୍ ରାଷ୍ଟ୍ରଙ୍କ ଉପରେ ଯେସାକୁ ତେସା ଶୁଳ୍କ ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଭାରତ ଉପରେ ୨୭% ଏବଂ ଚୀନ୍ ଉପରେ ଲାଗିବ ୩୪% ଟାରିଫ୍ । ଅନ୍ୟାନ୍ୟ ରାଷ୍ଟ୍ରଗୁଡ଼ିକ ଉପରେ ବି ତଗ୍ଡ଼ା ଶୁଳ୍କ ଲଗାଇଛି ଆମେରିକା । ତେବେ ଏହି ଆକ୍ରାମକ ଶୁଳ୍କ ନୀତି ଖୋଦ୍ ଆମେରିକା ସହ ବିଶ୍ୱ ଅର୍ଥନୀତି ପାଇଁ ବଡ଼ ବିପତ୍ତିକୁ ଡାକି ଆଣିବ ବୋଲି ଚେତାବନୀ ଦେଲେଣି ଅର୍ଥନୀତିଜ୍ଞ । ଆଗକୁ ମହାମାନ୍ଦାବସ୍ଥା ମାଡ଼ି ଆସୁଥିବା ସତର୍କବାଣୀ କରିଛନ୍ତି ।
ସେମାନଙ୍କ ମତରେ, ଆମେରିକାକୁ ରାଜସ୍ୱ ଟାଣିବାକୁ ଟ୍ରମ୍ପଙ୍କ ଟାରିଫ୍ ଅସ୍ତ୍ର ହୋଇଛି ଦିଗହରା । ଟ୍ରମ୍ପଙ୍କ ଶୁଳ୍କ ବାଣରେ ନିଜେ ଘାଇଲା ହୋଇଗଲାଣି ଆମେରିକା । ୱାଲ୍ଷ୍ଟ୍ରିଟ୍ରୁ ଉଡ଼ିଗଲାଣି ୩ ଟ୍ରିଲିୟନ ଡଲାର । ନିବେଶକ ଭୟଭୀତ । ଅନ୍ୟପଟେ ଟ୍ରମ୍ପ ନିଜ ନିଷ୍ପତ୍ତିରେ ଅଟଳ । ଅର୍ଥନୀତିର ଅବସ୍ଥା ସାଂଘାତିକ ହୋଇଗଲାଣି ତଥାପି ନୀତିରେ କୌଣସି ପରିବର୍ତ୍ତନ ହେବ ନାହିଁ ବୋଲି ରୋକ୍ଠୋକ୍ ମନା କରିଦେଇଛନ୍ତି ଟ୍ରମ୍ପ । ଏଭଳି ସ୍ଥିତିରେ ଅର୍ଥବ୍ୟବସ୍ଥା ପ୍ରତି ନିବେଶକ ଏବଂ ଲୋକଙ୍କ ଆସ୍ଥା ଟଳମଳ ହେଲାଣି । ଘମାଘୋଟ ବାଣିଜ୍ୟ ଯୁଦ୍ଧ ମଧ୍ୟରେ ନିକଟ ଭବିଷ୍ୟତରେ ଏକ ବଡ଼ ଧରଣର ମାନ୍ଦାବସ୍ଥା ଜଳଜଳ ଦିଶୁଛି ।
ଆମେରିକାର ପ୍ରମୁଖ ବ୍ୟାଙ୍କ ଜେ.ପି. ମୋର୍ଗାନ୍ର ମୁଖ୍ୟ ଅର୍ଥନୀତିଜ୍ଞ ବ୍ରୁସ୍ କାସ୍ମ୍ୟାନ୍ କହିଛନ୍ତି, ୨୦୨୫ରେ ବିଶ୍ୱ ଆର୍ଥିକ ମାନ୍ଦାବସ୍ଥାର ୬୦% ସମ୍ଭାବନା ରହିଛି । ସେ କହିଛନ୍ତି ଯେ, ଶୁଳ୍କ ବୃଦ୍ଧିର ପ୍ରଭାବ ଆହୁରି ବଢ଼ିପାରେ । ଏ ପ୍ରଭାବ ରାଷ୍ଟ୍ରଗୁଡ଼ିକର ପାଲଟା ଶୁଳ୍କ ହମ୍ଲା, ଆମେରିକାରେ ବ୍ୟବସାୟିକ ଚିନ୍ତାଧାରା ଖସିବା ଏବଂ ଯୋଗାଣ ଶୃଙ୍ଖଳରେ ବ୍ୟବଧାନ ଉପରେ ନିର୍ଭର କରିବ । ଗୋଲ୍ଡମ୍ୟାନ୍ ସାଚ୍ସ ବି ସମାନ ଧରଣ ଚିନ୍ତା ପ୍ରକଟ କରିଛି । ଆଗାମୀ ୧୨ ମାସରେ ମାନ୍ଦାବସ୍ଥା ସମ୍ଭାବନା ୩୫% ଥିବା ଏହା କହିଛି ।
ଗୁରୁବାର ବିଶ୍ୱବ୍ୟାପୀ ସେୟାର ବଜାରଗୁଡ଼ିକରେ ଦେଖିବାକୁ ମିଳିଛି ପତନ । ଆମେରିକାର ଡାଓ ଜୋନ୍ସ ୧,୬୭୯.୩୯ ପଏଣ୍ଟ ଖସି ୪୦,୫୪୫ ପଏଣ୍ଟରେ ପହଞ୍ଚିଛି । ସେହିଭଳି ଏସ୍ ଆଣ୍ଡ୍ ପି ୫୦୦ ୨୭୪ ପଏଣ୍ଟ ସଂକୁଚିତ ହୋଇଛି । ନାସ୍ଡାକ୍ କମ୍ପୋଜିଟ୍ ୧,୦୫୦ ପଏଣ୍ଟ ପତନ ସହ ବନ୍ଦ ହୋଇଛି । ଏସ୍ ଆଣ୍ଡ୍ ପି ୫୦୦ କମ୍ପାନିଗୁଡ଼ିକର ମିଳିତ ବଜାର ମୂଲ୍ୟ ୨.୪ ଟ୍ରିଲିୟନ ଡଲାର ସଂକୁଚିତ ହୋଇଛି।
ମାନ୍ଦାବସ୍ଥା ଆଶଙ୍କା ମଧ୍ୟରେ ଭାରତୀୟ ଇକ୍ୱିଟି ବଜାରରେ ବି ଦେଖିବାକୁ ମିଳିଛି କମ୍ପନ । ଶୁକ୍ରବାର ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସୂଚକାଙ୍କ ସେନ୍ସେକ୍ସ ୯୩୦ ପଏଣ୍ଟ ଖସି ୭୫,୩୬୪ ପଏଣ୍ଟରେ ବନ୍ଦ ହୋଇଛି । ସେହିଭଳି ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟିରେ ୩୪୫ ପଏଣ୍ଟ ହ୍ରାସ ଘଟିଛି । ଧାତବ, ଫାର୍ମା ଏବଂ ଆଇଟି ଷ୍ଟକ୍ରେ ବୃହତ୍ ହ୍ରାସ ଦେଖିବାକୁ ମିଳିଛି । ଏହି ହ୍ରାସ ସହିତ ବିଏସ୍ଇରେ ତାଲିକାଭୁକ୍ତ କମ୍ପାନିଗୁଡ଼ିକର ମୋଟ ବଜାର ମୂଲ୍ୟ ୯.୫ ଲକ୍ଷ କୋଟି ଟଙ୍କା ସଂକୁଚିତ ହୋଇ ୪୦୩.୮୩ ଲକ୍ଷ କୋଟି ଟଙ୍କାକୁ ଖସିଆସିଛି । ଅନିଶ୍ଚିତତା ମଧ୍ୟରେ ବିଶ୍ୱ ବଜାର ଏବେ ଯେପରି ଛାର୍ଖାର ।
ଅନ୍ୟପଟେ, ଆମେରିକାର ଶୁଳ୍କ ନୀତି ଯୋଗୁ ଏକ ବଡ଼ ଧରଣର ବାଣିଜ୍ୟ ଯୁଦ୍ଧ ଦାନା ବାନ୍ଧିଲାଣି । ଦେଶଗୁଡ଼ିକ ଆମେରିକାକୁ ଶାସ୍ତି ଦେବାକୁ ପ୍ରସ୍ତୁତ କଲେଣି ରଣନୀତି । ପ୍ରତିଶୋଧପୂର୍ବକ ଆମେରିକା ଉପରେ ଅତିରିକ୍ତ ଶୁଳ୍କ ଘୋଷଣା କରିଛି ଚୀନ୍ । ଚୀନ୍ର ଅର୍ଥ ମନ୍ତ୍ରାଳୟ ପ୍ରକାଶ କରିଛି, ଏପ୍ରିଲ ୧୦ରୁ ଆମେରିକାରୁ ଆସୁଥିବା ସମସ୍ତ ସାମଗ୍ରୀ ଉପରେ ୩୪%ର ଅତିରିକ୍ତ ଶୁଳ୍କ ଲାଗିବ । ପୂର୍ବରୁ ହିଁ ଉଭୟ ଦେଶ ମଧ୍ୟରେ ବାଣିଜ୍ୟ ବିବାଦ ରହିଆସିଛି । ବର୍ତ୍ତମାନ ଏହି ଜବାବୀ ହମ୍ଲା ବାଣିଜ୍ୟିକ ତିକ୍ତତାକୁ ଆହୁରି ବଢ଼ାଇଦେବ ।
କେବଳ ଅତିରିକ୍ତ ଶୁଳ୍କ ନୁହେଁ, ଚୀନ୍ ମଧ୍ୟ କିଛି ପ୍ରମୁଖ ସାମଗ୍ରୀର ରପ୍ତାନି ଉପରେ ରୋକ୍ ଲଗାଇଛି । ଏସବୁ ଦ୍ୱାରା ଚୀନ୍ ଏବଂ ଆମେରିକା ମଧ୍ୟରେ ବାଣିଜ୍ୟ ଯୁଦ୍ଧ ଆହୁରି ତୀବ୍ରତର ହେବ । ଆମେରିକାର ଶୁଳ୍କ ବାଣର ସିଧା ଜବାବ ଦେଇଛି ଡ୍ରାଗନ୍ ।
ଟ୍ରମ୍ପ ପୂର୍ବରୁ ଚୀନ୍ ଉପରେ ୨୦% ଶୁଳ୍କ ଲଗାଇଥିଲେ ଏବଂ ଏବେ ଆଉ ୩୪% ଲଗାଇଛନ୍ତି । ଏହିଭଳି ଭାବେ ମୋଟ ଟିକସ ୫୪% ହୋଇଛି । ପ୍ରକାଶଯୋଗ୍ୟ, ଚୀନ୍ ପ୍ରତିବର୍ଷ ଆମେରିକାକୁ ୪୦,୦୦୦ କୋଟି ଡଲାରରୁ ଅଧିକ ସାମଗ୍ରୀ ବିକ୍ରି କରିଥାଏ । ଚୀନ୍ର ବାଣିଜ୍ୟ ମନ୍ତ୍ରାଳୟ ପ୍ରକାଶ କରିଛି ଯେ, ଏହା ୧୬ ଆମେରିକୀୟ କମ୍ପାନିଙ୍କୁ ନିଜର ରପ୍ତାନି ନିୟନ୍ତ୍ରଣ ତାଲିକାରେ ପକାଇଛି । ଏହାର ଅର୍ଥ ହେଉଛି ଏହି କମ୍ପାନିଗୁଡ଼ିକୁ ଏବେ ଚୀନ୍ ବଜାର ଏବଂ ଟେକ୍ନୋଲୋଜି ପର୍ଯ୍ୟନ୍ତ ପହଞ୍ଚିବା କଷ୍ଟକର ହେବ ।
ଏହାବ୍ୟତୀତ ୧୧ ଆମେରିକୀୟ କମ୍ପାନିଙ୍କୁ ଚୀନ୍ର ‘ଅବିଶ୍ୱସନୀୟ କମ୍ପାନି’ ତାଲିକାରେ ରଖାଯାଇଛି । ଚୀନ୍ କିଛି ସାମଗ୍ରୀର ରପ୍ତାନି ଉପରେ ବି ରୋକ୍ ଲଗାଉଛି । ଏହି ସାମଗ୍ରୀ ହାଇଟେକ୍ ଶିଳ୍ପଗୁଡ଼ିକ ପାଇଁ ଅତି ଜରୁରୀ । ଏଥିରେ ସାମାରିୟମ, ଗ୍ୟାଡୋଲିନିୟମ, ଟର୍ବିୟମ, ଡିସ୍ପ୍ରୋସିୟମ, ସ୍କାଣ୍ଡିୟମ ଆଦି ରହିଛି । ଏହି ସାମଗ୍ରୀଗୁଡ଼ିକ ସେମିକଣ୍ଡକ୍ଟର, ଇଲେକ୍ଟ୍ରିକ୍ ଯାନ ଏବଂ ସେନା ଉପକରଣ ପ୍ରସ୍ତୁତିରେ ବ୍ୟବହାର ହୋଇଥାଏ ।
ରାଷ୍ଟ୍ରୀୟ ସୁରକ୍ଷା ହିତରେ ଏସବୁ ପଦକ୍ଷେପ ନିଆଯାଇଛି ବୋଲି ଚୀନ୍ର ବାଣିଜ୍ୟ ମନ୍ତ୍ରାଳୟ ପ୍ରକାଶ କରିଛି । ସେହିଭଳି ଆମେରିକାର ଅଟୋ ଆମଦାନି ଉପରେ କାନାଡ଼ା ଲଦିଛି ୨୫% ଟାରିଫ୍ ।
