ନୂଆଦିଲ୍ଲୀ,୦୬/୧୨: ଭାରତର ସାମର୍ଥ୍ୟକୁ ନେଇ ସମଗ୍ର ବିଶ୍ୱ ଅବଗତ । ଏଥିରୁ ବାଦ୍ ପଡ଼ିନି ରୁଷ । ଭାରତରେ ଥିବା ସମ୍ଭାବନାକୁ ଆଖି ଆଗରେ ରଖି ଏହା ସହିତ ଅର୍ଥନୈତିକ ସମ୍ପର୍କକୁ ଆହୁରି ମଜଭୁତ କରିବାକୁ ଚାହୁଁଛି ରୁଷ । ଭାରତ ନିର୍ମାଣରେ ନିଜର ଯୋଗଦାନ ଦେବାକୁ ଆଗ୍ରହୀ । ରାଷ୍ଟ୍ରପତି ଭ୍ଲାଦିମିର ପୁଟିନ୍ ଗୁରୁବାର ଭାରତର ‘ମେକ୍ ଇନ୍ ଇଣ୍ଡିଆ’ ଅଭିଯାନକୁ ଢ଼େର ପ୍ରଶଂସା କରିବା ସହ ଭାରତରେ ବିନିର୍ମାଣ ୟୁନିଟ୍ ଲଗାଇବା ପାଇଁ ଆଗ୍ରହ ପ୍ରକାଶ କରିଥିବା ଜଣାପଡ଼ିଛି ।
ରୁଷ୍ର ଏ ପଦକ୍ଷେପ ଉଭୟ ଦେଶ ମଧ୍ୟରେ ବଢୁଥିବା ଅର୍ଥନୈତିକ ସମ୍ପର୍କକୁ ଆହୁରି ମଜଭୂତ କରିବ । ଚଳିତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷ ରାଷ୍ଟ୍ରପତି ପୁଟିନ୍ଙ୍କୁ ଦୁଇ ଦୁଇ ଥର ଭେଟିବା ପରେ ଦୁଇ ଦେଶ ମଧ୍ୟରେ ସମ୍ପର୍କ ମଜଭୁତ ହୋଇଛି । ୧୫ ତମ ଭିଟିବି ରୁଷ କଲିଂ ନିବେଶ ଫୋରମ୍ରେ ଉଦ୍ବୋଧନ ଦେଇ ପୁଟିନ୍ ଭାରତର ‘ଇଣ୍ଡିଆ ଫାର୍ଷ୍ଟ’ ନୀତିର ପ୍ରଶଂସା କରିଛନ୍ତି । ସେ କ୍ଷୁଦ୍ର ଏବଂ ମଧ୍ୟମ ଧରଣ ଉଦ୍ୟୋଗ(ଏସ୍ଏମ୍ଇ)ର ବିକାଶ ପାଇଁ ସ୍ଥିର ପରିସ୍ଥିତି ଗଠନରେ ଭାରତ ସରକାରଙ୍କ ସଫଳତା ଉପରେ ଆଲୋକପାତ କରିଥିବା ବାଣିଜ୍ୟ ଏବଂ ଶିଳ୍ପ ମନ୍ତ୍ରାଳୟ ପକ୍ଷରୁ ଜାରି ଏକ ବିବୃତିରେ ଉଲ୍ଲେଖ କରାଯାଇଛି ।
ଏ ଅବସରରେ ରାଷ୍ଟ୍ରପତି ପୁଟିନ୍ ‘ମେକ୍ ଇନ୍ ଇଣ୍ଡିଆ’ ଅଭିଯାନକୁ ଭାରତର ଅର୍ଥନୈତିକ ଅଭିବୃଦ୍ଧିର ଉତ୍ପ୍ରେରକ ଦର୍ଶାଇଛନ୍ତି । ଉକ୍ତ ଅଭିଯାନକୁ ସେ ରୁଷ୍ର ‘ଇମ୍ପୋର୍ଟ ସବ୍ଷ୍ଟିଚ୍ୟୁସନ୍ ପ୍ରୋଗ୍ରାମ’ ସହ ତୁଳନା କରିଥିବା ଜଣାପଡ଼ିଛି । ସେ କହିଲେ ଯେ, ପ୍ରଧାନମନ୍ତ୍ରୀ ମୋଦିଙ୍କ ପାଖରେ ‘ମେକ୍ ଇନ୍ ଇଣ୍ଡିଆ’ ନାମକ ଏକ ସମାନ କାର୍ଯ୍ୟକ୍ରମ ଅଛି । ଆମେ ବି ଭାରତରେ ଆମର ବିନିର୍ମାଣ ୟୁନିଟ୍ ସ୍ଥାପନ କରିବାକୁ ପ୍ରସ୍ତୁତ ଅଛୁ । ଆମେ ଏହା ମାନୁଛୁ ଯେ, ଭାରତରେ ନିବେଶ କରିବା ଲାଭଦାୟକ ।
ସୂଚନାଯୋଗ୍ୟ, ୨୦୨୪ରେ ରୁଷ ଏବଂ ଭାରତ ମଧ୍ୟରେ ଦ୍ୱିପାକ୍ଷିକ ବ୍ୟାପାର ୬୬୦୦ କୋଟି ଡଲାରରେ ପହଞ୍ଚିଛି । ଏହା ଏକ ରେକର୍ଡ। ୫ ବର୍ଷରେ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ବ୍ୟାପାର ୫ ଗୁଣା ବଢ଼ିଛି । ଦୁଇ ଦେଶ ଲକ୍ଷ୍ୟ ରଖିଛନ୍ତି ଯେ, ୨୦୩୦ ସୁଦ୍ଧା ଏହାକୁ ୧୦,୦୦୦ କୋଟି ଡଲାରରେ ପହଞ୍ଚାଇବେ । ଦୁଇ ଦେଶ ମଧ୍ୟରେ ଯେଉଁ କ୍ଷେତ୍ରଗୁଡ଼ିକରେ ବ୍ୟବସାୟିକ ସହଯୋଗ ବଢ଼ାଯାଉଛି ସେଗୁଡ଼ିକ ହେଲା ରେଳ, ଫାର୍ମା, ସୂଚନା ପ୍ରଯୁକ୍ତି, ବିମାନ ଏବଂ ସାଇବର ସୁରକ୍ଷା ।
ରୁଷ୍ର ପ୍ରମୁଖ ତୈଳ କମ୍ପାନି ରୋଜ୍ନେଫ୍ଟ ନିକଟରେ ଭାରତରେ କରିଥିବା ୨୦୦୦ କୋଟି ଡଲାରର ନିବେଶକୁ ନେଇ ପୁଟିନ୍ ଆଲୋକପାତ କରିଥିଲେ । ସେ କହିଲେ ଯେ, ଭାରତରେ ନିବେଶ ଲାଭଦାୟକ । ପୁଟିନ୍ ଆହୁରି କହିଲେ ଯେ, ନୂଆ ରୁଷୀୟ ବ୍ରାଣ୍ଡଗୁଡ଼ିକର ଉଦୟ ଉକ୍ତ ପାଶ୍ଚାତ୍ୟ କମ୍ପାନିଗୁଡ଼ିକର ସ୍ଥାନ ନେବାରେ ସହାୟକ ହେଉଛି, ଯେଉଁମାନେ ନିଜ ଇଚ୍ଛାରେ ଆମ ବଜାର ଛାଡ଼ିଦେଇଛନ୍ତି । ଏଠାରେ ପୁଟିନ୍ ପରୋକ୍ଷ ଭାବେ ଆମେରିକାକୁ ଆକ୍ଷେପ କରିଛନ୍ତି । ଯଦି ରୁଷ ଭାରତ ବଜାରରୁ ଆମେରିକୀୟ ସାମଗ୍ରୀଗୁଡ଼ିକୁ ପଛରେ ପକାଇଦିଏ ତେବେ ଆମେରିକାକୁ ବଡ଼ ମାତ୍ରାରେ କ୍ଷତି ହୋଇପାରେ ।
ଅନ୍ୟପକ୍ଷରେ, ରୁଷ ରାଷ୍ଟ୍ରପତି ଏସ୍ଏମ୍ଇ ବିକାଶ ଦିଗରେ ବ୍ରିକ୍ସ ଦେଶଗୁଡ଼ିକର ସହଯୋଗକୁ ସମର୍ଥନ କରିଛନ୍ତି । ଏହାସହିତ ଗ୍ଲୋବାଲ ସାଉଥ୍ରେ ସହଜ ବ୍ୟବସାୟିକ କାରବାର ନେଇ ସଦସ୍ୟ ରାଷ୍ଟ୍ରଗୁଡ଼ିକର ଉଦ୍ୟମକୁ ପ୍ରଶଂସା କରିଛନ୍ତି ।
ପ୍ରକାଶଯୋଗ୍ୟ, ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବ୍ରିକ୍ସ ଦେଶଗୁଡ଼ିକୁ ଧମକ ଦେଇଥିଲେ । ଟ୍ରମ୍ପ କହିଥିଲେ ଯେ, ବ୍ରିକ୍ସ ଦେଶଗୁଡ଼ିକ ଯଦି ଡଲାର ବ୍ୟତୀତ ଅନ୍ୟ କୌଣସି କରେନ୍ସିରେ କାରବାର କରନ୍ତି ତେବେ ସେମାନଙ୍କ ଉପରେ ୧୦୦% ଟାରିଫ୍ ଲଗାଯାଇପାରେ । ଏହାର ପ୍ରତିକ୍ରିୟାରେ ପୁଟିନ୍ କହିଲେ ଯେ, ଆମେରିକାର ଏହି ବୟାନ୍ ଯୁକ୍ତରାଷ୍ଟ୍ର ପାଇଁ ନୂଆ ଆହ୍ୱାନ ପାଲଟିପାରେ । ଆଗାମୀ ବର୍ଷ ବ୍ରାଜିଲରେ ହେବାକୁ ଥିବା ବ୍ରିକ୍ସ ସମ୍ମିଳନୀରେ ସହଯୋଗର ପ୍ରମୁଖ କ୍ଷେତ୍ରଗୁଡ଼ିକୁ ଚିହ୍ନଟ କରିବା ପାଇଁ ପୁଟିନ୍ ସଦସ୍ୟ ରାଷ୍ଟ୍ରଗୁଡ଼ିକୁ ଆହ୍ୱାନ ଦେଇଛନ୍ତି ।
